Mbĭt hŏng anăn jing dŭm klei kƀĭn, hưn mdah hdruôm hdră “Phung mda asei huĭ mơ̆ kơ bruă klam”, klei rang mdah rup “Ai mda mlan 3” leh anăn mtrŭt mjhar sa ai hŏng hruê kăm 2 klei bi lông ksiêm duah hƀuê ênuk 120 mkŏ mjing, mđĭ kyar čar Dak Lak. Hlăm klei kƀĭn, phung tuê bi blŭ hrăm, bi trông kơ mta phŭn hdruôm hdră “Phung mda asei huĭ mơ̆ kơ bruă klam” mơ̆ng Sang kđăm mkra hdruôm hdră bruă Kđi čar Klei sĭt mda mdah ti thŭn 2023.

Hdruôm hră kpal mâo 350 pŏk mơar, hŏng 23 klei čih jing dŭm klei čih bruă klei mrâo, klei ksiêm duah mư̆ng phung khua gĭt gai Đảng, knŭk kna, Êpul bruă, phung čih klei mrâo, knơ̆ng bruă hŏng lu akŏ mdê mdê. Hlăm hdră, Êpul mkŏ mjing ăt rang mdah êbeh 50 pŏk rup mâo akŏ “Ai mda mlan 3”, bi êdah lu mta pŏk rup siam kơ dŭm hdră, klei ngă bruă mơ̆ng phung êdam êra čar Dak Lak hlăm dŭm mta bruă.