

Kiơ̆ hla bơar chih tơbăt đơ̆ng Hơnih vei lăng kon pơlei dêh char Dak Lăk, dôm khei blŭng sơnăm, choh jang sa, pơm tơlĕch tơmam drăm, tĕch mơdro păng tơmang pơhiơ̆ đei tŏk ‘lơ̆ng. Tơmoi năm tơmang pơhiơ̆ tŏk hloh mĭnh poăt pơtêng hăm sơnăm sơ̆. Tơdrong hơ iă kăl hloh ‘noh thuê̆ ăn hơnih bơ̆ jang teh đak đei hloh 5.000 ti hlak jên, tŏk 35% pơtêng hăm sơnăm sơ̆.
Mă lei, ‘ngoăih dôm tơdrong iŏk đei jơnei, dêh char Dak Lăk jei tŏk bŏk tơjră muh măt hăm mĭnh ƀar tơdrong tơnap tap. Ƀok Nguyễn Thiên Văn, Kơdră chĕp pơgơ̆r pơgia Hơnih vei lăng kon pơlei dêh char Dak Lăk athei rim tơring păng rim hơnih bơ̆ jang akŏm hơmet pơ ‘lơ̆ng tơhlăk tơhlin, iung jang kơtang tơlĕch kon jên bơ̆ jang teh đak tơmơ̆t jang, lăng truh jang keh đang rim trong tơlĕch jang atŏk tơ iung mŭk drăm-tơpôl kơ pơ đĭ sơnăm 2025.“Găh dôm tơdrong jang jei sơđơ̆ng, mă lei tơlĕch kon jên jang ODA ‘noh ưh sơđơ̆ng, bơ̆n kăl lăng tơpăt păng pơm lơ liơ kĕ atŏk kơtang kon jên jang ODA. Găh thuê̆ kon jên ăn hơnih bơ̆ jang dêh char ‘noh 1.140 ti hlak jên păng tơ̆ apŭng jang kiơ̆ iŏk đei 1.600 ti. Đơ̆ng dang ei truh đĭ sơnăm dêh char oei pă 600 ti hlak jên dơ̆ng, găh tơ̆ apŭng kăl iung jang iŏk đei 700 ti hlak jên dơ̆ng ‘noh mă tôm kiơ̆ trong tơlĕch jang. Găh dêh char ‘noh rŏ năng kĕ, mă lei hăm apŭng, mưh tơplih pơjao tơdrong jang ăn kơ tơring tơnap mă iŏk đei. Tơdrong mă ou bơ̆n kăl hơlen mă brĕ.”
Tơ̆ Hop akŏm Khul kơdră chĕp pơgơ̆r Đang ƀô̆ dêh char Dak Lăk ‘măng mă 33 (pơih să), rim Kơdră tang măt hlôi pơma dơnuh, tơgop nơ̆r lơ tơdrong kăl hơmet ăn Hop akom tih kơdră tang măt Đang ƀô̆ dêh char ‘măng mă XVIII, jăl jang 2025–2030. Kiơ̆ trong pơjing Hla bơar chih tơbăt bơ̆ jang chinh trĭ pơtruh ăn Hop akŏm tih Đang ƀô̆ dêh char jăl jang truh ou kơnh, dêh char Dak Lăk ‘nao tơlĕch đei 17 trong tơlĕch jang tơm lơ̆m rim tơdrong jang mŭk drăm, oei sa-tơpôl, cham char, vei lăng sơđơ̆ng teh đak-sơđơ̆ng tơring păng tơ iung pơjing Đảng. Adoi sơkơ̆t hơdăh 5 tơdrong jang kăl atŭm hăm rim hơyak jang kơtang vă jang kiơ̆ jơnei trong tơlĕch jang atŏk tơ iung tĕnh koăng, kơjăp ‘lơ̆ng.
Hop akŏm jei akŏm pơma dơnuh păng drơ̆ng mĭnh nơ̆r kơtang hăm dôm tơdrong lơ̆m trong vă pơjing Tơdrong jang pơjing Đang ƀô̆ dêh char Dak Lăk ‘moi kiơ̆ hơgrop ƀar Đang ƀô̆ dêh char Dak Lăk hăm Phú Yên. Kiơ̆ đơ̆ng rŏng ‘noh, lăp đơ̆ng rŏng proh hơmet, lơ̆m dêh char Dak Lăk (hle) gô đei 108 hơnih Đảng găh lơ̆m Đảng dêh char, hăm akŏp măt bơngai đang viên vă jê̆ 140.000 ‘nu đang viên.
Ƀok Nguyễn Đình Trung, Ƀĭ thư Đảng dêh char Dak Lăk, athei lơ̆m khei ‘năr tơ iung pơjing tơdrong tơchơ̆t, rim hơnih bơ̆ jang, tơring kăl hơnơ̆ng pơchoh trong, tơgop nơ̆r găh tơdrong Hop akŏm tih păng dôm tơdrong jang kơ rim tơdrong vă jang tơm. Lơ̆m ou, tơdrong iung jang, kiơ̆ yok trong jang jơnei kơ ƀar dêh char Dak Lăk păng Phú Yên đơ̆ng rŏng hơgrop kăl trŏ lăp hăm tơdrong ‘meh vă atŏk tơ iung tôm tong.“Chă tơchĕng mă brĕ vă iung jang kiơ̆ hloi dôm tơdrong hlôi iŏk đei jơnei kơ dêh char Dak Lăk so păng dêh char Phú Yên so, mă ƀar dơ̆ng ‘noh kăl trŏ lăp tôm tong tơdrong jang tơm kơ 2 dêh char ưh khan lăp kơjăp kơtang găh mŭk drăm jei ưh kơ gơh, găh tơdrong hơrih sa kon pơlei pơla, vei lăng sơđơ̆ng dơ̆ng kơjăp, vei lăng năng tông tơdrong oei sa joăt joe ‘lơ̆ng rŏ jei kăl lăng kơjăp hlŏh dơ̆ng. Găh hơyak iung jang kơtang găh khul kang ƀô̆, bơ̆n kăl tơplih ‘noh mă kĕ atŏk tơ iung, hăm nơ̆r pơkoel iung jang kơtang đơ̆ng Trung ương, đơ̆ng kon pơlei, tơdăh oei hơnơ̆ng jang kiơ̆ trong so lei ưh kơ kĕ atŏk tơ iung ôh. Sơnăm 2025 hơmet ming khul bơ̆ jang ‘noh jing mĭnh trong iung jang gơ̆h hơgei hloh, mă lei hơdrô̆ Dak Lăk hơmet ming kang ƀô̆ jei mĭnh ‘măng iung jang pran kơtang gơ̆h hơgei hloh”.
Viết bình luận