Khei ‘năr âu ki, dêh char Khánh Hòa đei lơ tơplih rơđăh ‘lơ̆ng lơ̆m tơdrong vang yak hơdai hăm anih mơdro sa, pơm tơdrong hiôk ‘lơ̆ng pơtrŭt hơtŏk tơiung mŭk drăm - tơpôl. ‘Nhŏng Lê Thanh Vân, Phŏ Kơdră vei lăng Kŏng ti MiwaVina (Hơnih jang kơmăy kơmŏk Suối Dầu, xăh Suối Dầu) tơroi, anih mơdro sa ‘nao đei Anih vei lăng Tơring jang Mŭk drăm, Tơring jang kơmăy kơmŏk dêh char Khánh Hòa tơgŭm hơmet ming hla ar asong ăn tơmơ̆t jên jang pơih să Hơnih jang tôch kơ hrĕnh, pơm hla ar lăp hiong 5 năr:

“Anih mơdro sa kơ nhôn ‘noh anih mơdro sa păh lăp păng iĕ, 100% jên teh đak đe. Anih vei lăng dăh mă dôm anih jang kơpal, anih jang ling lang vang yak hơdai, pơtho pơm bơ̆n hla ar 1 trong hrĕnh, ƀlep tơdrong hơgăt khôi luơ̆t. ‘Nâu jĭ tơdrong tơm tôch kơ gĭt kăl, pơm tơdrong ‘lơ̆ng vă rim anih tơmơ̆t jên jang ‘nao bơngơ̆t truh hloh”.

Hơmet ming hla ar bơ̆jang tơ̆ Anih vei lăng Tơring jang mŭk drăm, Tơring jang Kơmăy kơmŏk dêh char đei dôm anih mơdro sa lơ̆m păng ‘ngoăih teh đak lăng tôch kơ ‘lơ̆ng. Ƀok Lê Hồng Phương, Phŏ Kơdră Anih vei lăng Tơring jang mŭk drăm, Tơring jang Kơmăy kơmŏk dêh char Khánh Hòa roi tơbăt, pơm hơmet ming hla ar asong ăn tơmơ̆t jên jang đei tơjur ƀiơ̆ năr pơm đơ̆ng 10 năr jur oei pă 5 năr, vă jê̆ truh, hơdrin oei pă 3 năr.

“Nhôn tơgŭm hơdrol ăn dôm bơngai tơmơ̆t jên jang lơ̆m tơring jang mŭk drăm akŏm, mă loi ‘noh jĭ dôm bơngai tơmơ̆t jên jang lơ̆m tơring jang kơmăy kơmŏk vă hla ar pơm kiơ̆ ƀlep tơdrong lăp dang 10 năr dang ei oei pă 5 năr, hrĕnh hloh tôch ai, nhôn gô tơ jur 3 năr. Gĭt kăl hloh ‘noh jĭ mưh anih mơdro sa nôp hla ar hô sơ, Anih jang athei dăr hơlen păng pơtho tơtom vă anih mơdro sa chih pơkeh, tơmơ̆t dơ̆ng, vei sơđơ̆ng hla ar hô sơ đei ‘lơ̆ng”.

Dêh char Khánh Hòa tŭn pran hơtŏk tơiung ŭnh hơyuh rơgoh, yak truh tơ jur pơmơ̆ng lơ̆m ŭnh hơyuh tơmo, vei sơđơ̆ng ŭnh hơyuh teh đak păng hơtŏk tơiung mŭk drăm rơgoh, kơjăp. Truh khei 6/2025, Khánh Hòa hlôi đei 57 tơdrong jang ŭnh hơyuh rơgoh hăm akŏm kŏng suơ̆t vă jê̆ 3.750 MW, ‘noh đei ŭnh điên kial, ŭnh điên măt ‘năr, ŭnh điên đak păng ŭnh điên măt ‘năr pơbŭng hnam, đei vă jê̆ 7% kơsô̆ ŭnh điên rơgoh lơ̆m teh đak. Mă loi ‘noh jĭ, tơring păih Tu dêh char hơtŏk tơiung pran dôm tơdrong jang tih nhen Hnam kơmăy Nhiệt điện BOT Vân Phong 1 hăm kŏng suơ̆t 1.320 MW, tơgop dang 3% kơsô̆ ŭnh điên teh đak. Tơ tơring păih Pơbăh, dôm grŭp jang tih nhen BIM, Trung Nam hlôi tơmơ̆t jên jang rơbâu ti hlak jên lơ̆m tơdrong jang ŭnh điên măt ‘năr, ŭnh điên kial hơdai hăm pơm tơlĕch ƀoh rơgoh.

