Kiơ̆ hla bơar chih tơbăt bơ̆ jang tơbăt ăn Hop akŏm tih, 5 sơnăm ou ki, Đang ƀô̆ dêh char Quảng Ngãi păng dêh char Kon Tum hơdrol ou ki hlôi chĕp pơgơ̆r kon pơlei kơrŭn jơhngơ̆m hơdrin, iŏk đei jơnei kăl păng tôm tong pơ đĭ chinh trĭ, mŭk drăm, oei sa, tơpôl, vei lăng teh đak păng sơđơ̆ng tơring. Hăm tơdrong jang tơ iung pơjing Đảng păng khul jang chinh trĭ, Đảng ƀô̆ dêh char hlôi akŏm pơrô̆ jang kiơ̆ jơnei rim tơdrong tơchơ̆t đơ̆ng Trung ương păng kơ Hơnih Đảng dêh char, jang kiơ̆ keh đang ‘lơ̆ng proh hơmet khul bơ̆ jang, tơ iung pơjing khul kang ƀô̆, tơ iung pơjing hơnih Đảng tơring pran kơjăp iăp kơtang, đei lơ trong jang hle, trong jang hơ iă, jơnei lơ̆m bơ̆ jang tơ iung pơjing Đảng.

Lơ̆m tơdrong jang muk drăm-tơpôl, dêh char Quảng Ngãi hlôi jang keh đang păng keh đang hloh trong tơlĕch ăn, tŏk muk drăm jô̆ hơtŏ đei 7,3 % lơ̆m sơnăm, dơ̆ng mă 10/34 dêh char, pơlei tơm. Thuê̆ ăn hơnih mong jên bơ̆ jang teh đak lơ hloh trong tơlĕch ăn, lơ̆m 5 sơnăm iŏk đei hloh 165.000 ti hlak jên. Dêh char hlôi jang keh đang Tơdrong jang xut xa hnam pơgia, hnam hnăt hnot hăm đei hloh 9.000 pơbŭng hnam. Bơ̆ jang tơ jur dơnuh đei tơlech jang hrơ̆p mĭnh ‘măng, tơjur đei 2,17%/sơnăm; lơ̆m ou tơring groi kông tơjur 4,64%/sơnăm.

Hop akŏm sơkơ̆t hơdăh, hơdrin truh sơnăm 2030, Quảng Ngãi jing dêh char atŏk tơ iung ‘lơ̆ng, đei jing mĭnh dêi char tŏk mŭk drăm gĭt kăl hloh tơring Tŏk bŏk - Tây Nguyên. Lơ̆m ou, hơdrin tŏk tơmam drăm lơ̆m dêh char (GRDP) jô̆ hơtŏ jăl jang 2026 - 2030 iŏk đei đơ̆ng 10% lơ̆m sơnăm năm tơ̆ lơ. Truh sơnăm 2030, GRDP jô̆ hơtŏ măt bơngai dang 6.900 - 7.000 USD. Truh sơnăm 2030, hơdrin pă đei ŭnh hnam dơnuh. Hla bơar chih tơbăt bơ̆ jang chinh trĭ pơtruh ăn Hop akom tih kơdră tang măt Đảng ƀô̆ dêh char ‘măng mă I, jăl jang 2025-2030 sơkơ̆t hơdăh 5 tơdrong jang tơm păng 3 tơdrong jang tŏk kơtang.

Yă Bùi Thị Quỳnh Vân, Ƀĭ thư Đảng dêh char Quảng Ngãi sơkơ̆t hơdăh: Hop akŏm Đang ƀô̆ dêh char ‘noh Hop akŏm kơ jơhngơ̆m đon lui, trong jang ‘lơ̆ng păng iung jang:“Ưh kơ đĭ lăp jơhngơ̆m hăm dôm tơdrong hlôi iŏk đei, Đang ƀô̆ dêh char ling lang pơngơ̆t găh nơ̆r pơma: Quảng Ngãi tŏk bŏk dơ̆ng bơ̆t yơ pơtêng hăm rim dêh char anai lơ̆m teh đak?Lăng kơjăp, hơlen tơpăt găh tơdrong atŏk tơ iung hrei ou kơ dêh char Quảng Ngãi hlôi tơgăl hăm dôm tơdrong đei, hlôi jang ‘lơ̆ng hăm rim trong iung jang? Tơdrong hơrih sa pơđĭ jang sa iŏk đei, tơdrong hơrih sa ‘lơ̆ng hăm đei tơpă tơ̆ rim răih kon pơlei dăh mă lơ liơ? Đơ̆ng noh hơlen brĕ, jang kiơ̆ kơtang dôm tơdrong hlôi iŏk đei; sơkơ̆t hơdăh trong jang, tơdrong jang, dôm tơdrong tơchơ̆t kăl tơgŭm ăn Quảng Ngãi atŏk tơ iung.”

