Ti krĭng lăn dlông Lang Biang êbeh 1.500 m mkă hŏng êlah êa ksĭ, Đà Lạt mâo lăn adiê pah brei yan adiê êđăp drưm jih thŭn, lăn mnga êa m’ak jăk siam, jing anôk hriê čhưn êđăp ênang, jăk êdi mơ̆ng phung tuê hlăm lehanăn êngao ala čar. Jing krĭng lăn hdĭp mda mơ̆ng mnuih djuê ana K’ho, hlăm dŭm ênuk gưl 19, mnuih Prăng hriê leh ti krĭng lăn anei mkra ƀuôn prŏng mdei săn, lehañ jak iêu lu mnuih mơ̆ng dŭm ênuk gưl hriê hdĭp mda lehanăn duh ƀơ̆ng. Kyua klei bi mjĕ mjuk knhuah dhar kreh mjing leh klei mdê, klei siam hlăm knhuah hdĭp mơ̆ng mnuih Đà Lạt hruê anei.

Găn 130 thŭn mkŏ mkra lehanăn đĭ kyar, ƀuôn prŏng Đà Lạt, čar Lâm Đồng mâo leh klei đĭ kyar jăk siam, hdră duh mkra – ala ƀuôn, bruă lĭng kahan rơ̆ng kjăp klei êđăp ênang, klei bi mjĕ hŏng tač êngao dưi pŏk mlar. Êngao klei găl hlăm hdră mđĭ kyar bruă lŏ hma ba yua kdrăp mrâo, hdră hiu čhưn ênguê jing leh bruă duh mkra phŭn. Năng mđing, Đag Lạt dưi mđĭ lar knhuah dhar kreh jăk siam mơ̆ng djuê ana mguôp hŏng knhuah hdĭp mơ̆ng mnuih Đà Lạt “Jăk ênang – Khăp kơ tuê”.

Đặng Quang Tú, Khua Anôk bruă sang čư̆ êa ƀuôn prŏng Đà Lạt bi mklă, dŭm boh tŭ năng ktưn hưn mơ̆ng ƀuôn prŏng anăn jing ară anei jing leh Wăl hiu čhưn ênguê hing ang êdi mơ̆ng ala čar lehanăn tar rŏng lăn, Ƀuôn prŏng Festival Mnga mơ̆ng Việt Nam, ƀuôn prŏng thâo mĭn, Ƀuôn prŏng hŏng dŭm ênhiang mmuñ jăk mơ̆ng UNESCO, ară anei dôk gĭr mkŏ mkra ƀuôn prŏng knhuah gru tar rŏng lăn. Amâo djŏ dŭm anăn, Đà Lạt lŏ mâo 2 blư̆ dưi tŭ yap jing “Ƀuôn prŏng hiu čhưn ênguê mtah mơ̆ng ASEAN” lehanăn jing sa hlăm dŭm anôk hiu čhưn jăk êdi ti Asi. Đặng Quang Tú, mñă klă:

“Thŭn 2014, Khua knŭk kna bi mklă Hdră mtrŭn 704, ăt msĕ mơh Hdră mtrŭn mrô 04 mơ̆ng bruă Đảng čar Lâm Đồng bi mklă leh mta kñăm: Mkŏ mkra Đà Lạt jing ƀuôn prŏng mrâo mrang, ƀuôn prŏng mrâo, jing wăl anôk hiu čhưn lăn mnga êa m’ak, mdei săn jăk, hiu čhưn dhar kreh hƀuê ênuk hnơ̆ng tar rŏng lăn, jing wăl anôk dhar kreh, kdŏ mmuñ, mjuăt ktang asei mlei lehanăn hlăp mbul hlăm krĭng, sa ƀuôn prŏng mrâo mrang. Ti anăp klei găl mrâo, bruă Đảng, sang čư̆ êa, mnuih ƀuôn sang Đà Lạt ƀuăn bi hgŭm mguôp sa ai, gĭr mlih mrâo, đua klam čiăng dưi hluê ngă klei čang hmăng đĭ kyar, lač jăk klei đru mguôp mơ̆ng phung gưl êlâo mâo leh boh tŭ yuôm hlăm hdră mkŏ mkra lehanăn mđĭ kyar ƀuôn prŏng anei”.

