Tơ̆ hop akŏm, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Hop akŏm tih Kơdră tang măt Đảng ƀô̆ Kuô̆k hô̆i ‘măng mă I pơgơ̆r lơ̆m khei ‘năr teh đak bơ̆n yak mơ̆t lơ̆m chăl atok tơ iung ‘nao, tơ̆ hơnăp pơkoel roi năr roi kơtang, tơlĕch ăn sơnong jang, hơnăp jang tih tên hăm Đảng ủy Kuô̆k hô̆i, tơgop pơjing hơyak kơtang atŏk tơ iung pran kơtang lơ̆m bơ̆ jang tơ iung pơjing păng vei lăng Teh đak.“ ‘Nou ưh khan lăp jơ ‘năr vă lăng hơlen tôm tong dôm tơdrong iŏk đei jơnei, tơdrong tim mă lăp, dôm tơdrong tơm pơm ăn, trong hơlen jang gơ̆h lơ̆m jăl jang hơdrol, mă oei pơchoh ăn trong lăng, trong jang tơm, trong atŏk tơ iung păng tơdrong jang kăl lơ̆m jăl jang 2025-2030; adoi rơ̆ih, hơmet pơ ‘lơ̆ng khul kang ƀô̆ chĕp pơgơ̆r đei jơhngơ̆m đon ‘lơ̆ng, bơ̆ jang gơh hơgei vă iŏk jang dôm tơdrong jang tơm kơ Đảng, Kuô̆k hô̆i păng Kon pơlei pơjao ăn”.

Tơ̆ Hop akŏm, rim kơdră lơ̆m Khul kơdră chĕp pơgơ̆r Đảng ủy Kuô̆k hô̆i hlôi tơgop nơ̆r găh bơ̆ jang hơmet ăn dôm tơdrong tơchơ̆t Hop akŏm, rim tơdrong jang pơrô̆ tơbăt, hơmet pơ ‘lơ̆ng trong pơgơ̆r pơvih pơvăn păng bơ̆ jang dăr lăng hơlen.

Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang kơ rim hơnih bơ̆ jang Đảng, Hơnih jang Dăr lăng hơlen păng Hơnih bơ̆ jang Đảng ủy hlôi iung jang đĭ ai tơlĕch jang tơdrong jang, sơđơ̆ng bơ̆ jang ‘lơ̆ng, keh đang dôm tơdrong hơmet ăn Hop akŏm tih; Bơ̆ jang măt bơngai kơdră đei jang kiơ̆ ƀlep tơdrong tơchơ̆t, sơđơ̆ng kiơ̆ trong tơlĕch ăn, trŏ ƀlep tơdrong tơpăt, tơtom tơlĕch jang kiơ̆ sơkơ̆t hơdăh rim kơchư̆k, khul kơdră chĕp pơgơ̆r. Pơjao tơdrong jang hơdăh ăn rim kơdră bơ̆ jang lơ̆m Khul kơdră chĕp pơgơ̆r Đảng ủy chĕp pơgơ̆r hop akom tih rim đang ƀô̆ găh hơnih ou.

Dôm tơdrong tơchơ̆t Hop akom tih hlôi đei tơ iung pơjing, pơgơ̆r iŏk nơ̆r tơgop kơtang, tơgoăt iŏk, pơm pơkeh ƀlep khei ‘năr pơkă. Trong tơlĕch jang Hop akom tih ‘măng blŭng iŏk đei drơ̆ng nơ̆r kơtang. Bơ̆ jang dăr lăng, lăng hơlen đei iung jang kơjăp, sơđơ̆ng ƀlep tơdrong tơchơ̆t ƀlep tơdrong pơkăp ‘lơ̆ng chinh trĭ, hô sơ, bơ̆ jang tơchơ̆t kơchư̆k jang tơm dơnơm.

