Lơ̆m rim ‘măng hơtuch giĕng, A Huyền tă kơ pơtho hơioh lơ̆m pơlei hŏk tôn chĭng klơk, hơri brông Xơ Đăng. Sư oei yak hơdai hăm Đinh Xuân Đề (bơngai hơri kơ Khŭl joh ayŏ kơdŏ soang dêh char Kon Tum so) pơtho, pơgơ̆r tơdrong joh ayŏ kơdŏ soang ăn hơioh tơ̆ rim xăh, tơgŭm đe oh pơ̆n pơlong tơ̆ hơnih pơlong tih. Pla ŭnh hưch hanh ling lang khơ̆ng lơ̆m jơhngơ̆m nghệ sĩ A Huyền, tơƀôh tơdrong mơnơh truh kon pơlei lơ̆m pơlei pơla:

“Tơdrong pơm, tôn reh bơ̆n tĭng nĭng, chĭng klơk, chĭng chêng ‘noh ŭnh hnam, kon pơlei, đang kơ ‘noh đe kon, đe mon lơ̆m pơlei tôch kơ tơgŭm. Ưh khan lăp hơdrô̆ kiơ kon pơlei Xơ Đăng, mă pơđĭ hloi ‘nhŏng oh bơngai Yuăn, chông kon oh kơdih truh vă mơ̆ng păng hŏk pơhrăm tôn chĭng, tôn chĭng klơk. Pơma atŭm ‘noh ŭnh hnam tôch kơ tơgŭm, kon pơlei lơ̆m kueng ƀôt ‘meh vă đei chĕp vei, tơƀăk mong joh ayŏ ‘lơ̆ng hơiă kră sơ̆, đơ̆ng rŏng âu ưh kơ lê̆ đei hiơt hiong”.

Oei A Bliêt tơ̆ plei Kon wang, xăh Tân Tiến, Đăk Lăk ‘noh pơjing 2 khŭl tôn chĭng - hơri brông ăn kơ đe oh hŏk tro, vang akŏm tôn, hơri lơ tơdrong jang tih nhen Lêh cheh phe Buôn Ma Thuột, Lêh sầu riêng apŭng Krông Pắc… Sư kŭm chih hơmet, pơm dôm ƀai nhen “Iĕr ŏ”, “ Jơva chĭng chêng plei oh” đei iŏk jơnei kơ jung lơ̆m dôm ‘măng pơlong tơ̆ tơring. 2 ‘nu kon sư kŭm rok kiơ̆ tơdrong joăt joe tôn reh kră sơ̆ kơ ŭnh hnam:

“Lơ̆m 2 khŭl tôn chĭng chêng đei 28 ‘nu, lơ̆m noh đei 2 ‘nu kon ĭnh vang tôn. Dang ei đei kon kơdră tŏk bŏk hŏk sơnăm mă 2 hnam kao đăng Joh ayŏ kơdŏ soang Đăk Lăk, mon hŏk găh reh piano, hơdai hăm ‘noh mon kŭm hŏk dơ̆ng dôm tơmam tôn reh kon kông”.

Ƀơ̆t mạng internet hơtŏk tơiung, Nghệ nhân A Huyền păng A Bliêt kŭm hlôi iŏk yua kơmăy kơsô̆ nhen Facebook, Zalo…, vă vang tơroi tơdrong hưch hanh, tơƀôh tơdrong mơnơh găh tơmam tôn reh kon kông truh jơhnơr mơlôh.

Nghệ nhân A Huyền roi tơbăt: “Tơdrong tơm hơnhăk tơmam tôn reh joăt joe tơ̆ dôm trang mạng tơpôl ‘noh vă lơ bơngai băt truh găh tơdrong bri kông, tơdrong hơiă đơ̆ng dôm tơmam tôn reh joăt joe  Tây Nguyên. Ĭnh kŭm tôch kơ chơt hơiă, yua kơ đei iŏk yua, sơng đei lơ bơngai ‘meh. Pơma tơpă, vă dôm ƀai đơ̆ng ĭnh tôn reh tơmam joăt joe tăh lơ̆m mạng tơpôl ‘noh kŭm kăl kơ đei dơ̆ng tơmam kơmăy kơmŏk vă kuay, vă tăh. Kăl athei krao hơvơn đe oh, đe mon akŏm hơri hơsoang... ‘noh phim gô iŏk đei lơ bơngai pơih lăng hloh. Khei ‘năr âu ki, yua đơ̆ng đe buăl kuay phim kiơ̆ ‘meh vă, kuay, phĭn 1,2 ƀai yua đơ̆ng tôn, hơri, đang kơ ‘noh ‘nhŏng oh tăh lơ̆m trang mạng tơpôl. Bơngai pơih lăng ƀôh hơiă, ƀôh ‘lơ̆ng ‘noh đe tơgŭm tôch kơ lơ, kơdih kâu ĭnh chhôk dêh mưh tăh dôm phim yua đơ̆ng ĭnh pơm hiĕk”.

 Kŭm đei đon tơchĕng ‘mĕh hơnhăk um rup, dôm ƀai tôn chĭng, hơri brông đơ̆ng hơdrĕch kơdih hơtŏk lơ̆m mang tơpôl ‘năi, ‘nhŏng A Bliêt tơroi:

“Inh kŭm đa rơih hơtŏk rup đe kon mon tôn chĭng klơk, tôn chĭng, hơri brông, rup đe hơxoang… lơ̆m mang tơpôl ‘năi. Mă lei yoa hrei ‘nâu nhôn ưh đei kơmăy kơmŏk ‘lơ̆ng vă kuay kơna hơtŏk lơ̆m mang ưh đei lơ ‘năi. Inh hơmĕng truh âu kơnh, mưh tĕch đei tơmam tôn reh đơ̆ng nhôn pơm dăh mă năm hơri hơxoang, tôn chĭng tơ̆ nai đei tôm jên inh vă răt hơmet kơmăy kuay mă ‘lơ̆ng vă kuay iŏk dôm ƀai tôn chĭng, tôn glơng glơ̆i, hơri brông, hơxoang hơtŏk lơ̆m mang hăm đon hơpơi ‘mĕh roi tơbăt dôm tơdrong juăt ‘lơ̆ng đơ̆ng bơngai Xơ Đăng truh hăm bơngai lăng, kon pơlei tơ̆ jơ̆p tơring”.