Blŭ ti knăm bi hdơr 130 thŭn Đà Lạt mkŏ mkra lehanăn đĭ kyar, K’iăng khua knŭk kna Lê Minh Khái čih yap lehanăn bi mni dŭm boh tŭ êdah êdi mâo bruă Đảng, bruă sang čư̆ êa, lĭng kahan lehanăn mnuih ƀuôn sang dŭm djuê ana ƀuôn prŏng Đà Lạt, čar Lâm Đồng dưi mâo hlăm wưng êgao, đru mguôp yuôm bhăn hlăm boh tŭ dưn kluôm mơ̆ng ala čar.

Hŏng klei čang hmăng lehanăn klei đăo knang kơ sa ƀuôn prŏng Đà Lạt krơ̆ng kjăp klei jăk siam, klei bhiăn djuê ana ƀiădah mâo hdră mlih mrâo, đĭ kyar hlăm grăp hruê mbĭt hŏng klei kreh dhar, mrâo mrang, jăk siam hlăm êdei anăp, K’iăng khua knŭk kna mtă kơ bruă Đảng, sang čư̆ êa, mnuih ƀuôn sang Đà Lạt brei mtrŭt mđĭ hĭn hdră mđĭ kyar bruă duh mkra ala ƀuôn lehanăn dlăng mnuih ƀuôn sang jing phŭn, jing mta kñăm, jing pô phŭn, boh kdrŭt mđing truh kơ boh tŭ mđĭ kyar. K’iăng khua knŭk kna mñă klă:

 “Kâo mtă kơ bruă Đảng, sang čư̆ êa, mnuih ƀuôn sang Đà Lạt krơ̆ng kjăp, ksŭl mbŭ klei bi hgŭm mguôp djuê ana, amâo mdei mkra mđĭ klei thâo kiă kriê, ai ktang kdơ̆ng mblah mơ̆ng êpul bruă Đảng, đảng viên, bi kjăp klei hgŭm mguôp hlăm anôk bruă Đảng lehanăn anôk bruă kđi čar, mjing klei sa ai hlăm mnuih ƀuôn sang. Bi lu jơr, iêu mtrŭt djăp ai dưi, klei mâo, boh tŭ klei đru mơ̆ng yang ƀuôn hlăm hdră duh kơ anôk bruă nah gŭ bi knar, mđrăm mbĭt, djŏ guôp, tŭ dưn, boh nik dŭm hdră bruă phŭn, hdră dhar kreh, mtô bi hriăm, mdrao mgŭn, bi mlih mrô, mkŏ mkra ƀuôn prŏng kreh dhar, đru ba Đà Lạt jing sa alŭ wăl đĭ kyar yuôm bhăn hlăm krĭng, mơ̆ng ala čar, jing anôk mkŏ kdrông bi hgŭm yuôm bhăn hŏng krĭng wăl lehanăn tar rŏng lăn”.

K’iăng khua knŭk kna ăt mtă, Đà Lạt brei mđing mđĭ lar anăn knăl Ƀuôn prŏng Festival mnga Việt Nam, ba yua jih klei găl mâo, duh bi liê mđĭ kyar Đà Lạt jing sa ƀuôn prŏng jăk siam, mđĭ kyar bruă lŏ hma ba yua kdrăp mrâo hluê hdră doh, h’ĭt kjăp, jăk hŏng wăl hdĭp mda, ngă bruă tŭ dưn, mđĭ lar klei đua klam mbĭt hŏng ƀuôn prŏng jăk mơ̆ng UNESCO, mơ̆ng anăn đru mtrŭt mđĭ boh tŭ yuôm mơ̆ng hdră tuh tia mkra mjing, dhar kreh hlăm bruă duh mkra ti alŭ wăl./.