‘Nâu jĭ roi tơbăt đei tơlĕch ăn tơ̆ jơ hop akŏm roi tơbăt hăm khŭl chih kơtơ̆ng ang pơgơ̆r kơsơ̆ (12/3) tơ̆ ‘ngoăih Lêh cheh phe Buôn Ma Thuột ‘măng mă 9. Tết Bunpimay jĭ năr lêh tih hloh lơ̆m sơnăm kơ bơngai Lào, jĭ ‘măng vă đe sư tơƀôh jơhngơ̆m kŭp yom hăm yang Phât păng ƀok yă.

Tơchĕng hơdrol, Tết Bunpimay Lào sơnăm Phật lịch 2568 gô pơgơ̆r đơ̆ng ‘năr 12 - 13/4 truh âu kơnh tơ̆ plei Trí, xăh Krông Na, apŭng Buôn Đôn. Jĭ tơdrong jang đei pơgơ̆r tih hloh đơ̆ng sơ̆ truh dang ei, Tết Lào sơnăm ‘nâu gô đei lơ tơdrong jang ‘lơ̆ng hơiă nhen: Et soi kơ sơnăm ‘nao, Lêh Hoa đăng, Lêh chô̆ tơ ley kơ kŏng ti, Lêh nơnăm pơrŏ sơng bia yang puih mak, Tơdrong pơlong “Bơngai goăng Bunpimay", pơlong tơmam sa  100 tơmam sa Tây Nguyên, Lêh kơsăy đak, lêh kơtrăi joh ayŏ, et sa Buffet rôih păng dôm tơdrong joh ayŏ kơdŏ soang ‘lơ̆ng hiă.