Pơlei chă tơmang lăng lơ̆m tơpôl Ta Lang, xăh Avương, plt Đà Nẵng oei jê̆ trong Hồ Chí Minh. Tơmoi chă tơmang lăng truh tơ̆ âu gơ̆h kiơ̆ kon pơlei năm phĕ ‘nhot tơ̆ bri, gơ̆ tơƀăng, jur tơ̆ thong đak yâu ka, pai xa kơdih dôm tơmam xa juăt jue đơ̆ng sơ̆ păng mơ̆ng lăng tơdrong tôn chĭng, reh tĭng nĭng, hơri hơxoang kơ bơngai Cơ Tu tơ̆ hơla rông.

‘Nhŏng A Lăng Mít, tơ̆ xăh Avương tơroi: Kon pơlei Cơ Tu dôm sơnăm adrol sơ̆ arih xa gơnơm đơ̆ng jang mir đĕch, tơnuh hin hot, pơngot rơvĕt hơnơ̆ng hơnong. Đơ̆ng pơlei chă tơmang lăng lơ̆m tơpôl Ta Lang đei pơjing, unh hnam ‘nhŏng Mít kŭm nhen kon pơlei lơ̆m pơlei pơtơm jang kiơ̆. Sơnăm 2018, ‘nhŏng Mít đei teh đak tơgŭm 40 triu hlak jên, unh hnam chă tŏk iŏk dơ̆ng jên vă pơm hnam homestay. Tơmoi truh tơmang lăng tơdăh đei nơ̆r athei, unh hnam ‘nhŏng A Lăng Mít chă pai ăn por ‘nhot hai, tơmoi gơ̆h tep pơdơ̆h tơ̆ homestay 1 kơmăng 1 ‘nu 100.000 hlak.

“Mưh tơmoi truh mih ma duch nă tôch hơiă, hnam nhôn đei tơmoi truh tep pơdơ̆h bơih. Roi đunh tơdrong chă tơmang lăng lơ̆m tơpôl roi tŏk ‘nŏh kon pơlei kŭm roi hiôk ƀiơ̆. Tơmoi truh bơ̆n chă pai xa ăn tơmoi, mih ma duch nă lơ̆m pơlei kŭm hiôk hơiă ƀiơ̆. Adrol sơ̆ jang mir ƀa ƀum ưh ‘lơ̆ng ‘nŏh ưh đei xa hloi, dang ei jang găh tơmang lăng tơdrong arih xa hiôk ƀiơ̆ tơpă". 

Pơlei chă tơmang lăng lơ̆m tơpôl Ta Lang, xăh Avương đei Anih jang atŏk tơiung châu Á, Tơdrong jang Trường Sơn Jơk ƀlik yoa Anih jang atŏk tơiung kơ teh đak Mi tơgŭm păng Khul chă tơmang lăng Việt Nam vang tơgŭm pơtơm pơjao ăn tơpôl iŏk yoa vă pơvih ăn tơmoi chă tơmang lăng đơ̆ng sơnăm 2019. Đơ̆ng bơ̆ jang găh tơmang lăng, kon pơlei Cơ Tu tơ̆ âu roi đei đon vei lăng bri ‘long, cham char bri brăh vă pơm lăp đon tơmoi. Tơring pơm đei hnam Gươl, bơ̆n khan ‘nŏh jĭ Rông, đei pơtho tơƀôh trong pai xa rơgŏh ‘lơ̆ng, pơjing khul pơvih pơvăn tơmam xa đơ̆ng sơ̆ kơ bơngai Cơ Tu, tơiung dơ̆ng tơdrong jang tanh hơkăt, tanh brai vai khăn... Dôm tơdrong hơri hơxoang tân tung, da dá, hơri lý, tôn chĭng chêng đei kon pơlei iŏk tơmât lơ̆m tơdrong pơvih ăn tơmoi. Tơmoi truh ngôi oei đei tơmang lăng tơ̆ bri ‘long Pơ Mu, bri ‘long lim, ‘long Đỗ Quyên tih oei nhen thoi chăl kră sơ̆ lơ̆m bri kông. 

Ƀok Mạc Như Phương, Kơdră vei lăng kon pơlei xăh Avương ăn tơbăt: “Tơmăng lăng tơ̆ tơring blŭng a đei pơjing, lơ̆m khei ‘năr pơgơ̆r nhôn tơlĕch trong pơm hơtŏk đon hlôh vao ăn kon pơlei. Kiơ̆ đơ̆ng noh, tơdrong arih xa kơ kon pơlei jang găh tơmang lăng roi tŏk, vang tơgop ăn tơdrong jang tŏk mŭk drăm, sut pơđĭ pơngot, tơjur tơnuh hin tơ̆ tơring”.

Pơlei chă tơmang lăng lơ̆m tơpôl ĐhRôồng tơ̆ xăh Đông Giang đei 35 unh hnam vang jang hăm 82 ‘nu bơngai jang hơnơ̆ng. Mŏ Briu Thị Hạnh, jang lơ̆m Khul tanh brai vai khăn, lơ̆m pơlei chă tơmang lăng ĐhRôồng ăn tơbăt, adrol sơ̆, tanh brai lăp đei lơ̆m unh hnam đech, hrei ‘nâu tơmam đei hơnhăk tĕch ăn tơmoi chă tơmang lăng kơna tơdrong arih xa kơ kon pơlei đei tơplih ƀiơ̆.

Kiơ̆ mŏ Hạnh, 1 blăh kơpen tĕch tơ̆ ‘ngoăih đơ̆ng 800 - 1 triu hlak jên, hơbăn hnar đơt 500.000 hlak jên, 1 blăh brông 1.200.000 hlak. ‘Ngoăih kơ vang tanh brai, mŏ Hạnh oei jang lơ̆m Khul pai gŏ păng hơri hơxoang pơvih ăn tơmoi ‘năi: “Tơmoi chă tơmang lăng truh apinh răt ‘nŏh ba tĕch, bu ‘mĕh răt hơbăn ao ‘nŏh năm tơ̆ hnam nhôn năng, vă răt. Grŭp đei 35 ‘nu mŏ oh. Pơtih gia khăn văn hơko inh tĕch 250.000 hlak 1 blăh, tơmam âu đei năng jĭ tơmam OCOP, inh tanh lơ tơmam nai hai vă tĕch ăn đe nhen kơdŭng ƀăk, kơdŭng tăh điên thoăi, tăh ‘long chih, pơma atŭm đei lơ tơmam”.

Đĭ đei dôm jĭt pơlei pơla tơ̆ dôm xăh groi kông lơ̆m plt Đà Nẵng atŏk tơiung trong jang chă tơmang lăng lơ̆m tơpôl, chă tơmang lăng tơ̆ bri brăh, chă tơmang lăng tơ̆ pơlei đei tơdrong jang so. Plt Đã Nẵng đei lơ trong tơgŭm ăn dôm pơlei chă tơmang lăng nhen: Hơtŏk tơdrong jang hơdoi hăm dôm anih tĕch mơdro, công ty chă tơmang lăng, bơngai roi tơƀôh trong chă tơmang lăng, hơtŏk tơdrong roi tơbăt lơ̆m radio, tivi, mang tơpôl vă sơng tơmoi truh, Chă tơmang lăng vang tơgop chă tơdrong jang ăn kon pơlei, pơm hơtŏk iŏk yoa, đei yoa ‘lơ̆ng ăn tơdrong arih, tơjur tơnuh hin kơjăp ‘lơ̆ng.