Get đak đei pơm đơ̆ng plei plui jĭ minh hơdrĕch đei pơtăm lơ lơ̆m pơgar hnam păng tơ̆ mir kơ bơngai Tây Nguyên. Dôm tơmam drăm đei pơm đơ̆ng get đak ưh hơdrô̆ 'măn yua rim năr mă oei tơguăt hăm tơdrong hơrih kon pơlei kon kông pơma atŭm, kơ bơngai Êđê pơma hơdrô̆. Ah hơdra unh juăt jue, yă H’Luôn Arul (đe oei krao noh Aduôn Y-Khương) tơ̆ pơlei Jung, xah Êa Ktur, dêh char Đăk Lăk ăn tơbăt, vă gơh đei minh pôm get đak 'lơ̆ng păng keh kong noh mah đĭ minh ƀar khei: “Hơdrol ki plui đei pơtăm lơ lơ̆m pơgar hnam, tơ̆ mir ƀa. Plei pơda noh đe 'măn pai xa, dôm plei kră noh đe iŏk đĭ găr lơ̆m lăm vă pơm get đak, get đak đei tong lơ̆m trôk dah mă 'măn ah hơdra unh lơ̆m minh ƀar giĕng vă kơ plui kro. Pơm thoi noh plui jing găm dah mă gôh, kơđoh hơrăng, kơjăp, kơmot ưh đei xa, ưh đei hrơm lĕch đak”

Get đak 'măn yua lơ tơdrong lơ̆m hơrih xa kơ bơngai Êđê. Get sŏ đak nhă, 'măn găr hơdrĕch ah năm jang tơ̆ mir, pơm tơmam pai tơyông... Get đak gơh chă pơm bơ̆n đing hlôm kră sơ̆ nhen đing năm, tĭng nĭng... Tơdrong tơguăt đơ̆ng get hăm pơle, kram, sal xut hlôi pơjing đei tơmam pơre tơdra 'lơ̆ng hiôk, mơ̆ng vơch kơ đon.

Atŭm hăm 'măn yua lơ̆m rim năr, get đak kro oei 'măn ăn tơdrong akŏm et xa kră sơ̆, dôm tơdrong et xa gĭt kơ kon pơlei Êđê nhen et soi hơdrơ̆m đak, et soi apinh đak 'mi, et soi kơ jơhngơ̆m jăn... 'Nhŏng Y Tuel Niê (đe hơnơ̆ng krao Ama Kain), oei tơ̆ pơlei Alê B, phương Êa Kao, dêh char Đăk Lăk tơroi: “Hrei ou mă tơdrong hơrih đei lơ tơplih, mă lei inh chơt hơ-iă kơlih pơlei pơla adoi oei răk vei păng pơm kiơ̆ khôi juăt sơ̆ ki. Păng lơ̆m dôm tơdrong et xa đei pơgơ̆r, inh ƀôh get đak jĭ minh tơmam ưh gơh kơƀah lơ̆m dôm tơmam drăm plang ăn kơ yang hơpang”

Mă tơdrong hơrih tơ̆ lơ pơlei pơla kon pơlei Tây Nguyên hrei ou hlôi đei lơ tơplih, chŏng mă dôm kơjă kăp gĭt kơ get đak adoi oei nhen so đĕch. Lơ unh hnam bơngai Êđê adoi oei rei pơtăm, răk găr plui đơ̆ng chăl bơngai ou truh hnưr kôn mon kon sou ƀlŏk hơdơ̆r kơ tơm a la chă kon pơlei pơla hơrih tơguăt hăm cham char plenh teh. Get đak oei jing tơmam pôk ăn tơmoi đơ̆ng rim tơring nai truh hăm tơring teh Tây Nguyên tŏ 'mi kial, vă tơƀôh tơdrong tơgĭt yom kơ kon bơngai tơ̆ tơring ou.