Êngao kơ dŭm klei msĕ, dŭm djuê ana lŏ mâo dŭm knhuah mdê hĭn bi lu jơr hlăm dhar kreh djuê ana. Thŭn 2023 hŏng lu mta bruă dhar kreh mâo čar mkŏ mjing leh anăn hgŭm mkŏ mjing msĕ si: Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1 thŭn 2023, Klei bi lông mnơ̆ng ƀơ̆ng huă, ana êa drao – boh tŭ mơ̆ng čư̆ dliê Ngọc Linh”…Dŭm boh tŭ dưn dhar kreh mơ̆ng mnuih ƀuôn sang dưi hưn mdah, bi mni. Ayŏng Đinh Xuân Phóc, ti alŭ Vi K’Lơng, să Hiếu, kdriêk Kon Plông brei thâo:

 “Kâo khăp čiăng êdi kơ klei tông čing, kreh nao mbĭt hŏng êpul nao bi lông ti kdriêk, dưi mjĕ êrô hŏng dŭm êpul tông čing găp. Kâo mâo phung thâo mbruă mtô klei tông čing, dưi nao bi lông tông čing, ƀrư̆ ƀrư̆ kâo dưi hriăm lu klei tông čing. Êlâo kơnao bi lông, êpul bi kƀĭn hriăm tông si sang dhar kreh, êpul mâo mơ̆ng 20 – 30 čô. Êpul hriăm tông hur har êdu leh anăn hơ̆k mơak kyua dưi mjĕ mjuk, hluê hriăm. Wưng anei mâo kdriêk, čar mkŏ mjing, êpul tông čing dưi nao hgŭm rang mdah jing hơ̆k mơak êdi, dưi ñŭ kma mbĭt hlăm wăl dhar kreh čĭng čhar”./.

 Ding, mnuih djuê ana Bahnar, jing khua mduôn ti ƀuôn H’Way, să Hà Tam, kdriêk Đăk Pơ, čar Gia Lai brei thâo: Ƀuôn mâo 156 gŏ sang mnuih Bahnar. Êlâo wưng tết, bruă sang čư êa alŭ wăl mkŏ mjing leh dŭm êpul hriê čuă êmuh, mđup brei hnư mnơ̆ng tết kơ ƀuôn. Boh nik hŏng dŭm gŏ sang ƀun, giăm ƀun, gŏ sang knŭk kna dlăng ba, phung mâo bruă tŭ dưn, phung mâo phung roh krư̆ kđăl…mâo nanao bruă sang čư êa dŭm gưl uêñ mĭn, kriê dlăng. Dŭm hnư mnơ̆ng tếr msĕ si điŏ, bêñ, êa prăi leh anăn prăk dưi mđup brei djŏ mmông, đru kơ grăp čô mnuih ƀuôn sang mâo sa yan tết hơuh mđao leh anăn kluôm dhuôm. Khua mduôn Ding hơ̆k mơak brei thâo:

 “Tết truh, ƀuôn mkŏ mjing klei mjĕ mjuk hŏng dŭm alŭ ƀuôn riêng gah, tông čing, kdŏ čhuang, phung êkei êdam, mniê êra leh anăn mnuih ƀuôn sang bi kma mbĭt hŏng ai êwa yan mnga. Ƀuôn hmei mâo 6 êpul, grăp êpul blei sa drei ŭn mkŏ mjing klei ƀơ̆ng tết mbĭt, wưng anei phung khua gĭt gai să, leh anăn dŭm êpul êya hriê hgŭm mơak mbĭt, tông čing hŏng klei kdŏ čhuang hŏng grăp čô.”