Pơm ‘lơ̆ng ăn ‘măng pơgơ̆r thi, Đắk Lắk hlôi hơmet ‘lơ̆ng rim tơdrong đơ̆ng tơmam drăm, lăm thi, pơvih pơvăn, vei lăng đề thi truh tơdrong tơgŭm ăn hŏk tro tơ̆ tơring pơmat tat. Lơ̆m khei ‘năr tơplih ming khul kơdră pơgơ̆r tơring jing 2 tăl, tơdrong hơmet ăn ‘măng thi oei đei dôm anih jang tơrek truh tôch ‘lơ̆ng. ‘Măng thi tốt nghiệp THPT sơnăm ‘nâu, dêh char Đắk Lắk đei hlŏh 22.600 ‘nu hŏk tro chih măt thi, hăm 949 lăm thi đei hơmet tơ̆ 33 anih thi.

Anih vei lăng pơtho pơhrăm hlôi jang hơdoi hăm dôm tơring krao akŏm hlŏh 3.000 ‘nu kăn ƀô̆, thây kô, bơngai jang pơgang, khul linh vei lăng sơđơ̆ng... vang pơgơ̆r thi. Dôm anih thi đei hơlen năng tôm tơmam, chô̆ camera vei lăng, pơm ‘lơ̆ng găh unh hơdăh, kơkuat, kơƀang tang dŏ păng lăm thi hơmet hiă. Anih vei lăng pơtho pơhrăm dêh char oei kơchăng tơlĕch trong in păng chơ chuĕn đề thi, mă loi ƀât mă lơ̆m sơnăm ‘nâu đei 2 kơ loăi đề thi tơmât yoa ăn 2 tơdrong pơtho hŏk pơhrăm pha ra băl.