Kơnôk jĭ hơdrĕch 'long đei kơdih lơ̆m cham char. Plei kơnôk (dah mă krao kiơ̆ nơ̆r yuăn noh plei núc nắc) đei um tăng plat, kơjung dang 1m, đei kơmou jơk păng hơnơ̆ng lĕch plei ah tŏng sơdrai tơm. Mă kăl, pơkao, tơ-'mơ̆ng păng plei kơnôk adoi đei bơngai Tây Nguyên iŏk pai pơjing tơmam xa. Lơ̆m noh, plei kơnôk gơh pai pơjing lơ tơmam xa 'lơ̆ng nhen lŭk lơ̆k rơba, pai hăm 'nhĕm, pai hăm ka dah mă ơ̆p chŭ ƀoh hơmrĕ, xa hăm măm tôm dah mă peh hăm pro tăng. Kơnôk tăng lŭk lơ̆k hăm ƀoh, hăng hơmrĕ, pơjing tơdrong 'lơ̆ng ưh kĕ hiơt hăm dôm bơngai đei xa 'nhot mă ou.  

Pơmai H’Trich Niê, oei tơ̆ pơlei Êbŭng, xah Êa Ktur, dêh char Đăk Lăk tơroi, plei kơnôk jĭ tơmam xa hlôi tơguăt hăm tơdrong hơrih pơmai đơ̆ng 'lơ̆p: “Hơdrol ki, rim 'măng năm tơ̆ mir hăm yă păng mĕ inh, đe sư hơnơ̆ng pĕ 'nhăk brŏk pai pơjing, đei năr xa hăm ƀoh hơmrĕ, đei năr xa hăm măm tôm, minh tơmam xa ƀônh păng ƀăt kơ ƀơ̆r. Inh hơdơ̆r ling lang tơdrong tăng hrou hơdoi hăm 'ngam noh”

Đơ̆ng rŏng kơ pĕ plei kơnôk noh đe ƀuh ah ngar unh khoi iơ iă ah kơđoh vă kơ hăp da ƀiơ̆ kơ tăng păng plei gơh ƀou phu hloh. Đang kơ noh kôih kơđoh khoi hăm săng, ôp hăm đak păng chet klat hơtăng. Kiơ̆ kơ tơdrong lăp păng juăt pai xa, rim bơngai gô đei trong pai pơjing phara băl.

Pơmai H’Sily Ayŭn, oei tơ̆ pơlei Čuôr Dăng, xah Čuôr Dăng ăn tơbăt, kăl đei 1- 2 tŏ plei kơnôk noh đei minh siĕr 'nhot rơba 'lơ̆ng bơih: “Đơ̆ng rŏng kơ pai pơjing, chet hơtăng plei kơnôk, lŭk lơ̆k hăm ka kro hơna, ka ƀuh dah mă 'nhĕm rơmo, 'nhĕm nhŭng... tah ƀoh ƀôk ngok 'nhot hla ƀou păng hơmrĕ lŭk lơ̆k noh gơh xa bơih. Plei kơnôk tăng, 'ngam atŭm hăm hăng hơmrĕ, rơmă đơ̆ng ka, 'nhĕm; ƀou phu đơ̆ng hla ƀou, pơjing đei minh tơmam xa 'lơ̆ng hloh”

Ưh hơdrô̆ jĭ tơmam xa hmă đĕch ôh, mă lơ̆m dôm tơdrong et xa gĭt, kon pơlei Êđê hơnơ̆ng pai pơjing lơ tơmam xa 'lơ̆ng đơ̆ng plei kơnôk vă jong ăn tơmoi, nhen minh nơ̆r hơvơn 'nhĕm lăng tơdrong ƀou phu 'lơ̆ng kơ bri kông. 'Nhŏng Y- Suyên Bkrông, oei tơ̆ xah Êa HNing ăn tơbăt: “Hrei ou, mă đei lơ 'nhot xa 'nao 'lơ̆ng, mă lei kon pơlei Êđê adoi oei juăt pai pơjing 'nhot xa đơ̆ng plei kơnôk. Păng lơ̆m et jur xa ƀa 'nao kơ unh hnam inh, inh hlôi pai pơjing tơmam xa đơ̆ng plei kơnôk hăm 'nhĕm nhŭng rơba dih băl vă jong ăn 'nhŏng oh, vă rim bơngai hơdơ̆r ling lang kơ tơdrong 'lơ̆ng đơ̆ng bri kông Tây Nguyên bơ̆n dou”

Gơnơm đei tơdrong gơh hơgei chă pai pơjing, bơngai Êđê hlôi pai pơjing plei kơnôk jing dôm tơmam xa 'lơ̆ng ăn jơhngơ̆m jăn. Hăm tơmoi, xa dôm tơmam xa đei pai pơjing đơ̆ng plei kơnôk jing tơdrong hơlen băt đei tơdrong 'lơ̆ng đơ̆ng đon bơnôh kon pơlei tơring bri kông, tơgop pơm pơ-'lơ̆ng tơmam drăm xa tơring Tây Nguyên.