Tơ̆ dôm hơnih jang hanh chinh kŏng tơ̆ xah, rim khul hơdruh tơdăm truh pơtho kon pơlei pơkăp đĭn yanh điê̆n tưh, chih măt pơjing tai khuan kŏng dân điê̆n tưh... Atŭm hăm noh, tơroi tơblang păng tơbăt ăn dôm tơdrong gĭt kăl gah pơm hla bar hanh chinh, tơdrong jang kŏng trư̆k tuyê̆n. Pơtơm jang đơ̆ng năr 1/7, truh dang ei, đe đoan viên hơdruh tơdăm kơ dêh char Lâm Đồng hlôi tơgŭm ăn dôm jĭt rơbou kon pơlei băt gah tơdrong kăp gĭt hăm tơdrong jang kŏng.

'Nou jĭ tơdrong jang kăp gĭt, tơgop hơtŏk pơm jang tơ̆ dôm Hơnih pơm hla bar hanh chinh kŏng đei pơm jang sơđơ̆ng, tơjur ƀiơ̆ jơ năr pơm hla bar kăl, mă kăl noh hăm dôm tơring hơtaih yaih, tơring kon pơlei kon kông tam mă băt hơdah gah tơdrong yua kơmăi kơmŏk kơsô̆ 'nao dang ei.