Tơ̆ hop akŏm, kơdră chĕp pơgơ̆r dêh char Gia Lai hlôi tơroi tơbăt trong atŏk tơ iung. Mă hơdăh, tơ̆ tơring Hơlĕch Gia Lai (dêh char Bịnh Định so), dêh char akŏm lơ̆m hơnih jang kmăi kmŏk pơm tơlĕch tơmam drăm; hơnih jang tơmang pơhiơ̆; atŏk tơ iung ŭnh hơyuh, hơnih dơnŏk duk păng hơnih tơm logistics.

Găh tơring Pơmơ̆t Gia Lai (Gia Lai so), gô atŏk tơ iung rim tơring choh jang sa să; tơlĕch jang jơnei rim tơdrong jang ŭnh hơyuh kiơ̆ Trong pơprŏ jang ŭnh hơyuh VIII; atŏk tơ iung Hơnih jang Mŭk drăm ‘măng sơlam apŭng plĕnh teh Lệ Thanh, răt tơmơ̆t dôm tơmam drăm đơ̆ng Campuchia vă pơm tơlĕch tơmam drăm, pơjing đei kơjă sơđơ̆ng.

‘Ngoăih hơvơn tơmơ̆t jên jang, Gia Lai jei akŏm dăr lăng, hơmet pơ ‘lơ̆ng tơnap tap ăn rim tơdrong vă jang hiơ hiơ̆ tơlĕch jang, pơm hơtŏk ‘lơ̆ng tơdrong tơmơ̆t jên jang. Ƀok Phạm Anh Tuấn - Kơdră chĕp pơgơ̆r Hơnih vei lăng kon pơlei dêh char Gia Lai tơbăt, trong jang tơmơ̆t jên jang ‘nao tŏk bŏk hơmet pơ ‘lơ̆ng đơ̆ng dêh char truh tơ̆ tơring:“Gia Lai sơkơ̆t hơdăh hơmet pơ ‘lơ̆ng trong jang tơmơ̆t jên jang. Nhôn hlôi pơjao rim trong tơlĕch jang KPI truh tơ̆ tơring, hơnih jang păng 135 tơring, phương. Rim tơring gô iung jang kiơ̆, tơplih ‘nao trong jang vei lăng đơ̆ng dăr lăng tơplih jing iung jang pơvih pơvăn, lăng kon pơlei păng hơnih mnơdro sa jĭ kăl hloh-jĭ tơmoi kăl kơ hơnih bơ̆ jang teh đak. Dêh char xek tơlang kơhret hăm dôm kang ƀô̆ pơm glăi, pơm tơnap tap ăn tơdrong atŏk tơ iung atŭm kơ dêh char păng găn ga tơpôl hơnih mơdro sa. Ĭnh hơmŏ lăng rim hơnih mơdro sa jei kăl iung jang mă ƀlep hloh dơ̆ng ‘noh “pơma tơpă, jang tơpă păng iŏk đei jơnei tơpă”.

Vang năm hop akŏm, Tiến sĩ Trần Du Lịch - Kơdră jang lơ̆m Khul pơchoh trong Bơ̆ jang Jên hu Teh đak akhan, tơdrong jang kơ khul kơdră chĕp pơgơ̆r tơring 2 kâp ‘noh jĭ jơhngơ̆m pran hơvơn đei tơmơ̆t jên jang tơpă. Tơdăh đei jơhngơ̆m pran ou, ưh kơ jor gô đei lơ hơnih mơdro sa gô tơmơ̆t jên jang tơ̆ Gia Lai:“Tơjur thuê̆, ưh kơ thuê̆ groi teh ‘noh kăl hloh, mă lei tơdrong mă kăl hloh mă hơnih mơdro sa ‘meh vă ‘noh khul chĕp pơgơ̆r jĭ hơnih dơ̆ng pang tang măt ăn hơnih mơdro sa. Vă pơm lơ liơ, hơnih mơdro sa năm truh hăm Gia Lai jang sa trŏ ƀlep, ‘lơ̆ng hơ iă, ưh kơ đei tơtăm tơdrong mơmat tat yă kiơ bơih”..

