Lu ƀuôn êlan ƀrư̆ ƀrư̆ mkŏ mjing dŭm mta mnơ̆ng dhơ̆ng, mjing gru kruăk čiăng iêo jak phung tuê hriê čuă dlăng. Dak Lak čuăl mkă mđĭ kyar 16 alŭ ƀuôn hiu čhưn ênguê yang ƀuôn, kñăm mkŏ jing klei iêo jak, mtrŭt mđĭ bruă hiu čhưn ênguê anei bi lar boh tŭ dưn ti alŭ wăl.

Hluê si Nguyễn Thụy Phương Hiếu, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak, mđĭ kuar bruă hiu čhưn ênguê yang ƀuôn đru ba wĭt boh tŭ dưn bruă duh mkra ala ƀuôn kơ alŭ wăl, đru mkŏ wĭt bruă duh mkra, mkŏ mjing hdră duh ƀơ̆ng, mđĭ hnư hrui wĭt kơ êpul êya nao hgŭm hlăm dŭm bruă hiu čhưn ênguê. Mbĭt anăn, đru mđĭ klei thâo săng kriê pioh, bi lar, hưn mdah knhuah gru dhar kreh mơ̆ng mnuih ƀuôn sang nao mbĭt hŏng bruă hiu čhưn ênguê. Kyuanăn, si srăng ngă čiăng êpul êya thâo săng klă leh anăn hur har nao hgŭm jing sa hdră čŏng pô, srăng dưi mkŏ mjing ai hdĭp kơ bruă hiu čhưn ênguê yang ƀuôn.