Dŭm hruê mmông wăn, giăm 30 čô amai adei mnuih Bahnar hlăm êpul pơ̆k mñam alŭ 5, să Pờ Tó, kdriêk Ia Pa, čar Gia Lai lŏ  hrăm mbĭt pơ̆k mñam ti krum sang dlông. Phung khua thŭn hĭn êbeh 50 thŭn leh, mâo phung mniê mrâo brŭ êra. Diñu bi ktrâo lač, hrăm mbĭt mñam gru đêč djuê ana pô, amâodah đêč gru đêč mrâo hlăm ao, mơiêng. Amai Đinh Như, ti alŭ 5, să Pờ Tó, brei thâo:

“Hlăk đưm phung khua mduôn bi hriăm kơ di aprŏng, neh. Ênuk mrâo snăn phung hmei lŏ hriăm dơ̆ng. Êdei anei pô lŏ mtô kơ phung hđeh, phung hđeh 16, 18 thŭn lŏ hriăm dơ̆ng”

         Bi ti să Ia M'nông, kdriêk Čư̆ Păh, čar Gia Lai, phung amai adei mnuih Jrai hlăm êpul pơ̆k mñam ƀuôn Kép 2 ruah sa boh sang dlông krah ƀuôn ngă anôk mñam leh anăn mdah kdrăp mnơ̆ng pơ̆k mñam. Anei jing anôk nao hlăm tuor hiu čhưn êpul êya ƀuôn Kép 2. Truh tinei, tue hiu chưn ƀuh klei jăk siam mơ̆ng gru đêč djuê ana hlăm grăp blah ao, mơiêng, kdô djă hiu…dưi ƀuh klei pioh lu mnĭt mmông tơdah lông dôk gŭ ti jar mñam, ruah ya mta pô čiăng pioh. Amai H’ Uyên Niê-  Khua Êpul hgŭm pơ̆k mñam brei thâo, ară anei mâo leh anôk bruă duh mkra bi hgŭm hŏng êpul hgŭm, pŏk klei găl mrâo kơ bruă răng mgang mđĭ kyar bruă pơ̆k mñam djuê ana. Kyua bruă mjing mnơ̆ng dhơ̆ng dưi ba yua hŏng phung tue, anăn phung thâo mbruă mâo prăk hrui wĭt hlăm brô 5 êklăk prăk hlăm grăp mlan.

“Êpul hgŭm phung mniê hmei bi mlih hdră ngă, mđĭ kyar dŭm mta mnơ̆ng dhơ̆ng pơ̆k mñam djuê ana pioh dlăng. Msĕ si kdrăp pơ̆k mñam djuê ana snei hmei srăng mjing kdô, ao, buê … mơ̆ng anăn mâo lu tue khăp tơdah digơ̆ hriê dlăng tinei… Phung thâo bruă dưi dưn boh tŭ bruă pô ngă, mơ̆ng anăn digơ̆ mâo klei hur har hĭn, khăp hĭn čiăng răng kriê knhuah dhar kreh djuê ana.”

 Hlăm kluôm čar Gia Lai mâo leh 106 êpul hgŭm pơ̆k mñam, bi kƀĭn êbeh 1.600 čô hgŭm. Ênoh anei lŏ dơ̆ng đĭ tơdah bruă pơ̆k mñam djuê ana dưi mâo čar mđing dlăng hưn mdah msĕ si sa mta mnơ̆ng dhơ̆ng dhar kreh čiăng mđĭ kyar hiu čhưn ênguê. Čar Gia Lai ba kdrăp djuê ana jing boh phŭn yuôm bhăn hlăm hdră bruă “Răng mgang, mđĭ kyar ênoh dhar kreh djuê ana jăk siam mơ̆ng dŭm djuê ana mguôp hŏng klei mđĭ kyar hiu čhưn ênguê” hlăm Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng cư̆ čhiăng wưng 2021 - 2030.

Ară anei mnơ̆ng dhơ̆ng mơ̆ng kdrăp pơ̆k mñam dưi rang mdah, hưn mthâo hlăm dŭm hdră hưn mdah čing čhar hlăm knhal jih hruê kăm, mkŏ mjing nanao ti Wăl tač Đại đoàn kết, ti krah ƀuôn prŏng Pleiku.

Nguyễn Thị Thanh Lịch-  K’iăng Khua Knơ̆ng bruă sang čư̆ êa čar Gia Lai brei thâo, hdră kñăm mơ̆ng čar jing răng mgang, hưn mdah leh anăn ba kdrăp pơ̆k mñam jing mnơ̆ng ba čhĭ hlăm bruă hiu čhưn ênguê ti alŭ wăl:

“Mơ̆ng anei hmei čang hmăng mpŭ kơ phung thâo mbruă, phung ksiêm hriăm amâo mdei, mâo mnơ̆ng dhơ̆ng jăk siam. Hmei čang hmăng amâo djŏ knŏng hưn mdah, hưn mthâo ôh ƀiădah lŏ mkra mnơ̆ng dhơ̆ng jăk siam, hưn mdah kơ tue hiu čhưn bi mguôp mjing mnơ̆ng dhơ̆ng hiu ba čhĭ, đru hlăm klei mđĭ kyar hơ̆it kjăp ti čar Gia Lai”./.