Sơnăm ou, mă jê̆ 70 sơnăm, kră pơlei K’ Keo hơnơ̆ng yuk hơlou lơ̆m rim tơdrong jang, “Pơma noh jang hloi”. Gah hơtŏk mŭk drăm unh hnam, unh hnam kră pơlei đei 2 ha teh pơtăm kaphê, rim sơnăm đei yua hloh 8 tơ̆n kaphê găr; 8 sao ƀa na 2 pơyan, rim sơnăm đei yua pơhlom 8 tơ̆n ƀa. 'Nguaih kơ noh, unh hnam kră pơlei oei pơtăm hrou dôm hơdrĕch 'long pơtăm nai lơ̆m mir kaphê nhen sâu riêng, măk ka, ƀơr, mit... Gơnơm thoi noh mă unh hnam kră pơlei K’Keo ưh hơdrô̆ “đei tơmam sŏng xa răk 'măn” mă oei tơgŭm kon pơlei lơ̆m thôn. Ƀok ăn tơbăt:  “Hơdrol ki kon pơlei lơ̆m thôn tam mă băt jang kiơ̆ khua hŏk kih thươ̆t lơ̆m choh jang xa, jang ƀa, pơtăm kaphê, tam mă băt chă tuh săi phŏng ou to. Unh hnam ƀok jing bơngai iŏk jang mă blŭng, ah kơdih po unh hnam pơm jang tơnăp đei yua noh kon pơlei truh hŏk hơlen jang kiơ̆, kiơ̆ tơdrong hlôi jang đei, ƀok adoi pơtho ăn kon pơlei, hơpơi 'meh kon pơlei adoi gơh jang nhen kơdih po”.

Thôn Hàng Làng đei 384 unh hnam (mă lơ noh bơngai K’Ho), dang ei oei pă 4 unh hnam hin dơnuh đĕch. Tơdrong hơrih roi năr roi ƀôh tŏk, tơdrong hơrih joh ayŏ kon pơlei roi năr roi tơnăp. Yă Ka’Lèm, oei tơ̆ xah Di Linh ăn tơbăt, gơnơm đei dôm tơdrong tơgop đơ̆ng kră pơlei K’ Keo, thôn Hàng Làng hlôi đei lơ tơplih kăp gĭt: “Kră pơlei K’ Keo jĭ bơngai đei kon pơlei lui yom, đei nơ̆r pơma tơnăp tơ̆ tơring lơ̆m hơtŏk mŭk drăm tơpôl, vei răk tơƀăk mong joh ayŏ juăt jue kơ kon pơlei. Ƀok hơnơ̆ng yuk hơlou lơ̆m tơdrong chă tơroi tơbăt trong tơchơ̆t jang đơ̆ng Đảng, khôi luơ̆t teh đak truh hăm kon pơlei, pơtho kon pơlei băt trong pơm jang đei yua, hơvơn kon pơlei tơguăt tơguăl vei sơđơ̆ng tơpôl hơrih xa tơ̆ tơring”.

Kiơ̆ tơdrong hơvơn đơ̆ng kră pơlei K’ Keo, lơ unh hnam kon pơlei hlôi sut lê̆ dôm khôi kơtul chơdư, atŭm băl pơjing tơdrong hơrih gơh hơgei hloh. Ƀok tơroi: “Atŭm hăm jơnŭm đe kră pơlei bơngai đei kon pơlei lui yom kơ thôn, ƀok hơnơ̆ng tơbăt hăm 'nhŏng oh kơtum kơtŏng, hơvơn kon sou hơdrin hŏk pơhrăm dôm tơdrong 'lơ̆ng, tơdrong 'nao vă hơtŏk tơ-iung, nĕ chă pơm tơdrong kơnê̆ pơrăm pơlei pơla. Oei grăng pran noh ƀok oei jang, tơgop jơhngơ̆m hăm Đảng, Teh đak, atŭm hăm tơring pơtho akhan kơ kon sou pơm thoi yơ vă hơtŏk mŭk drăm unh hnam, vei răk tơƀăk mong joh ayŏ juăt jue kon kông kơdih, thôn pơlei sơđơ̆ng sơnêp sơnua, minh bơnôh kiơ̆ Đảng, kiơ̆ Teh đak". 

Kră pơlei K’ Keo oei jing bơngai hlôh vao hơdah gah joh ayŏ juăt jue kơ kon pơlei K’Ho. Lơ̆m dôm tơdrong akŏm joh ayŏ tơ̆ tơring kon pơlei kon kông tơ̆ Lâm Đồng, ƀok adoi 'nhăk khul ngê̆ nhơ̆n năm akŏm păng đei iŏk jơnei hơpah. Kơdih po ƀok K’ Keo kơtă pơtho 5 lăm tôn chĭng chêng ăn đe hơ-ioh păng đe tơdăm tơ̆ tơring.

Ƀok Phạm Văn Linh, sơ̆ jang kơdră xah Gung Ré, dang ei noh xah Di Linh, dêh char Lâm Đồng ăn tơbăt, kră pơlei K’ Keo hlôi tơgop kăp gĭt lơ̆m tơdrong jang pơjing tơdrong hơrih 'nao kon pơlei kon kông tơ̆ tơring: “Ƀok jĭ bơngai hơbĕch hơbal, gơh pơma xa adoi nhen hơvơn kon pơlei lơ̆m tơdrong jang tơchơ̆t đơ̆ng Đảng păng Teh đak, hơpơi 'meh tơroi pơtho kon pơlei nhen sut lê̆ khôi juăt ưh kơ 'lơ̆ng pă đei trŏ hăm tơdrong hơrih 'nao dah mă iŏk yua dôm tơdrong juăt jue joh ayŏ kơ kon pơlei K’Ho... Kră pơlei  K’Keo jang 'lơ̆ng dôm tơdrong jang ou"