Knơ̆ng bruă hiu čhưn ênguê wăl mnơ̆ng hdĭp, dhar kreh, êpul êya Akŏ Tam ti ƀuôn prŏng Ƀuôn Ama Thuôt mkŏ mjing knăm myơr brui mngưi, bi mni kơ Amĭ ala čar iêo jak lu mnuih ƀuôn sang leh anăn phung tuê nao hgŭm.

Dŭm hruê akŏ yan mnga, ti dŭm kdriêk mơ̆ng čar Dak Lak ăt mkŏ mjing lu mta bruă dhar kreh – mjuăt asei mlei msĕ si: Hruê knăm dhar kreh dŭm djuê ana kdriêk Ea Kar gưl tal 3, Hruê knăm dhar kreh, mjuăt asei mlei djuê ana Mông ti kdriêk Krông Bông, knăm mơak Hảng Pồ ti wăl kran Ƀuôn Hồ, knăm mơak knhuah gru Việt Bắc ti kdriên Krông Hnang, klei bi lông bi čĭk Vụ Bổn, ti kdriêk Krông Ana mkŏ mjing klei bi lông mran knhuah gru pŏk mlar leh anăn mdlưh gơ̆ng ngă yang mơ̆ng mnuih Mường. Anei jing dŭm mta bruă đru mtrŭt mđĭ bruă hiu čhưn ênguê, mkŏ mjing anôk hlăp lêñ jăk, ba wĭt klei jăk mơak kơ mnuih ƀuôn sang leh anăn phung tuê.