Rơneh păng tih vơ̆ lơ̆m minh unh hnam đei tơdrong juăt jue tanh brai, đơ̆ng oei 'lơ̆p H’Jih Ayun hlôi đei yă păng mĕ pơtho ăn gah tơdrong dui brai vai tanh khăn. Jơva không tanh re phiơk, tong đak kơ-ang hla, rơh 'long, um dok brai tơroi kơ dôm tơdrong mă hlôi hram lơ̆m đon bơnôh tơguăt kơjăp hăm tơdrong tanh brai.

Tơdrong hơrih hrat hăm mir ƀa ưh đei pơm ăn H’Jih Ayun kơdŭn jơ̆ng. Rim kơmăng, ah unh kơđeng pơchră, yă oei hăt hot hăm không tanh, tơpang ti tenh kuăng dui brai – nhen lĕ oei tanh tơdrong kơchĕng, đon lui, nơ̆r sơkơ̆t ưh kơ re:  “Athei vei răk tơƀăk mong tơdrong tanh brai kon kông po” . păng ưh hơdrô̆ vei đei tơdrong tanh brai, yă pơtoi pơtho tanh brai ăn kon sou dơ̆ng.

Ngê̆ nhơ̆n H’Jih Ayun tơroi: hơdrô̆ kăl đe sơnăm mơlôh đei đon lăp kơ joh ayŏ Êđê, yă kơchăng pơtho dăp đon dăp bơnôh. Jê̆ 20 sơnăm kơ ou, yă hlôi pơtho tơdrong jang ou ăn kơ hrĕng bơngai hŏk, lơ bơngai lơ̆m kơsô̆ ou gơh chă tanh brai păng tĕch che tanh đei iŏk yua kơdih, tơgop pơlan să um rŭp joh ayŏ truh hăm tơpôl: “Sơnăm ou inh 67 sơnăm bơih. Hơdrol ki, inh vang pơtho tơdrong jang lơ̆m hơp tak xah tanh brai, lơ̆m păng 'nguaih kơ apŭng. Inh pơtơm pơtho tơ̆ Anih Pơtho tơdrong jang kơ dêh char đơ̆ng sơnăm 2008, rim sơnăm 2 lăm. Dang ei, inh ưh kơ băt kơdih inh pơtho dôm lăm bơih, hơdrô̆ băt ah sơnăm sơ̆ pơtho 3 lăm hŏk tơ̆ apŭng đĕch".

Hăm ngê̆ nhơ̆n H’Jih, rim hlak che tanh jĭ minh tơdrong tơroi. Um dok ưh hơdrô̆ vă pơrŏ mă oei jing tơdrong pơtih ăn joh ayŏ. Đơ̆ng trong dok tơpăt, um vĕ, dĭl vĭl, um hla 'long, sem bri brah... tôm noh akŏm tơdrong kăp gĭt phara kơdih: tơdrong hrơ hrau akŏm jơhngơ̆m pran, tơguăt hăm cham char plenh teh. Hăm tơpang ti gơh hơgei, măt bang hơdah păng đon lăp kăp gĭt, yă ưh hơdrô̆ tanh đei hlak che dok lơ đak kơ-ang kăp gĭt mă oei tanh pơjing đon băt kơ joh ayŏ păng tơdrong pơ-ư pơ-ang kon pơlei. Ngê̆ nhơ̆n H’Jih tơroi: “Nhôn jĭ bơngai drăkăn pơtoi tơdrong jang, adoi ƀơm lơ tơnap tap  – đơ̆ng jăl trong hơtaih yaih, gre vih vơ̆t hli hlơt... mă lei nhôn adoi sô̆ chơt kơlih gơh đei jang tơdrong jang ou. Inh bơnê kơ Teh đak, Anih pơtho tơdrong jang kơ dêh char păng rim apŭng hlôi pơm trong hiôk ăn kơ inh păng lơ ngê̆ nhơ̆n nai gơh akŏm pơtho tơdrong tanh brai ăn kôn mon kon sou. Tơdrong sô̆ tih hloh noh đei pơdjoi tơdrong jang ou, vei răk tơƀăk mong ăn đe hơ-ioh lơ̆m pơlei”.

Rim hlak che tanh ưh hơdrô̆ 'lơ̆ng mă oei akŏm ƀenh đak pơ-uh, tơdrong sơ̆n păng tơdrong pơ-ư pơ-ang. Rim hlak che tanh mah đĭ minh giĕng, phŏ truh minh khei pơtơm keh đang, mă lei kơjă joh ayŏ mă hăp akŏm oei ling lang đĕch. Ngê̆ nhơ̆n H’Jih pơngơ̆t kơ đon: pơm thoi yơ tơmam tanh đei ưh hơdrô̆ tơbang lơ̆m tơdrong akŏm et xa, mă oei jĭ tơmam yua rim năr, jĭ tơmam pôk ăn tơmoi truh tơmang pơlei pơla bơngai Êđê: “Inh hơpơi 'meh rim lăm hŏk tro inh gô pơtoi tanh, tơbang păng pơtho ăn kôn mon kon sou ning nai kơnh, ưh đei lê̆ um rŭp guăng 'lơ̆ng ou ƀơm hiơt hiong. Bơngai 'lŏ kră pă đei oei noh bu gô vei răk? Đe sơnăm mơlôh kơ-'năr năm jang tơ̆ mir, ah kơmăng tơgenh tanh brai”.

Lơ̆m tơdrong vei răk tơƀăk mong um rŭp joh ayŏ, đei lơ bơngai nhen yă H’Jih Ayun – ưh đei rơ-ông rơ-ang, ưh đei pơdah ăn kơ đe băt, mă lei ang bang hăm tơdrong sơ̆n, đon lăp păng tơdrong pơ-ư pơ-ang kơdih kơ kon pơlei. Rim hlak che đei tanh ưh hơdrô̆ jĭ tơmam drăm pơjing đei, mă oei akŏm tơdrong juăt jue, jĭ nơ̆r joh ayŏ pơtruh ăn kon sou ning nai.

Lơ̆m tơdrong hơrih 'nao, ah mă dôm tơdrong juăt jue nhen lĕ jê̆ hiơt hiong, noh tơdrong dăp đon dăp bơnôh đơ̆ng lơ ngê̆ nhơ̆n nhen yă H’Jih (tơ̆ xah Ea Tul, apŭng Cư M’gar, dêh char Đăk Lăk) jing djoi brai brê, tơroh khei năr sơ̆ hăm dang ei, pơdjoi tơdrong juăt jue kră sơ̆ kơ kon pơlei. Hơpơi 'meh, jơva không tanh gô re hơnơ̆ng lơ̆m dôm pơlei pơla ah kơmăng vang vơch – vă kơ joh ayŏ Êđê pơtoi đei vei, pơlan să păng pơdjoi kiơ̆ rim chăl kôn mon kon sou.