Găh bơ̆ jang tơ iung pơjing rim tơdrong tơchơ̆t Hop akŏm tih, Kơdră chĕp pơgơ̆r Kuô̆k hô̆i Trần Thanh Mẫn pơjao ăn Hơnih bơ̆ jang chih tơlĕch Tơdrong tơchơ̆t tơgoăt iŏk tôm tong rim nơ̆r tơgop đơ̆ng rim chi ƀô̆, đang ƀô̆, khul joăt jang, đang viên bơngai jang. Rim hla bơar tơbăt tơdrong bơ̆ jang đei chih tơlĕch hơdăh găh dôm tơdrong yan ou, hơlen ƀlep, tôm tong, tơpăt găh tơdrong jang iŏk đei jơnei, tim mă jơnei, trong lăng kiơ̆ tơƀôh hơdăh lơ̆m jăl jang ou ki, tơdrong tơm pơm ăn, trong jang kiơ̆ trŏ lăp tơƀôh hơdăh trong iung jang, tơdrong jang tơm păng tơlĕch ăn trong jang trŏ lăp, tơpăt ‘lơ̆ng ăn tơdrong jang truh ou kơnh.“Rim hla bơar tơchơ̆t Hop akŏm tih kăl chih kơđeh, tôm tong, chă pơma dơnuh dih băl ƀônh, pơjing đei drơ̆ng dih băl kơtang lơ̆m Hop akŏm. Lơ̆m ou, Hla bơar chih tơbăt bơ̆ jang chinh trĭ ‘noh jing tơdrong kăl hloh, kăl trŏ lăp ƀlep hăm dôm tơdrong pơrô̆ jang, pơchoh trong ‘lơ̆ng lơ̆m rim trong vă pơjing ăn tơdrong tơchơ̆t Hop akŏm mă XIV kơ Đảng; Hla bơar chih tơbăt bơ̆ jang tơbrar kơ khul kơdră chĕp pơgơ̆r Đảng kăl tơpăt, hơdăh, tơƀôh hơdăh jơhngơ̆m đon tơpăt păng sơkơ̆t hơdăh hơnăp jang kơ tơpôl, kơ rim bơngai găh tơdrong bơ̆ jang chĕp pơgơ̆r, pơrô̆ jang kơ Đảng ủy Kuô̆k hô̆i. Dôm hla bơar tơchơ̆t trŏ lăp hăm trong tơlĕch ăn đơ̆ng Hơnih tơm Chinh trĭ, Ban bí thư kơ Trung ương ‘noh pơma atŭm, mă lei jei kiơ̆ trong bơ̆ jang kơ Kuô̆k hô̆i tơ iung pơjing Khôi luơ̆t, dăr lăng păng tơchơ̆t dôm tơdrong kăl kơ Teh đak”.

Găh bơ̆ jang rơih kơdră chĕp pơgơ̆r, Kơdră chĕp pơgơ̆r Kuô̆k hô̆i Trần Thanh Mẫn pơjao athei hơnơ̆ng dăr lăng mă hơlen, sơđơ̆ng ƀlep tơdrong tơchơ̆t kơ Đảng, jang kiơ̆ ‘lơ̆ng tơdrong hơlen kang ƀô̆, tơdrong tơƀôh tơbăt kơdră jang lơ̆m Khul kơdră chĕp pơgơ̆r jăl ‘nao sơđơ̆ng ƀlep ‘lơ̆ng, tơpăt păng proh hơmet mă trŏ lăp; Khul kơdră chĕp pơgơ̆r jăl ‘nao kăl gơh hơgei jơhngơ̆m đon chinh trĭ, jơhngơ̆m đon ‘lơ̆ng, bơ̆ jang hơgei, pơjing đei drơ̆ng mĭnh nơ̆r, tơgoăt tơgoăl lơ̆m hơnih jang, vei kơjăp jang ‘lơ̆ng kơ Đảng. 

Kơdră chĕp pơgơ̆r Kuô̆k hô̆i Trần Thanh Mẫn lui akhan, hăm tơdrong tơgoăt pôm nơ̆r ƀơ̆r đon, kơrŭn đĭ ai găh hơnăp jang kơ tơpôl khul kang ƀô̆, đang viên, bơ̆ jang hơmet ăn Hop akŏm tih kơdră tang măt Đảng Kuô̆k hô̆i ‘măng mă I gô đei tơlĕch jang ƀlep tơchơ̆t, sơđơ̆ng ‘lơ̆ng, tơgop pơgơ̆r jơnei Hop akom tih pơma hơdrô̆ păng Hop akom tih kơ Đảng ‘măng mă 14 pơma atŭm.