Vă hơmet ‘lơ̆ng ăn dôm anih jang, khul grŭp tơ̆pôl tơ̆ xăh gơ̆h bơ̆ jang sơđơ̆ng ‘lơ̆ng đơ̆ng ‘năr 1/7, Anih chĕp kơ̆l Đảng dêh char Kon Tum pơtho ăn dôm Khul chĕp kơ̆l Đảng găh Anih chĕp kơ̆m Đảng dêh char; dôm Anih jang đảng tơ̆ apŭng, plt păng dôm anih jang kơpal lơ̆m dêh char akŏm jơhngâm ăn tơdrong hơmet pơ ‘lơ̆ng khul bơngai jang; sek tơlang dôm tơdrong pơmat tat, tơhlăk tăk ‘nao đei vă pơm ‘lơ̆ng ăn khul kơdră chĕp kơ̆l pơgơ̆r hiôk hian, đei yoa.

Anih chĕp kơ̆l Đảng dêh char Kon Tum pơjao ăn dôm Khul chĕp kơ̆l đảng tơ̆ tơring hơlen năng, hơmet pơkĕh trong rơih bơngai jang, pơm anih jang, tơmam kơmăy kơmŏk vă bơ̆ jang…pơm ‘lơ̆ng vă ăn Anih jang tơ̆ xăh gơ̆h bơ̆ jang hiôk hian đơ̆ng ‘năr 1/7; Pơjao ăn Khul kơdră chĕp kơ̆l Đảng lơ̆m Anih vei lăng kon pơlei dêh char, pơgơ̆r hơlen năng rim tơdrong găh vei lăng, sek tơlang dôm anih jang, tơmam, teh rơkăh đơ̆ng rŏng kơ hơmet ming anih jang vei lăng vă pơm ‘lơ̆ng, đei yoa, ưh kơ pơhuach kư̆ kă; Kơdră chĕp kơ̆l Jơnŭm pơgơ̆r kon pơlei dêh char tơtom tơlĕch tơdrong tơchơ̆t chă rơih Kơdră, Phŏ kơdră, Bơngai vei lăng dôm anih jang lơ̆m Jơnŭm pơgơ̆r kon pơlei tơ̆ xăh; Kơdră, Phŏ kơdră vei lăng kon pơlei tơ̆ xăh vă pơjao tơdrong tơchơ̆t lơ̆m ‘năr 24/6. Bí thư Đảng dôm Anih jang Đảng kơ dêh char Kon Tum Nguyễn Đức Tuy ăn tơbăt, tơdrong hơmet oei bơ̆ jang tôch hrĕnh, athei rim kăn ƀô̆, bơngai jang kơ teh đak păng bơngai jang nai hơtŏk đon kơchăng păng bơ̆ jang mă tơnăp vă khul kơdră pơgơ̆r tơ̆ xăh, phường ‘nao gơ̆h bơ̆ jang hiôk hian, đei yoa.