Tơ̆ lăm hyup nơ̆r kơ Anih jang tơ̆ tơring Tây Nguyên kơ Rađiô nơ̆r pơma Việt Nam, ƀơr pơre tơnơ̆m 'lơ̆ng kơ pơmai H’Nêc Ênuôl – đảng viên mơlôh, bơngai pơre nơ̆r chih akŏm tơdrong tơroi bơngai ÊĐê – ang bang rim năr. Kiơ̆ đơ̆ng hơyuh rapor, dôm tơchơ̆t jang đơ̆ng Đảng, Teh đak truh hăm rim pơlei pơla hơtaih yaih, tơring mă rađiô pơre nơ̆r jing gơng tơroh kăp gĭt pơtoi đon lui đơ̆ng kon pơlei kon kông hăm Đảng. Pơmai H’Nêc tơroi: “Tih vơ̆ lơ̆m pơlei pơla, inh roi băt hơdah nơ̆r pơma kon pơlei kon kông kơdih kăp gĭt thoi yơ. Rim kơtơ̆ng ang, rim tơdrong tơroi adoi đei nhôn hơdrin pơre hăm nơ̆r pơma ƀônh hlôh vao, tơguăt hăm kon pơlei, vă tơchơ̆t jang đơ̆ng Đảng, Teh đak truh hăm kon pơlei ƀônh hloh. Đơ̆ng năr mơ̆t jang Đảng, inh roi băt hơdah sơnong jang kơ bơngai jang tơroi tơbăt, jang pơre nơ̆r – păng pơ-ư pơ-ang kơlih đei tơgop vei kơjăp đon lui kơ pơlei pơla hăm Đảng”.

Mưh nơ̆r pơma noh gơng tơroh đon lui noh joh ayŏ jing todrong tơm kơ tơguăt tơguăl. Tơ̆ xah Cuôr Đăng, dêh char Đăk Lăk, pơmai H’Pha Ayun – đảng viên mơlôh, sơ̆ jang Ƀĭ thư Đoan xah, dang ei noh bơngai jang lơ̆m Anih jang Đảng uy xah – tơnăp hăm tơdrong jang hơvơn đe hơdruh tơdăm vei răk joh ayŏ juăt jue 'lơ̆ng rŏ, atŭm hăm noh tơguăt hăm hơtŏk mŭk drăm tơpôl. Pơmai H’Pha ăn tơbăt: "Xah Čuôr Dăng hlôi pơjing đei 2 kâu lak ƀô̆ chĭng chêng păng nơ̆r pơma pơđơ̆k ăn đe buăl mơlôh, vă đe buăl hlôh vao hơdah hloh gah joh ayŏ chĭng chêng, nơ̆r pơma pơđơ̆k kon kông po. Tôm đe buăl đơ̆ng rŏng vang jang lơ̆m kâu lak ƀô̆ ou adoi băt tôn chĭng chêng, hlôh vao hơdah hloh gah nơ̆r pơma pơđơ̆k. Kiơ̆ đơ̆ng noh, đe buăl gơh chă akŏm pơma dơnuh, tơgop pơlan să um ai joh ayŏ kon kông truh hăm đe buăl mơlôh, đe hơdruh tơdăm lơ̆m dêh char Đăk Lăk”.

Atŭm hăm vei răk joh ayŏ, đe sơnăm mơlôh tơ̆ dôm pơlei pơla tơ̆ Đăk Lăk oei jing khul jang kăp gĭt gah tơplih kơmăi kơsô̆ – minh sơnong jang kăp gĭt mă Đảng, Teh đak tŏk bŏk tơlĕch jang kơjăp. 'Nhŏng Y Lê Pas Tơr – Phŏ Ƀĭ thư Anih jang Đoan dêh char Đăk Lăk ăn tơbăt, đe sơnăm mơlôh kon kông ưh hơdrô̆ kơjăp đon lui kiơ̆ Đảng mă oei yuk hơlou lơ̆m pơm kiơ̆ sơnong jang 'nao, nhen tơgŭm kon pơlei tơrĕk hăm tơdrong jang kŏng trư̆k tuyê̆n, tơroh chă tĕch tơlĕch tơmam choh pơtăm kiơ̆ tơdrong tĕch răt điê̆n tưh: “Nhôn hlôi pơjing dôm khul jang tơgŭm ăn jơnŭm pơgơ̆r tơring 2 tăl, pơtho ăn kon pơlei pơm kiơ̆ trong jang kŏng trư̆k tuyê̆n. Dôm khul jang kơmăi kơsô̆ lơ̆m pơlei đei iŏk jang jơnei hơdah tơ̆ tơring hơtaih yaih. Kiơ̆ đơ̆ng noh, đe sơnăm mơlôh tơgop kăp gĭt lơ̆m jang pơjing tơring tơrang 'nao, tơring kơdrơ̆m gơh hơgei păng hơtŏk tơ-iung kơjăp sơđơ̆ng”.

Vei kơjăp đon lui, vei răk joh ayŏ păng kơchăng jang hơdoi, khul đảng viên mơlôh bơngai kon kông tơ̆ Đăk Lăk tŏk bŏk roi tơƀôh hơdah sơnong pơm gơng pơtoi kơjăp đơ̆ng Đảng păng kon pơlei. Đe sư jing dôm bơngai kơtă 'nhăk tơchơ̆t đơ̆ng Đảng truh tơjê̆ hloh hăm tơdrong hơrih pơlei pơla, tơgop pơjing pơlei pơla pơdrŏng kơtang, ƀenh kơ um ai joh ayŏ kon pơlei păng hơtŏk tơ-iung kơjăp atŭm hăm teh đak.