Thun bac ini, Sang bac bangsa gam bac gam daok di Bac Binh hu 265 urang anek saih, ralo abih di dalam nan lac hu ralo urang bangsa takik di dom xa bhum glaong, bhum ceik, bhum biak kan kandah dalam tinh Lam Ndong.

Dom thun jaik di ini, langiu di bruk pato magru ilamu, sangka iek glang tal rai diuk anek saih, bruk khik ramik saong cak rok patagok dom yaom ilamo meng kan jeng hu sang bac iek prong sangka peih ngak.

Hu jeng bruk bhian ngak bhian harei hrei, yaok tame harei Som akaok adit saong dom harei pahadar di gah pato megru, harei roya harei praong di taneh aia nagar, sang bac hu pachreih anek saih angui cuk khan ao meng kan di urang bangsa drei, piah hu mbaok tame bruk ngak ilamo, pataom mbaok adaoh tamia, ma-in dom kadha ma-in meng kan di dom bangsa. 

Gam saong nan, sang bac daok dak padang kapulan nyaom ilamo daoh tamia piah ka anek saih hu sa mblang ma-in kein laghaih, ngan haong jalan ngak daong ka dom anek saih patagok abih drei bruk ngak hadah krah jeng yau bruk taduan mek kadha siam gheih di rup drei.

Anai Lâm Thị Thu Điệp, gru pato di Sang bac bangsa gam bac gam daok di Bac Binh, tinh Lam Ndong brei thau, tapa ini, daong ka anek saih khang hatai, jia tame rup drei, hadah krah dang anak rilo urang. Paglaong glo akaok, bruk njauk ngak brei ka taong abih anek saih ka bruk khik ramik, ngak gheih mekre ka sang bac, tal bac.

“Ini lac sa bruk ngak biak hu makna ngan haong dom anek saih di Sang bac  bangsa gam bac gam daok Bac Binh. Sa kein laghaih nan lac xa Bac Binh hu rilo bhap bani Cam diuk rai, nan ye hu rilo yaom ilamo biak karei di bangsa Cam, rilo urang gheih tangin ngak gaok glah, menyim jih dalah saong pato pathram dom janih alat ragam bangsa nan ye bruk daong ka sang bac dalam dom mbang pato langiu khoa biak mbuan laghaih. Dom adei sa-ai daong grauk tuk grauk labik, tuk sang bac caong khin pambak prong yaom ilamo meng kan di bangsa”.

Gam haong bruk mek anek saih angui cuk khan ao meng kan di bangsa drei dalam harei Som akaok adit saong dom harei peih pakak thun bac bahrau, dom harei roya, harei nyaom pataom… sang bac jeng peih ngak rilo bruk ngak kein laghaih yau ye brei ka dom adei pathram saong peih ngak bruk adaoh tamia dom kadha adaoh bhap bani, ma-in dom kadha ma-in bhap bani piah ka anek saih hu taom gaok saong hu jalan ngak jang dalam bruk khik ramik dom janih ilamo meng kan.

Sa-ai Cửu Đặng Long An, daok di xa Bac Binh, tinh Lam Ndong, urang taong ghinang brei ka anek saih mong iek di sang bac ini brei thau, ini lac bruk ngak biak siam gheih, daong ngak brei paglaong akaok saneng ka anek saih dalam bruk khik ramik saong cak rok patagok asal ilamo bangsa drei.

Ngan haong anek saih bangsa gam bac gam daok, binah prong tukvak lac daok di sang bac, baoh sang ka dua raong ba, mong iek pato pakai ka dom adei prong jeng manuac jeng urang. Di ini, dom adei hu bac megru, ndom biai nao mai haong dom ayut sahabat bangsa karei, kuhria caga yam tabiak rahra prong jang.

Anai gru Lâm Lư Nữ Bích Thủy, Akaok Sang bac bangsa gam bac gam daok Bac Binh brei thau: peih ngak danak dak pato pakai thun 2018, sang bac ba asal ilamo dom bangsa tame dalam kadha bac, dalam nan hu pambuak pagam danak dak pato megru puk palei tui jalan ngak pataom tame dalam dom kadha bac. Dalam bruk ngak langiu khoa piah pato tacei ka anek saih ilamu ka khan ao, dom kadha adaoh bhap bani, alat ragam bangsa, kien truc ka sang daok, dom inem mek dak rai sajarah, ilamo, labik gheih mekre, adat cambat tanarakun, harei roya, dom kadha ma-in bhap bani…

“Tui Thong tu 04 di Mentri Pato megru, ye langiu di bruk pato bac saong iek glang anek saih daok dalam sang bac, ye sang bac daok nyauk sangka tal bruk khik ramik yaom ilamo dom bangsa tapa dom kadha bac langiu khoa yau: khik ramik khan ao meng kan di bangsa, dom palei ngak meng kan saong dom janih alat ragam bangsa, ilamo mbang menyum, dom kaddha ma-in bhap bani. Tapa nan, daong ka dom anek saih thau cambaih laih jang ka dom yaom ilamo di bangsa drei”.

Sang bac bangsa gam bac gam daok Bac Binh caong khin bruk pato pakai asal, ilamo bangsa brei ka dom anek saih oh lac tok tapa tapuk siphau bo daok lac tapa dom bruk ngak hu mboh di anak meta. Meng nan, daong ka dom adei hu jalan diuk rai daok dang ka nyu siam gheih jang, hu jalan ngak piah khik ramik saong cak rok patagok yaom ilamo, pren khang glo akaok di bangsa, rik daong tame paglaong bruk pato megru taong abih gah di sang bac./.