Iung pơma tơ̆ Hop akŏm, Kơdră jang lơ̆m Hơnih tơm Chinh trĭ, Kơ iĕng Thủ tướng Teh đak Nguyễn Hòa Bình hôn bơnê dôm tơdrong hơdrin đơ̆ng Đang ƀô̆, khul kơdră păng kon pơlei Quảng Ngãi jăl jang ou ki,  pơma tơbăt hơdăh dôm tơdrong jang tim mă ‘lơ̆ng kăl hơmet pơ ‘lơ̆ng.

Găh bơ̆ jang tơ iung pơjing Đảng, Kơ iĕng Thủ tướng pơma hơdăh, kăl lăng tơ iung pơjing Đang ƀô̆ păng khul jang chinh trĭ rơngoh ‘lơ̆ng, pran kơtang ‘noh tơdrong jang kăl hloh; mă kăl lăng kơjăp tơ iung pơjing khul kang ƀô̆ bơ̆ jang gơ̆h jơgei đei jơhngơ̆m đon ‘lơ̆ng.

Găh tơdrong atŏk tơ iung mŭk drăm-tơpôl jăl truh ou kơnh dêh char Quảng Ngãi, Kơ iĕng Thủ tướng Nguyễn Hòa Bình athei dêh char pơchoh trong atŏk tơ iung hơnih jang kmăi kmŏk pơm tơlĕch tơmam drăm kiơ̆ trong kmăi kmŏk hơgei, iŏk Hơnih jang mŭk drăm Dung Quất pơm hơnih jang kăl hloh; pơtrŭt kơtang tơgoăt jang hơdoi hăm Hơnih jang mŭk drăm Chu Lai vă pơjing mĭnh hơnih tơm jang kmăi kmŏk pơm tơlĕch tơmam drăm tơm kăl kơ teh đak. Găh tơmang pơhiơ̆, dêh char kăl pơjing đei tơmam drăm kăl, tơgoăt đei “bri” păng “đak dơsĭ”, jang kiơ̆ ‘lơ̆ng trong tơlĕch jang kăl “mĭnh hơnih truh, pêng teh đak”, pơm ăn hơnăn đe ư hơnhang ang hơnhăk Lý Sơn, hơnih ‘lơ̆ng tơmang pơhiơ̆, ‘năr rơngơp Măng Đen păng tơdrong rơvơn sơlăh pêng Đông Dương jing tơmam tơmang pơhiơ̆ tơƀưh dih băl ‘lơ̆ng hơ iă. Kơ iĕng Thủ tướng pơma hơdăh:“Quảng Ngãi đei mĭnh hơnih dơ̆ng mŭk drăm-chinh trĭ tôch gĭt kăl, găh tơ̆ trong sơlăh pêng Đông Dương, jĭ ‘măng jang tơm Tây Nguyên năm tơ̆ đak dơsĭ. Ĭnh tôch bơnê trong bơ̆ jang đơ̆ng dêh char mưh sơkơ̆t hơdăh trong tơlĕch jang tŏk mŭk drăm 10% năm tơ̆ lơ. Mă lei, ‘nou jing mĭnh tơdrong long tih tên, mĭnh trong long nol hăm jơhngơ̆m nuih păng trong chĕp pơgơ̆r đơ̆ng hơnih Đảng dêh char. Kơdră chĕp pơgơ̆r kăl tơchĕng jrŭ, jang tih, kơ yuơ kon pơlei. Kăl hŭt hloi trong tơchĕng so lăp gô chang gơnang đơ̆ng teh đak tơmơ̆t jên jang, trong jang so gôchang Trung ương kĭ tơchơ̆t tơdrong jang păng tơlĕch ăn kon jên jang. Đei trong tơchơ̆t, trong jang ‘lơ̆ng hơ iă vă chă hơvơn păng iung jang hloi dôm khul jang oei măh mai lơ̆m Kon pơlei, lơ̆m hơnih mơdro sa ‘noh jĭ trong jang ‘lơ̆ng hơ iă hloh lơ̆m jơ ‘năr dang ei. Hăm tơdrong đei tih tên đơ̆ng rŏng hơgrop păng tơdrong hơpơi ‘meh vă kơtang kơ chăl hle, ĭnh athei Hop akŏm ou kăl pơma dơnuh, tơ iung pơjing Tơdrong tơchơ̆t hơdăh, kĕ tơlĕch jang kiơ̆ kơtang, proh hơmet đei trong jang kơtang, hrơ̆p mĭnh ‘măng păng iung jang kơtang hloh dơ̆ng, hơdrin iŏk đei jơnei, đei ‘măng jang keh đang hloh trong tơlĕch ăn”.