Yava nan ieu lac kadha adaoh blaoh khol dahlak taduan gilac meng labik parang, yaih khan ilamo bhap bini bangsa Cam daok di tinh Lam Dong hu mbaok tame Harei raya Ilamo Bangsa Cam dalam negar thun ini.

Nghe nhan Uu tu urang gheih ghang angan Lâm Tấn Bình, mai meng kapul urang Cam di tinh Lam Dong brei thau, ini lac mbang ka 6 Ndang saong Karja peih Harei raya saong taong abih 6 mbang ong jeng hu da-a mai hu mbaok. Harei raya praong mbang ini, ong hu mbaok haong bruk bien tap saong dak padang parang iek adat pok tagok Po Gru di halau janeing Kadhar di Cam Ahier di tinh urang bangsa Cam Lam Dong.

"Ini lac bingun piah ka bhap bini bangsa Cam brei mboh hatai bui sambai saong thau ka bruk di drei dalam bruk khik ramik ilamo bangsa drei. Pandar taong abih dom gah hu pambuak tal ilamo bangsa Cam piah hu mbaok tame Harei raya. Ba urang pandar tui gok meng bruk dalam bhap binit al dom adat cambat, tanarakun. Nyu pambuak tal asal kadha parang iek di gah seni nghe thuat. Urang ruah meng bruk nan piah ba tame, yaih khan saong daong khik ramik saong patagok ilamo di bangsa drei."

Meyah labik parang di kapul Cam Lam Dong sameng sap ginang, sap saranai, ye labik parang di kapul Cam Ban raya Ho Chi Minh biak gheih meng rilo sambo bar di khan ao.

Sa-ai Lộ Minh Kiên saong sa-ai kamei Abi Droh mai meng kapul Cam Ban raya Ho Chi Minh chreih chrai brei thau:

"Ini lac mbang ka 2 adei hu mbaok tame harei raya..."

"Ini lac lac mbang akaok meti adei hu mbaok tame Harei raya..."

Harei raya pataom labaih 700 urang nghe nhan, urang adaoh tamia, urang pahat padhih oh bhian ma-in mai meng 7 tinh, ban hu rilo mikva urang bangsa cam di dalam negar dalam nan hu: Khánh Hòa, Gia Lai, Đắk Lắk, Lâm Đồng, An Giang, Tây Ninh saongTP. Hồ Chí Minh.

Dalam Harei raya praong brei rah tabiak rilo danak dak ilamo, pahat padhih saong jirah rivang biak gheih ndung bak ilamo bangsa Cam yau ye: Parang iek, yaih khan adat saong adat ngak ilamo bhap bini; raya adaoh tamia bhap bini; parang iek khan ao ngui cuk bangsa; yaih khan bruk ngak meng tangin bhap bini; parang ilamo Cam; dom danak dak pahat padhih bhap bini; yaih khan kaya jirah rivang, OCOP saong kaya mbang bhum palei.

Langiu di nan, daok hu danak dak kaya mbang bhap bini Cam hu angan “Luac jalan kaya mbang pahe bangi Cam ribau thun”. Danak dak ini pataom 25 tadai kaya mbang hu mbaok brei lambaok dom bhum pakei hu bhap bini rahra Cam daok rai, gah ngak mbang pablei salih, dom urang ngak kaya mbang, urang ilamo gah kaya mbang, kuhria dui pachreih meng 5.000 tal 10.000 mbang tuai damuai mai jirah rivang, ba drei tame.

Ong Lê Văn Hoa, Phaok Yam ndok So Ilamo, Pahat padhih saong Jirah rivang tinh Khanh Hoa brei thau, dom danak dak di Harei raya praong daong khik ramik ilamo siam gheih bhap bini di bangsa Cam. Dalam nan di Harei raya daok hu nyaom biai “Khik ramik saong patagok ilamo bangsa Cam dalam jaman bahrau”.

"Nyaom biai hu 2 asal kadha pasak. Ka sa lac khik ramik saong patagok drap ar ilamo Cam. Ka dua lac paglaong drap ar ilamo Cam piah ngak jirah rivang dalam tukvak bahrau. Ieu da-a yaih khan, buh jien tame pasiam palagaih, ngak ka ilamo bangsa Cam hu pambak tabiak jeng yau khik hu asal kadha ilamo dalam jaman urak ini."

Harei raya lac danak dak ilamo hu makna lagaih piah ngak tantu cambaih laih jalan di Ndang, sarak, hukum di Karja nagar ka bruk bangsa saong patagok ilamo./.