Vang năm đei kơdră tang măt ăn Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆; rim bơngai joăt jang, bơngai tơchĕng hơlen tơdrong oei sa joh ayŏ atŭm hăm kơdrơ̆m kon pơlei tơring đei ƀôh Chĭng tơmo Đắk Sơn. Chĭng tơmo Đăk Sơn đei ƀôh lơ̆m sơnăm 2014 tơ̆ tơring Nam Xuân, apŭng Krông Nô, dêh char Dak Nông so (dang ei ‘noh tơring Dak Săk, dêh char Lâm Đồng), đei 16 tŏ tơmo re phara dih băl, lơ̆m ou đei 11 tŏ re hơđăl păng 5 tŏ prĕo ƀiơ̆ ‘nou jĭ tơmam gĭt kăl lơ̆m tơdrong jang tơchă mŭk drăm kră sơ̆, tơdrong joh ayŏ păng chăl sơnăm hơrih. Chĭng tơmo Đăk Sơn ‘noh tơmam tôn kră sơ̆, tơƀôh hơdăh tơdrong hơrih sa kơ kon pơlei kră sơ̆, sơkơ̆t hơdăh găh tơm a la chă groi teh sơ̆ ki kơ tơring Tây Nguyên. Iung pơma tơ̆ pơm lêh, tang măt ăn Khul sir tơchă mŭk drăm kră sơ̆ Việt Nam, PGS.TS Bùi Văn Liêm, Kơ iĕng Kơdră chĕp pơgơ̆r Khul sir tơchă mŭk drăm kră sơ̆ Việt Nam, Kơdră jang lơ̆m Jơnŭm vei lăng Mŭk drăm joh ayŏ Teh đak sơkơ̆t hơdăh, Lâm Đồng jing groi teh gĭt kăl, akŏm đei lơ tơdrong oei sa ‘lơ̆ng rŏ, adoi akŏm đei chăl sơnăm sot-hơrih sa joh ayŏ đunh đai tai sơnăm hăm lơ hơnih sir tơchă mŭk drăm kră sơ̆, hơnih tơmang pơhiơ̆ ‘lơ̆ng liĕm, hơnih oei sa kơ lơ hơdrĕch hơdrung.