Di xa Châu Thành, dahlau tuk peih bruk ngak, karja palei hu peih ka dom  baoh sang rahra nao rah rivang dom bruk raong pabe siam lagaih di bhum karei. Yaok baoh sang hu daong 50 trieu dong jien buh tame mbang akaok meti. Meyah blei pabe pajaih yaom glaong jang tanut daong ye ta-eng drei buh tame pabak, blaoh cagar di nan meyah duah hu pajaih lap jang ye meda pandar piah padang ngak var atau blei ndap nda kaya ka nyu mbang.

Sa-ai Thạch Qui, sa urang di dalam 20 baoh sang mek hu lagaih meng bruk ngak, ndom mayai lac urak ini kapol pabe di sang drei hu tagok labaih sapluh drei, dalam nan hu rilo drei daok metian. Meng yaom pabe mek ralo tagok gam gam, bruk ngak mbang di sang sa-ai hu tagok jeng kaya meda mboh cambaih laih.

“Karja daong hu 50 trieu dong, dahlak ba nao blei pabe ine, padang ngak var. Tal ini kapol pabe jeng hu labaih sa pluh drei, dalam nan hu 5-6 drei daok metian”.

Ngan haong yaom pabe urak ini meng 150 – 160 ribau dong/kg, lagaih gaok mai tagok labaih 180 ribau dong/kg gam saong anek pabe siam glaong, ta-eng 10 drei pabe mek ralo taviak var jaik ini, baoh sang sa-ai Qui mek hu labaih 40 trieu dong, jien laba labaih 35 trieu. Rilo baoh sang di xa Châu Thành – dahlau diah bhian hu raong lamo min khin pablei abih anek lamo piah salih tapa raong pabe.

Oh lac sa janih hu ba mai siam lagaih brei ka bruk ngak mbang blei salih, raong pabe daok hu kein lagaih jien padai biar. Amuk daok pandar hu rilo kaya mbang hu dahlau, patrun jien buh tabiak ngak. Langiu di nan, khak pabe daok hu brei pandar ngak khak drak ka phun pala, daong patak pataom rilo abih jien buh tame ka bruk ngak nong.

Ong Nguyễn Thanh Thủy, po var raong pabe saong labik pataom blei pabe mek ralo di phuong Tra Vinh, brei thau darak pasar pabe dom thun jaik di ini tuk halei jeng karo, jaik ini daok tagok yaom ka hatai caong peih praong tabiak gah Kreh negar saong gah Barak.

“Jalan ngak di drei ieu lac parilo kapul pabe piah menek, kayua yau nan ye dahlak blei abih pabe pajaih di mikva. Pabe blei mai ye dahlak raong ka lamek, daok rilo tapa bruk kuhria dahlau ye dahlak jao ka gah pambuak bruk di Ben Tre, Tien Giang. Darak pasar biak praong, dom jeng pablei hu abih. Dahlak hulin mboh bruk raong pabe biak hu kein lagaih”.

Tui dom gah juru ilamo, pabe kuhria rah tapa 8 bilan menek sa mbang. Hadei meng 7 – 8 bilan raong, pabe anek nyu praong meng 20kg ba tagok meda mbiah hu pablei. Dalam nan hu ndom mayai lac dom baoh sang di Vinh Long hu brei halai jak jeng pabe Bách Thảo saong pabe Boer, brei anek hu lagaih haong langik pandiak di bhum taneh di tapen tasik. TS. Lâm Thái Hùng, Phaok Yam ndok So Khoa hoc – Kong nghe tinh Vinh Long ndom meyai lac:

“Urak ini akau dahlak hulin hu padang bruk di dom baoh sang rahra, dalam nan hu rilo baoh sang raong hu pabe dua pajaih; dom baoh sang hu mbaok tame bruk ngak jeng hu pandar jalan ilamo ky thuat raong glang tui pabe dua pajaih ini. Khol dahlak hulin mboh ini lac bruk jak jeng mbang akaok meti”.

Jak jeng di bruk raong pabe karek dalam var ro oh lac sa janih daong mikva urang bangsa Khmer patruh kathaot karo kajap blaoh daok lac jalan langyah hu makna dalam bruk langik salih karei dak harei dak catang. Meda ndom mayai lac, gam saong gah daong mbang akaok meti di Karja nagar saong bruk sa hatai ngak mbang di mikva, bruk raong pabe di Vinh Long daok hu peih tabiak bruk daok dang mbang ngui tani tanat, daong padang palei pala bahrau saong paglaong raidiuk ka mikva urang bangsa Khmer./.