Năr 12/2, dôm apŭng, pơlei tơm kơ dêh char Lâm Đồng pơgơ̆r năr akŏm đe tơdăm năm pơm linh sơnăm 2025, hăm hloh 1.200 'nu linh 'nao pơtơm năm pơm linh, lơ̆m noh đei jê̆ tong hơnê̆ noh đe tơdăm kon kông, păng hloh 50% 'noh kơdih pơm hla bơ-ar năm pơm linh. Lơ̆m kơsô̆ ou, linh 'nao hŏk đang trung kâ̆p, cao đẳng, đại học đei 7,6%, trung học phổ thông đei hloh 36%, mă kăl noh đei 23 'nu linh 'nao 'noh đảng viên, lơ̆m noh đei 11 đảng viên kon kông.

Linh 'nao Lơ Mu Tha Ni, đảng viên, 21 sơnăm, bơngai K’ho, oei tơ̆ thôn Đạ Nghịt 1, xah Lát, apŭng Lạc Dương chơt hơ-iă ăn tơbăt, kơdih po sư păng unh hnam sô̆ hơ-iă ah hla bơ-ar apinh pơm linh đei drơ̆ng iŏk, jing linh 'nao vă tơgop jơhngơ̆m lơ̆m tơdrong tơ-iung pơjing păng vei lăng teh đak.  

Mă đơ̆ng đĭ lĕch ‘măng khoă hŏk Đăi hŏk đang, đei tơdrong jang sơđơ̆ng, mă lei lơ hơdruh tơdăm tơ̆ dêh char Gia Lai oei khŏm apĭnh năm pơm ƀô̆ đô̆i, tơpăl tơdrong joăt joe ŭnh hnam păng hơ pơi ‘meh plang jơhngơ̆m ăn teh đak. Hơdrol kơ năr mơ̆t pơm ƀô̆ đô̆i, Lê Thị Hồng Ngọc oei tơ̆ xăh Diên Phú, pơlei tơm Pleiku) chhôk ‘nă đŏk re hla ar apĭnh mmơ̆t pơm ƀô̆ đô̆i ăn kơ ŭnh hnam vang mơ̆ng.

Lei lăi thoi ‘noh, Lê Thanh Mai oei tơ̆ phường Yên Thế, pơlei tơm Pleiku kŭm tih vơ̆ lơ̆m 1 ŭnh hnam lĭnh kon pơlei; mă đơ̆ng đĭ lĕch ‘măng khoă hŏk đăi hŏk găh pơgang, mă lei ‘măng âu kŭm chih hla ar apĭnh năm pơm lĭnh. Mă loi ‘noh , lơ̆m 1 ŭnh hnam jang chŭn mir tơ̆ xăh Ia Piar, apŭng Phú Thiện, Gia Lai, tơdăm Jarai - Ksor Thanh ‘nao lĕch ‘măng khoă hŏk Hnam trưng Đại học Luật - Đại học Huế, kŭm vang năm pơm lĭnh ‘măng âu.