Pơma pơtôch hop akom, Thủ tướng Phạm Minh Chính athei akŏm iung jang tơjră kơtang, năm tơchă rôp, tang găn, tơpuh hŭt kĕ đe tĕch mơdro tơtông, pơlơ̆m mơdro sa, pơm tơlĕch tĕch mơdro tơmam drăm ya, tơmam drăm ưh kơ băt hơnih pơm tơlĕch, pơm glăi tơdrong pơm tơm tơmam drăm đei pơgơ̆r đơ̆ng năr 15/5 truh năr 15/6. Thủ tướng athei Hơnih tơm Nô̆i vŭ dăr lăng hơnăp jang, tơdrong jang kơ rim hơnih tơm ưh kơ lê̆ “hơnih lon khôi luơ̆t” lơ̆m tơdrong jang hơmet pơ ‘lơ̆ng, pơm kơ toei khul jang pơm ăn truh tơdrong hơchăng char vei lăng đei ƀơm truh tơdrong jang tang găn khul yoch, đei ƀơm truh tĕch mơdro tơtông, tơmam drăm ya, pơlơ̆m tĕch mơdro. Hơnih tơm Kŏng ang pơrô̆ athei rim khul joăt jang, kŏng ang rim tơring iung bơ̆ jang năm tơchă rôp, xek tơlang rim tơdrong pơm glăi, tơtom tơbăt kơtơ̆ng ang lơ̆m brŏ, tivi ou to vă tơtom pơđep, tang găn hơlou.