Ƀlep ƀât tơbăt 100 sơnăm Năr Hla ar tơroi Kăch mang Việt Nam (21/6), kơsơ̆ brei 11/6, dêh char Đắk Lắk pơm lêh hơpăh Tơmam ăn Hla ar tơroi dêh char Đắk Lắk sơnăm 2024 păng pơtôch 5 sơnăm pơgơ̆r tơmam hơpăh âu. Tơmam hơpăh ăn Hla ar tơroi Đắk Lắk pơgơ̆r đơ̆ng sơnăm 2021, pơgơ̆r hơpăh hơnơ̆ng rim sơnăm ăn dôm ƀai chih rơgei lơ̆m sơnăm adrol kơ ‘nŏh. Hlŏh 5 sơnăm pơgơ̆r, đĭ đei vă jê̆ 600 ƀai chih đơ̆ng dôm ƀai chih lơ̆m teh đak vang gơih thi. Hơdrô̆ sơnăm ‘nâu, đei 96 ƀai chih mât lơ̆m vŏng thi mă hơtuch.

Tơ̆ âu, Khul châm hơlen pôk hơpăh tơmam ăn Hla ar tơroi kơ dêh char Đắk Lắk hơpăh tơmam ăn 49 ƀai chih tôch rơgei. Anih vei lăng kon pơlei dêh char kŭm pôk pơ ư 1 khul grŭp păng 7 ‘nu bơngai rơgei lơ̆m tơdrong pơgơ̆r hơpăh Tơmam âu. VOV Tây Nguyên chơt hơiă iŏk đei 7 tơmam hơpăh ăn Radio, lơ̆m noh đei 1 yaih A, 1 yaih B.