Hluê si khua gĭt gai čar Dak Lak, hlăm thŭn êgao, khădah tuôm hŏng lu klei dleh dlan lông dlăng, ƀiădah čar Dak Lak ăt lŏ dơ̆ng rơ̆ng đĭ kyar bruă duh mkra ala ƀuôn, kñăm ai dưi leh anăn mtrŭt bi hmar bruă hluê ngă dŭm hdră ala čar kñăm leh anăn dŭm hdră duh bi liê bruă knŭk kna.

Dŭm mta bruă mdrao mgŭn, dhar kreh, mjuăt asei mlei, hiu čhưn ênguê, kreh knhâo, mrâo mrang, klei hâo hưn, mtô bi hriăm dưi mâo lu boh tŭ dưn jăk. Hlăm boh tŭ mbĭt mâo klei đru mguôp mơ̆ng phung hriăm lu, phung kdŏ mmuñ leh anăn phung čih klei mrâo ti alŭ wăl. Thŭn 2024 jing thŭn mkŏ mjing tur knơ̆ng kdlưn hĭn, bi hmar bruă hluê ngă tŭ jing dŭm hnơ̆ng čuăn, bruă klam jih wưng păn bruă mơ̆ng Klei kƀĭn kluôm bruă Đảng čar, khua gĭt gai čar Dak Lak hmăng hmưi kơ êpul phung hriăm lu, phung kdŏ mmuñ, phung čih klei mrâo mơ̆ng čar lŏ dơ̆ng duh myơr lu hĭn hlăm grăp mta bruă mă čiăng đru mguôp mkŏ mjing čar Dak Lak mdrŏng siam, mrâo mrang, knhuah gru.