Dêh char Khánh Hòa băt hơdăh ŭnh hơyuh ‘noh jĭ 1 lơ̆m 4 tơdrong tơm jang tŏk, tơlĕch tơdrong hơgăt jing hơnih ŭnh hơyuh teh đak hăm akŏm kŏng suơ̆t tơchĕng hơdrol 14.000 MW lơ̆m sơnăm 2030, ‘noh đei ŭnh điên măt ‘năr, ŭnh điên kial, ŭnh điên hơyuh păng ŭnh điên hạt nhân. Dêh char tŏk bŏk tŭn hrĕnh dôm tơdrong jang tơm nhen Hnam kơmăy ŭnh điên hạt nhân Ninh Thuận, ŭnh điên đak Bác Ái, LNG Cà Ná… Hơdai hăm akŏm jang pơkeh trong tơley ŭnh điên, tơlĕch ăn trong jang tơgŭm sơng iŏk tơmơ̆t jên jang, krao hơvơn tơdrong drơ̆ng lăp đơ̆ng kon pơlei vă bơ̆jang kiơ̆ ‘lơ̆ng tơdrong hơgăt hơtŏk tơiung ŭnh hơyuh rơgoh, kơjăp.

Ƀok Hồ Xuân Ninh, Kơdră Anih vei lăng găh Kơmăy kơmŏk, mơdro sa dêh char Khánh Hòa roi tơbăt, ŭnh hơyuh sơđơ̆ng ưh khan lăp tơgop iŏk yua ăn jên jang teh đak mă oei pơm tơdrong ‘lơ̆ng vă tơring krao hơvơn tơmơ̆t jên jang dôm tơdrong jang pơm tơlĕch kơmăy kơmŏk ‘nao:

“Kăl kơ tơlĕch ăn tơdrong hơgăt rơih iŏk tơgŭm hơdrol dôm tơdrong jang đei kơjă tŏk lơ, kơmăy kơmŏk hơgei, ‘lơ̆ng hăm cham char, tơmam đei kơsô̆ khoa hŏk - kơmăy kơmŏk ‘nao, tơgop pơm hơtŏk iŏk yua jên jang teh đak. Tơring jang kơmăy kơmŏk nhen Dốc Nắng, Trảng É, dăh mă Cà Ná 1 kŭm hlôi rơih iŏk đei dôm bơngai tơmơ̆t jên jang đei trong tơlĕch jang tơmơ̆t jên pơm anih jang kăl hrơ̆ch, tơ tĕnh sơng đei lơ tơdrong jang kăl”.

Anih jang gĭt kăl đei tơmơ̆t jên jang, hơnih tơmơ̆t jên jang tơplih ‘lơ̆ng; kơmăy kơmŏk pơm tơlĕch, ŭnh hơyuh rơgoh, tơmang lăng pơvih pơvăn tơiung ming hrĕnh ‘noh jĭ tơdrong ‘lơ̆ng vă Khánh Hòa tŏk hrĕnh hơtŏk tơiung mŭk drăm, hơtŏk ‘lơ̆ng tơdrong hơrih sa kon pơlei. Đơ̆ng rŏng tơmơ̆t hơdai dêh char, pơih să hơnih hơtŏk tơiung, Khánh Hòa hơnơ̆ng tơlĕch ăn tơdrong hơgăt truh sơnăm 2030 jing pơlei tơm găh Trung ương, mŭk drăm tŏk 12% 1 sơnăm, iŏk yua jô̆ păh lăp tŏk 14% 1 sơnăm. Ƀok Trần Quốc Nam, Kơdră Anih vei lăng kon pơlei dêh char Khánh Hòa roi tơbăt: 

“Đảng bộ, Anih vei lăng kon pơlei dêh char băt hơdăh, hơmet ‘lơ̆ng dôm hơnih tơhlăk tih găh trong jang tơgŭm păng anih jang kăl, mă loi ‘noh jĭ dôm tơdrong jang oei đei; akŏm hơtŏk tơiung hrơ̆ch trong nơnăm păng anih jang kăl tơring jang kơmăy kơmŏk, pơm tơdrong ‘lơ̆ng tŏk hrĕnh ‘nao. Pơtrŭt hơtŏk tơiung 4 tơdrong jang tơm tŏk ‘noh đei kơmăy kơmŏk - ŭnh hơyuh, tơmang lăng - pơvih pơvăn păng anih kơdrơ̆m ‘nao; tŭn hrĕnh tơdrong jang tơplih kơsô̆, yak truh tơdrong hơgăt mŭk drăm kơsô̆ đei 1/3 akŏm tơmam lơ̆m sơnăm 2030”.