Tơ̆ tơring Khánh Sơn, tơring groi kông găh pơmơ̆t Khánh Hòa, hơtăih đơ̆ng hơnih kơdrơ̆m dêh char hloh 120km, groi teh să, bri kông tăp dăr, pơlei pơla răh rap hơtăih dih băl. Sơ̆, tơdrong dăr lăng tơdrong bơ̆ jang tơ̆ tơring jĭ tơƀơ̆p tôch tơnap tap. Dang ei, rim pơgê kơ bơngai kang ƀô̆ ‘noh plôih kmăi tĭnh, chih tơmơ̆t lơ̆m phân mêm Kơsô̆ hơlen bơ̆ jang ‘lơ̆ng - KPI. Tơ̆ kmăi tĭnh đei ƀôh hloi rim tơdrong bơ̆ jang: Sơng kon pơlei, pơm hla bơar, xek tơlang dôm tơdrong kăl. Hơtuch năr jang, ưh kơ ngê̆ đe chă tơƀlŏk ăn, rim bơngai chih tơbăt kơdih bơ̆n jang keh đang dang yơ, chih tơbăt dôm tơdrong đei ƀôh ‘nao. Jĭ phân mêm hlôi jing “bơngai hơlen lăng”, tơgŭm ăn kơdră chĕp pơgơ̆r băt hơdăh dôm tơdrong jang keh đang dang yơ mă đơ̆ng tơring hơtăih yăih, adoi pơjing ăn bơngai kang ƀô̆ joăt iung jang, lăng kơdih jang keh đang dang yơ. Mŏ Nguyễn Thị Hà, bơngai bơ̆ jang lơ̆m Hơnih bơ̆ jang Tơ iung pơjing Đảng tơring Khánh Sơn, tơbăt, ‘nou jing tơdrong joăt ‘nao đei iung jang kiơ̆ đơ̆ng khei 4/2025, mưh dêh char pơlăp áp KPI ăn rim tơdrong bơ̆ jang, păng trong jang hle ou tơgŭm ăn mŏ kơchăng hloh dơ̆ng:“Jang kiơ̆ KPI nhôn bôh jĭ tôch trŏ lăp. Dôm tơdrong jang đei bơ̆ jang keh đang tơtom, ưh kơ klui. Bơ̆n băt kơdih bơ̆n jang keh đang tơdrong jang bơ̆n dang yơ, pơm keh đang hla bơar dang yơ, chĕp pơgơ̆r keh đang dang yơ ... adoi, pơtêng tơdrong jang mơmat tat dăh mă tŏ sĕt pơtêng hăm bơngai anai. Hơlen trŏ ƀlep hloh tơdrong jang bơ̆n iung jang keh đang dang yơ ‘moi kiơ̆ kơdră chĕp pơgơ̆r chơ̆m điêm”.

Grŭp KPI kơ dêh char Khánh Hòa đei pơjing tôch trŏ lăp, tơlĕch jang kiơ̆ đơ̆ng khul bơ̆ jang truh kơdră chĕp pơgơ̆r. Ưh khan lăp hơdrô̆ tơ̆ tơring, lơ hơnih bơ̆ jang pơchoh trong păng hơnih bơ̆ jang kơ dêh char jei jang kiơ̆ KPI. Ƀok Nguyễn Minh Tuấn, Kơ iĕng Kơdră chĕp pơgơr Hơnih bơ̆ jang Atŏk tơ iung hơgăt teh jang dêh char sơkơ̆t hơdăh, KPI hlôi tơgŭm ăn hơdăh jang hơlen băt hơdăh bơ̆ jang keh đang dang yơ, pơm kơnăl ăn sơđơ̆ng kon jên bơ̆ jang kơ hơnih jang:“Tơdăh ưh kơbăt hơdăh tơdrong jang keh đang dang yơ lei kang ƀô̆ tơroi tơbăt tơdrong jang lơ mă lei bơ̆ jang ưh kơ gan keh đang. Tơnap mă vei lăng kơjăp năr jang păng jên khei, tơdrong bơ̆ jang đunh khei ‘năr, bơ̆ jang kla ăn kon jên khei ăn bơngai jang sa roi tơnap tap hloh dơ̆ng”.

Vă iung jang ‘lơ̆ng trong hơlen lăng bơngai kang ƀô̆ păng bơ̆ jang ‘lơ̆ng dang yơ ‘moi kiơ̆ KPI, dêh char Khánh Hoà hlôi pơjing Khul bơ̆ jang KPI, rơih dôm kang ƀô̆ bơ̆ jang gơ̆h, bơ̆ jang hơnơ̆ng kiơ̆ kơ giĕng. Ƀĭ thư Đảng dêh char Khánh Hoà - ƀok Nghiêm Xuân Thành chĕp pơgơ̆r hop akom hơlen hơdăh. Lơ̆m 5 khei jang kiơ̆ đei ƀôh KPI tơgŭm ăn băt hơdăh tơdrong jang keh đang dang yơ, atŭm hăm trong pơjao tơdrong jang păng tơdrong jang tơnap. Bơ̆ jang tĕnh, keh đang ƀlep jơ ‘năr pơkă ‘noh ăn điêm; jang keh đang klui ‘noh tơjur điêm. Yă Võ Thị Thu Hương, Kơ iĕng Kơdră Hơnih bơ̆ jang Vei lăng Hơnih jang Mŭk drăm păng Hơnih jang Kmăi kmŏk pơm tơlĕch tơmam drăm, bơngai vang jang lơ̆m Khul bơ̆ jang KPI, tơbăt:“Jơ ‘năr jang găh tơdrong jang đei sơkơ̆t hơdăh hăm tơdrong jang, atŭm hăm pơkă hơdăh jang keh đang dang yơ. Jang keh đang hrôih ‘noh đei ăn điêm, hơdrơ̆k dơ̆ng keh đang klui ‘noh tơjur điêm. Tơdrong jang mơmat tat đei tơchơ̆t hơdăh tơdrong jang tơnap đơ̆ng 1 truh tơ̆ lơ. Đơ̆ng noh, điêm KPI kơ rim bơngai kang ƀô̆ gô đei chih akŏm kiơ̆ khei, kiơ̆ jăl jang, kiơ̆ sơnăm, gô mơ̆ng kiơ̆ kơdră chĕp pơgơ̆r pơjao ăn”.

