Gơ̆ng ngă yang mnuih Mạ jing kpă lehanăn mdơ̆ng dlông rŏng lăn, mâo klei hrăng hlăm 8 bĭt bi kna sơăi. Jih jang klei anăn mâo blĭt hŏng lu êa mil, hŏng lu rup, điêt prŏng mdê mdê msĕ si rup čĭm, mnga hla, rup amung mdiê, amâodah mkra lăt, mta dhar, wĭl... pô mbruă K’Brẻo, ƀuôn B’Sumrăc, să Lộc Tân, kdriêk Bảo Lâm, čar Lâm Đồng brei thâo, gơ̆ng ngă yang mnuih Mạ dlăng ti êngao msĕ si ana êmiê dliê mâo lu adhan, msĕ si ana đung mâo lu hla mdê mdê, bi knăl kơ lu djuê hlăm ƀuôn sang.

“Gơ̆ng ngă yang kreh mâo mdơ̆ng hlăm dŭm hrue knăm mơak, boh nik knăm tlŏ kbao. Anei jing sa klei bi knăl kreh ƀuh hlăm ƀuôn sang. Gơ̆ng ngă yang mâo jih jang mnuih hlăm ƀuôn mbĭt hŏng phung khua mduôn bi mdơ̆ng. Mbĭt hŏng klei mdơ̆ng gơ̆ng anăn lŏ mâo dŭm bruă mkra dŭm mta mnơ̆ng ƀơ̆ng msĕ si ăm čĭm mnŭ, kđeh čĭm kbao... pioh ngă yang, lač jăk hdơr knga kơ yang brei leh sa thŭn êgao jăk êa hlĭm hjan, buh pla djŏ boh mnga kơ ƀuôn sang”.

Grăp thŭn leh jih yan puôt êmiêt, ƀuôn sang bi čuh kbao pioh ngă yang leh hrui êmiêt lu boh mnga kơ hjiê. Bi tơdah amâo mâo jăk boh mnga ôh, snăn knŏng mkŏ mjing mă điêt čuh mnŭ amâodah bê.

Grăp blư̆ ƀuôn sang mâo knăm čuh kbao, ngă yang mdiê mrâo, snăn bi mdơ̆ng gơ̆ng kŭt, gơ̆ng tlao. Gơ̆ng ngă yang knăm čuh kbao mơ̆ng mnuih Mạ mâo mbha dua mta gơ̆ng, gơ̆ng ngă yang mnăm kpiê čeh, gơ̆ng ngă yyang ƀơ̆ng kbao. Pô mbruă K’Brẻo, ƀuôn B’Sumrăc, să Lộc Tân, kdriêk Bảo Lâm, brei thâo, gơ̆ng ngă yang mnăm kpiê čeh mâo mdơ̆ng krah sang krum bi krah mkra hŏng lu mta rup msĕ si rup čĭm, rup hlô lehanăn rup čeh kpiê mâo kă ti gơ̆ng ngă yang anei. Bi gơ̆ng ngă yang pioh ƀơ̆ng kbao, dưi mdơ̆ng ti êngao mâo mprăp mkra prŏng hĭn. Êlâo kơ klei ngă yang, hưn mdah hĕ hŏng yang adiê aê aduôn atâo atiêt thâo. Pô mbruă K’Brẻo brei thâo:

“Čiăng kơ bruă mdơ̆ng gơ̆ng ngă yang djŏ klei bhiăn, snăn jih jang mnuih hlăm ƀuôn mprăp čeh kpiê, lehanăn sa drei mnŭ. Khua mduôn khăt êrah mnŭ lehanăn iêo yang êjai, hưn hŏng yang adiê thâo hrue anei mâo bruă ngă yang ƀơ̆ng kbao, amâodah ngă yang mơak leh hrui êmiêt mdiê kuê kơ sang, iêo jak yang adiê hriê huă mnăm hŏng ƀuôn sang.”

Tui si klei mĭn mnuih Mạ, gơ̆ng ngă yang yơh jing anôk kơ yang adiê dôk, lehanăn dưi hriê mă tŭ mnơ̆ng ngă yang. Kyuanăn yơh bruă mkra gơ̆ng ngă yang anei brei mâo mnơ̆ng mđup myơr jing kpiê, lehanăn čĭm. Khua ƀuôn jing mnuih mâo klei dưi kiă kriê ƀuôn sang, ngă bruă mdơ̆ng gơ̆ng ngă yang, phung êkei êdam mniê êra jih jang nao bi hgŭm, mâo mnuih nao hruič hwiê, mâo mnuih nao koh kram, mâo mnuih dôk krah mjing čiăng mdơ̆ng gơ̆ng ngă yang. Pô mbruă K’Brẻo lŏ lač:

“Gơ̆ng ngă yang srăng dưi mgơ̆ng ti gah sang kƀĭn ƀuôn, amâodah ti gah sang khua mduôn, khua ƀuôn. Êlâo kơ mdơ̆ng, phung êkei êdam hlăm ƀuôn jih jang nao bi đru rŭ mdơ̆ng. Gơ̆ng ngă yang srăng mâo mdơ̆ng leh khua mduôn ngă ênŭm klei bhiăn riu yang”.

Gơ̆ng ngă yang mnuih Mạ amâo mâo djŏ knŏng bi êdah ai tiê mơ̆ng ƀuôn sang hŏng yang adiê đuič ôh leh yan hrui êmiêt boh mnga, ƀiădah anei jing klei lŏ bi êdah sa mta klei thâo krah mjing mbruă, kơ sa knăm mơak bi knăl kơ klei êpa mhao hlăm klei hdĭp mâo klei êđăp ênang jăk mơak./.