Tơ̆ jơ tơƀơ̆p 2 păh chơt hơiă tơ̆ hơnăp tơdrong hơtŏk tơiung ‘lơ̆ng đơ̆ng pơvei Nhật Bản – Việt Nam păng hơmĕng, ‘măng tơƀơ̆p pơma dơnuh ‘măng âu gô jing tơdrong hiôk ‘lơ̆ng vă 2 păh tŭn pran păng pơm ‘lơ̆ng hloh dơ̆ng jang hơdai tơ̆ hơnăp kơnh. Găh kơdih kâu, ƀok Đỗ Văn Chiến lăng ‘lơ̆ng tơdrong hơtŏk tơiung ưh kơ đei pơdơh đơ̆ng tơdrong pơvei 2 pang lơ̆m đĭ đăng rim tơdrong, lăng kiơ̆ lơ̆m tơdrong lui ngeh chĭnh trĭ roi ‘năr roi ‘lơ̆ng, tơdrong pơvei âu hlôi jing um rup tơƀôh jơnei đơ̆ng jang hơdai 2 pang.

Ƀok Đỗ Văn Chiến roi tơbăt, Nhật Bản tŏk bŏk jing teh đak jang hơdai kơsô̆ 1 găh tơdrong tơgŭm hơtŏk tơiung tơpă (ODA) păng bơ̆jang, mă 3 găh tơmơ̆t jên jang păng tơmang lăng, mă 4 găh tĕch mơdro, lơ̆m kơsô̆ dôm teh đak jang hơdai apŭng plĕnh teh kơ Việt Nam. Kơdră Anih jang trung ương Mặt trận tổ quốc Việt Nam kŭm hơmĕng tơdrong pơvei jang hơdai 2 pang gô hơnơ̆ng hơtŏk tơiung pran kơtang hloh dơ̆ng tơ̆ hơnăp kơnh.