Đơ̆ng rŏng minh giĕng pơm jang kiơ̆ pơkăp jơnŭm pơgơ̆r 2 tăl, tơdrong pơm jang tơ̆ dêh char Gia Lai hlôi tơlĕch jang sơđơ̆ng. Tơdrong jang kiơ̆ pơkăp trư̆k tuyê̆n đei pơm jang tơnăp, hơdrô̆ ƀơm tơhlăk tăk gah chô̆ pơtoi mạng hăm Trung ương đĕch. Tơrĕk hloh noh, tơdrong jang pơm hla hanh chinh ăn kon pơlei đei jơnei tơnăp. Atŭm hăm dôm tơdrong jang đei jơnei mă blŭng, dêh char duh oei tơjră hăm tơnap tap ah mă teh să hloh 21.000 km² – dơ̆ng mă 2 kơ jơ̆p teh đak, kơsô̆ măt kon pơlei dơ̆ng mă mơjĭt.

Gia Lai kăl đei tơdrong pơgơ̆r jang tơnăp, kơjăp lơ̆m tơdrong pơgơ̆r jang đơ̆ng kơpal, atŭm hăm noh vei kơjăp sơđơ̆ng tơpôl. Ƀok Hồ Quốc Dũng – Ƀĭ thư Tĭnh uy Gia Lai ăn tơbăt: hăm tơdrong đei ƀôh noh, dêh char pơjing Hơnih jang 2 tơ̆ Pleiku, păng asong pơm jang minh Phŏ Ƀĭ thư Tĭnh uy, minh Phŏ Kơdră Anih jang vei lăng kon pơlei dêh char kơtă pơgơ̆r jang, vei sơđơ̆ng ăn tơdrong pơgơ̆r jang gơh tơnăp păng đei jơnei kơjăp.