Tơ̆ Hop akŏm, Hơnih vei lăng kon pơlei dêh char Gia Lai hlôi pơjao ăn 69 tơchơ̆t tơdrong bơ̆ jang tơmơ̆t jên jang, hla bơar drơ̆ng nơ̆r apĭnh tơmơ̆t jên jang păng kĭ pơkăp hla bơar ƀlŏk hơdơ̆r jang hơdoi, hăm kon jên tơmơ̆t jang 4 ti 700 triu USD. Lơ̆m ou đei 27 tơdrong vă jang, hăm kon jên tơmơ̆t jang dang 26.400 ti hla jên (hơtŏ 1 ti USD). Lơ̆m ou đei 13 tơdrong vă jang kmăi kmŏk pơm tơlĕch tơmam drăm, 14 tơdrong vă jang trong hnam, hơnih jang kmăi kmŏk pơm tơlĕch tơmam drăm; rim tơdrong vă jang ŭnh hơyuh păng Hnam pơgang.

‘Ngoăih kơ ‘noh, 42 tơdrong vă jang đei kĭ pơkăp ‘moi kiơ̆ kĭ pơkăp hla bơar ƀlŏk hơdơ̆r jang hơdoi tơmơ̆t jên jang, hăm kon jên tơmơ̆t jang hloh 93.400 ti hlak jên (hơtŏ vă jê̆ 3 ti 600 triu USD). ‘Nou jĭ kon jên tơmơ̆t jang tôch hơ iă, tơƀôh hơdăh tơdrong lăng ‘lơ̆ng đơ̆ng khul mơdro sa lơ̆m trong tơlĕch jang atŏk tơ iung kơ dêh char; jĭ hơyak kăl hloh vă tơplih jang sa, pơm hơtŏk jang sa iŏk đei kơjăp, ‘lơ̆ng păng kĕ pơlei. Rim tơdrong vă jang akŏm lơ̆m ŭnh hơyuh; choh jang sa păng rong ka hơdang; atŏk tơ iung bri atŭm hăm rong rơmo, ming man hnam kmăi pơm tơlĕch tơmam drăm- pơm tơlĕch tơmam drăm choh jang sa. Yă Nguyễn Thị Lan Hương - Kơdră chĕp pơgơ̆r Khul vei lăng Kŏng ty Pơm tơlĕch păng Tĕch mơdro tơmam drăm tơ̆ teh đak đe Việt Phúc, hơnih tơmơ̆t jên jang lơ̆m choh jang sa kmăi kmŏk hơgei tơbăt: “Nhôn tơmơ̆t jên jang lơ̆m hơnih vă jang choh jang sa kiơ̆ kmăi kmŏk hơgei tơ̆ Chư̆ Sê. ‘Nou gô jing tơdrong vă jang kăl hloh lơ̆m tơdrong choh jang sa hăm rim hơnih ơng hơdrĕch dơđăh ‘lơ̆ng, hơnih vei răk gen păng hơnih jang kiơ̆ kmăi kmŏk hơgei. ‘Nhôn hơpơi ‘meh vă tơdrong vă jang gô đei jing hơnih tơgoăt rim trong jang kih thuơ̆t gơh hơgei, adoi iung jang yak hơdoi hăm kon pơlei hơnih hơp tak xah păng kon pơlei choh jang sa”.

Hop akŏm pơtrŭt Tơmơ̆t jên jang sơnăm 2025 tơ̆ Gia Lai ưh khan lăp pơ̆ih đei lơ tơdrong rơvơn jang hơdoi hăm kon jên tơmơ̆t jang rơbou ti USD, mă oei sơkơ̆t hơdăh tơdrong hơdrin đơ̆ng dêh char lơ̆m tơ iung pơjing trong tơmơ̆t jên jang tơpăt ‘lơ̆ng, rơvơn păng kơjăp ‘lơ̆ng. Hăm trong pơchoh ăn atŏk tơ iung hơdăh ăn rim tơring, atŭm hăm vang iung jang đơ̆ng khul kơdră chĕp pơgơ̆r tơring ƀar kâp păng khul hơnih mơdrop sa, Gia Lai tŏk bŏk roi năr roi sơkơt hơdăh hơnih dơ̆ng ‘noh hơnih truh ‘lơ̆ng hơ iă, anih akŏm rim khul jang vă atŏk tơ iung mŭk drăm rơgoh ‘lơ̆ng, choh jang sa kmăi kmŏk hơgei, hơnih kmăi kmŏk pơm tơlĕch tơmam drăm păng ŭnh hơyuh. ‘Nou gô jing jơhngơ̆m pran kăl hloh ba Gia Lai đei jing hơnih tơm atŏk tơ iung kăl tŏk mŭk drăm ‘nao lơ̆m tơring Tây Nguyên lơ̆m jăl truh ou kơnh.