Hluê si hdră kčah mơ̆ng Anôk dlăng bruă Đảng čar, čar srăng mkŏ mjing knăm bi hdơr 120 thŭn hruê mkŏ mjing hlăm hruê 22/11 thŭn anei. Hdră anei mâo klei kdŏ mmuñ kkuh m’ak lehanăn mnah phao briêng. Mbĭt hŏng anăn mâo Klei bi kƀĭn trông “Dak Lak – 120 thŭn mkŏ mkra lehanăn mđĭ kyar”, knăm hưn mthâo boh tŭ bruă duh mkra – ala ƀuôn,  rang čhĭ mnơ̆ng mâo hnơ̆ng tŭ jăk lehanăn hưn mthâo mta mnơ̆ng OCOP; hdră knăm m’ak “Dak Lak, pral kdal, mĭn mrâo – ñŭ kma”, dŭm klei bi lông mă rup lehanăn bi lông online tui ksiêm kơ hƀuê ênuk 120 thŭn mkŏ mkra, mđĭ kyar čar Dak Lak. Dŭm hdră anei mkŏ mjing hlăm mlan 3 ti anăp, boh nok hlăm 3 mlan knhal jih thŭn 2024.

Ti anôk bi kƀĭn, phung khua anôk bruă sang čư̆ êa čar Dak Lak mtă kơ dŭm êpul mjêč pŏk ngă bruă hluê si hdră kčah mbĭt anăn hưn mthâo gru hmô, kdrêč bruă êdah êdi, mkŏ mkra hdră kdŏ mmuñ rơ̆ng klai jăk, tŭ dưn hŏng boh phŭn djŏ guôp./.