Đơ̆ng chă tơtăm ‘măng blŭng ‘noh kăl “chih tơmơ̆t lơ tơdrong” lơ kang ƀô̆ tơ̆ Khánh Hòa roi năr lăng KPI nhen “găr pơgang bek rim năr”, tơgŭm ăn vei lăng kơdih kou ‘lơ̆ng hơ iă hloh. Ƀok Phạm Quốc Hoàn, Kơdră chĕp pơgơ̆r Hơnih bơ̆ jang vei lăng bơ̆ jang Khoa hŏk păng Kmăi kmŏk dêh char akhan, đei KPI, chĕp pơgơ̆r ƀônh hloh tơƀôh hơdăh tơdrong jang ‘lơ̆ng-jang ưh kơ ‘lơ̆ng kơ rim bơngai lơ̆m tơdrong bơ̆ jang.“Hê̆ thŏng e- Office dang ei đei kai tơmơ̆t vei lăng KPI ou bơih, kmăi kmŏk chih tơbăt hơdăh dôm tơdrong jang keh đang lơ liơ kơ rim bơngai bơ̆ jang. Dôm tơdrong jang keh đang dang yơ đei chih tơbăt hơdăh lơ̆m phân mêm. Ưh kơ đei yă kiơ mơmat tat lơ̆m tơlĕch jang kiơ̆”.

Tơdrong hơlen tơbăt hăm KPI tơgŭm ăn kơdră chĕp pơgơ̆r, bơngai kang ƀô̆ bơ̆ jang tơnăp hloh, chĕp pơgơ̆r rơvơn hloh mưh tơchơ̆t hơdăh tơdrong jang ‘lơ̆ng kơnê̆ lơ liơ. Sơ̆, nơ̆r tơchơ̆t “jang keh đang tơdrong jang” ‘noh tơdrong joăt chă pơma. Dang ei, rim bơngai đei kơdih găh kơsô̆ điêm, kơsô̆ jơ bơ̆ jang păng dôm hô sơ jang keh đang lơ liơ kơna tơdrong “ ‘lơ̆ng” đei ƀôh hơdăh.

Đơ̆ng Khánh Hòa, jơhngơ̆m đon tơplih ‘nao hlôi yak ƀlep hăm trong tơlĕch jang đơ̆ng Trung ương. Ƀơ̆t tŏk bŏk khei 7, Hơnih bơ̆ jang tơlĕch trong jang-Jang kăl Trung ương tơlĕch tơdrong pơkăp KPI, pơ̆ih đei trong lang să bơ̆ jang chĕp pơgơ̆r ‘lơ̆ng lơ̆m khul jang chinh trĭ, tơlĕch jang kiơ̆ đơ̆ng năr 1/1/2026. Ƀok Trần Lưu Quang, Bí thư Trung ương Đảng, Kơdră so Hơnih bơ̆ jang tơlĕch trong jang-Jang kăl Trung ương, Ƀĭ thư Đảng pơlei tơm Hồ Chí Minh mưh bơ̆ jang hăm dêh char Khánh Hòa sơkơ̆t hơdăh:“ ‘Nou jĭ trong bơ̆ jang ưh khan dêh char ayơ jei đei ngăl ôh. Bơ̆n hlôi tơchăr đei trong pơkăp hơdăh. Sơ̆, bơ̆n chă hơlen tơdrong bơ̆ jang kiơ̆ mơ̆ng kơ vă, hăm dôm nơ̆r pơma ưh kơ gan hơdăh nhen “hơdrin kơtang”, “atŏk kơtang”. ‘Măng mă ou, dêh char hlôi kơrŭn đĭ ai tơplih ‘nao, tơƀôh hơdăh tơdrong hơlen tơdrong bơ̆ jang kơ rim bơngai kang ƀô̆ ‘lơ̆ng kơnê̆ lơ liơ. Khul kơdră chĕp pơgơ̆r dêh char hlôi drơ̆ng mĭnh jơhngơ̆m đon kơtang, lăp hơpơi ‘meh vă tơdrong lăp đon dih băl kơtang ou đei lang să truh tơ̆ tơring, tơdăh kĕ iung jang kiơ̆ lei bơ̆n gô iok đei jơnei tih tên hloh.”