Di umo langiu 70 thun, Nghe nhan Uu tu A Biu, daok di palei Plei Klếch, xa Ngọk Bay, tinh Quang Ngai, jeng brei abih hatai tian ka bruk khik ramik saong pambak tabiak dom ilamo siam gheih di bhap bini bangsa Ba Na. Di mblang praong labaih 2.000 m²,  Urang angan A Biu padang jeng sa labik ndung bak ilamo bangsa. Baoh sang di ong jeng labik mai tal piah rahra saong tuai damuai duah thau, ba drei tame ilamo bangsa Ba Na.

Baoh sang tong hu khik ramik jaik yau tamo hu dom bingula bhap bini. Vil taom dan lac phun neu, thaik thaot sang Roong, tanang ia, gilai rup phun kayau, lasung thaok brah, kayau rup gam haong rilo kaya pagam haong raidiuk di mikva bangsa Ba Na. Di dalam, yaok rituh kaya hu khik ramik, meng kong caing, caih tapai meng kal, alat ragam bangsa, kaya menyim jih dalah tal dom kaya pala drak.

Piah hu gilang kaya kan ragam ragu nan, jaik meteh abap blaoh tapa, Po cei A Biu nao grauk mbon palei roh duah pataom saong khik ramik drap ar. Ong oh hadar drei hu salih dom drei kabao, limo piah khik dom majam caing siam gheih. Hu tukvak laneng lanuai, ong duah pataom hu tal 12 majam yau caing yao klak. Yaom lac hu rilo urang bayar yaok rituh trieu jien dong ka yaok majam, ong jeng kajap hatai oh pablei.

Tui A Biu, dom kaya ini brei hu khik ramik piah duh bruk khik ramik saong alin ka gilang muyim. Urak ini, ong daok piah 7 majam caing yao klak meng kal, dalam nan hu majam Klang Brông (caing Đại Bàng) – sa dalam dom majam caing banrik di urang bangsa Ba Na.

Oh sa janih duah pataom kaya ngui ilamu, ong A Biu daok thau tanat tantu rilo janih drap ar kaya ngui di bangsa drei. Ong thau paok caing, pasiam caing, me-in T'rưng, adaoh bhap bini, khan akayat, dalikal bangsa Ba Na saong me-in tanat dom alat ragam ragu bhap bini. Labik ilamo di sang ong oh tok lac khik piah kaya kan blaoh daok lac laik ngak dom adat ilamo bhap bini. Di ini, kong caing, adaoh bhap bini, akayat saong dom adat cambat du bangsa Ba Na jeng hu parang iek, pato veik ka rai rah sit umo saong yaih khan haong tuai damuai. Mai tal labik ilamo di A Biu, tuai damuai hu rivang iek “gilang muyim” Ba Nai sit, pang iek kong caing, tamia xoang, pang puac mayai khan saong mbang kaya mbang bhap bini kayua rahra bhum palei ngak tabiak.

Tui ong A Biu, khin patagok jirah rivang bhap bini karo kajap, rahra brei lac urang khik ramik saong patagok ilamo. Kayua nan, ong tuk halei jeng jak ba mikva khik tani tanat bruk menyim jih dalah, ngak dom kaya mbang bhap bini, pasram kong caing, tamia xoang piah duh tuai damuai. Tuk ilamo jeng ndap nda kaya kan brei jirah rivang, rahra oh sa janih duah hu jien mek tame blaoh daok hu daong prein hatai khik ramik saong pato jao dom yaom kaom bhap bini siam gheih di bangsa.

Labaih meteh abap pagam haong bruk khik ramik drap ar, Nghe nhan Uu tu A Biu hu daong ba ilamo urang bangsa Ba Na jeng sa janih kaya ngui brei ka jirah rivang bhap bini, brei bruk ngak ka rahra saong daong prein hatai ka rai rah sit umo patui veik khik ramik, patagok dom ilamo siam gheih di bangsa drei./.