Ƀơ̆t minh pơgê hrôih, pơlei Kon Wang, lơ̆m xah Tân Tiến (apŭng Krông Păc so) kơ dêh char Đăk Lăk, um ai tơring rơnguơ̆ sơđơ̆ng hrou hăm hơ-'nguă plenh noh 'nhui unh đơ̆ng anih têm hơjơ̆m kơ đe 'lŏ kră. Hloh 80 sơnăm, ƀok A Lih adoi oei hăt hot ah tơnuh unh oei khơ̆ng, jơva teng mam păng ngar unh brê.

Mă sơnăm hlôi 'lŏ, măt ƀok A Lih adoi oei bang hơdah, tơpang ti chai kơdăng nhen 'nhik săng mă kơdih po ƀok têm đei lơ̆m dôm jĭt sơnăm kơ ou. Kon pơlei hơnơ̆ng akhan: “Kơtơ̆ng jơva mut mă ƀok A Lih, A Hluh tơteng noh băt vă jê̆ đei săng, tơgăk, 'nhik 'lơ̆ng ăn pơyan jang mir truh ou kơnh!”. Chŏng mă, vă vei răk tơƀăk mong đei tơdrong jang kră sơ̆ lơ̆m tơdrong hơrih hrei ou ưh kơ ƀônh ôh. Ƀok A Lih tơroi: “Sơ̆ ki, oei chă đei mam tơ̆ đak glung. Hrei ou pă đei bơih. 'Meh têm hơjơ̆m noh athei năm răt tơ̆ 'nguaih, kơjă noh kăp. Vă hơjơ̆m đei săng, 'nhik tơgăk mah đĭ minh giĕng noh mă đang, khei năr noh ưh đei năm jang mir ôh. Mă lei kơyuơ băt kơ tơdrong jang noh ưh gơh tŭk lê̆ ôh!”

Rim năr, kon pơlei 'nhăk truh anih têm hơjơ̆m hlak mam gre ô tô so, hlak mam apinh đei, dah mă tơplih hăm ƀa hơƀo, nhŭng, iĕr... Ưh kăl jên, đe sư adoi 'nhăk truh anih têm hơjơ̆m vă têm săng han, 'nhik kơjăp 'lơ̆ng. Yă La Ghi, bơngai Xơ Đăng oei tơ̆ pơlei Kon Wang, ƀrơ̆k kơ jơhngơ̆m tơroi: “Unh hnam inh hơnơ̆ng 'nhăk nhŭng, iĕr truh vă tơplih iŏk săng, tơgăk 'nhik. Dôm tơmam ou kơyuơ ƀok A Lih têm hơjơ̆m noh kơjăp. Mưh hư răm, noh 'nhăk ăn kơ sư ming 'nao dơ̆ng. Inh hơpơi 'meh sư grăng hơkou păng kăp gĭt noh pơtho tơdrong jang têm hơjơ̆m ăn kôn mon kon sou, vă tơdrong jang ou ưh đei lê̆ hiong...”

Tơ̆ pơlei Kon Wang, tơdrong jang têm hơjơ̆m ưh hơdrô̆ tơdrong jang chă jên, mă oei jing pơhngol kơ pơlei pơla. Jơva mut ưh hơdrô̆ tơteng mam, mă oei pơhrăm đon bơnôh, pơhram lơ̆m rim tơmam choh jang. Noh ưh hơdrô̆ jĭ anih pơtho tơdrong jang, mă oei jing anih vei răk tơƀăk mong tơdrong têm hơjơ̆m, anih mă dôm kơjă joh ayŏ đei pơdjoi kiơ̆ kơ rim jơva mam teng, pat han, akŏm pơjing đei um ai joh ayŏ păng tơdrong pơ-ư pơ-ang joh ayŏ kơ kon pơlei Xơ Đăng. Ƀok A Lih tơroi dơ̆ng: “Tơ̆ pơlei ou dang ei oei minh ƀar bơngai đĕch băt têm hơjơ̆m, nhen ƀok Mêp, ƀok Hluh, ƀok Roi Pôa Hlak oei tơ̆ thôn 5. Kon pơlei adoi oei kăl lơ săng, tơgăk, 'nhik vă jơmŭl pơtăm... Dôm tơmam ou tĕch tơ̆ kơchơ adoi lơ, 'lơ̆ng mă lei yua noh ưh đei 'lơ̆ng hơtŏ ôh. Săng mă kơdih po têm hơjơ̆m noh hăp kơjăp 'lơ̆ng. Noh jing tơdrong kăp gĭt kơ tơdrong jang têm hơjơ̆m”

Pơmai La Ghon, bơngai Xơ Đăng tơ̆ pơlei Ea Mao, bơngai juăt răt săng tơgăk kơ anih têm hơjơ̆m ou ăn tơbăt: “Săng têm hơjơ̆m tơ̆ ou noh pah lăp han păng kơjăp. Oei săng răt tơ̆ kơchơ noh hơ̆l, ƀôh tơpĕ pơchah. Inh lui păng tơgĭt kơ dôm tơmam drăm mă kơdih bơngai lơ̆m pơlei pơm tơlĕch”.

Tơdrong têm hơjơ̆m juăt jue jing tơdrong pơ-ư pơ-ang đơ̆ng kră sơ̆ kơ bơngai Xơ Đăng. Mă tơdrong hơrih 'nao hlôi đei lơ tơmam choh jang 'lơ̆ng hloh, mă lei bơngai Xơ Đăng tơ̆ pơlei Kon Wang, xah Tân Tiến (xah Ea Yiêng, apŭng  Krông Pắc so), dêh char Đăk Lăk adoi oei tơguăt hăm tơdrong jang têm hơjơ̆m hăm ti. Kơlih noh jing tơdrong dơnơm kơ trong jang xa. Rim 'măng chhŭt pơgiơ̆ng unh jing 'măng pơdjoi tơdrong tơnŏ ăn tơdrong joh ayŏ kon kông kơdih.

Ah mă nơ̆r mut tơteng re tơ̆ tơring bri kông Kon Wang, ah mă pla unh khơ̆ng lơ̆m tơnuh teh so... lui ngeh, tơdrong juăt jue kơ bơngai Xơ Đăng adoi oei đei pơtoi ling lang, ang bang sơđơ̆ng, nhen kơdih unh chhur lơ̆m plei nuih kơ dôm bơngai jang 'lŏ kră, dôm bơngai jang dim rơnim tŏk bŏk oei vei unh khơ̆ng ăn kon pơlei po kơdih.