Pơma hơdăh, ‘nou jĭ ‘măng hop akŏm blŭng a, vă pơchoh trong tôm tong ăn bơ̆ jang pơgơ̆r ‘măng pôk rơih, khei năr kơnh, Kơdră chĕp pơgơ̆r Kuô̆k hô̆i Trần Thanh Mẫn athei, dôm tơdrong jang kơ Jơnŭm jei kăl lăng truh tơdrong sơđơ̆ng ƀlep tơpăt, hơtŏ hơnơ̆ng păng trŏ lăp hăm khôi luơ̆t lơ̆m bơ̆ jang pôk rơih; hơmet ăn tôm khul jang, mŭk drăm, kon jên hu păng trong iung jang hơdoi jơnei ƀar păh rim hơnih bơ̆ jang ƀơm truh. Kơdră chĕp pơgơ̆r Kuô̆k hô̆i akhan, bơ̆ jang pôk rơ̆ih đei pơgơ̆r lơ̆m teh đak, tơdrong jang jĭ tôch kơ lơ tih tên, jơ ‘năr kơ đeh, kơ yuơ lơ loh kăl hơmet ăn mă brĕ găh rim tơdrong. Kơdră chĕp pơgơ̆r Kuô̆k hô̆i Trần Thanh Mẫn lăp đon hăm dôm nơ̆r tơgop đơ̆ng rim kơdră lơ̆m Jơnŭm chĕp pơgơ̆r Pôk rơih Teh đak kăl atŏk kơtang jang kiơ̆ kmăi kmŏk kơtơ̆ng ang lơ̆m rim tơdrong jang kơ bơ̆ jang pôk rơih, mă kăl ứng dụng VNeID; lăng kơjăp truh tơplih kơsô̆ vă pơgơ̆r ‘lơ̆ng hơ iă đơ̆ng Trung ương truh tơ̆ 34 dêh char, pơlei tơm păng 3.321 hơnih jang tơring.