Ti knăm gưl tal êlâo dưi mkŏ mjing, phung tuê hiu čhưn lehanăn mnuih ƀuôn sang dưi dlăng hdră tông čing čhar mguôp hŏng klei kdŏ čhuang lehanăn mnăm kpiê čeh mâo êpul phung mbruă lehanăn phung hđeh 2 ƀuôn Kmrơ̆ng Prŏng A (să Êa Tu) lehanăn Alê A (ƀuôn prŏng Êa Tam) mdah.

Ƀri gưl anei, Êpul hgŭm bruă Văn học Nghệ thuật Dak Lak lehanăn Anôk bruă sang čư̆ êa ƀuôn prŏng Ƀuôn Ama Thuôt bi hgŭm mkŏ mjing Knăm rang mdah rup lehanăn čih boh hră thư pháp kkuh drông Yan mnga Giáp Thìn. Hŏng 80 pŏk rup mâo ruah mơ̆ng dŭm pŏk rup siam hĭn hlăm klei bi lông mă rup ƀuôn prŏng Ƀuôn Ama Thuôt, mguôp hŏng bruă rang mdah rup thư pháp lehanăn čih kač boh hră ti boh đung, mdưm hlăm wăl anôk dăp ana mnga, kyâo bi msiam ti Wăl tač prŏng hruê 10/3.