Ana mngưi jing sa mta ana dlông mơ̆ng 4-10m, mnga kô̆ bi kmrŭ, čăt lu ti Lăn Dap Kngư leh anăn dŭm krĭng mkăn msĕ si Yŭ kwar Dhŭng. Ana mngưi khăng bi mnga mơ̆ng mlan 11 truh mlan 2 thŭn êdei snăn mboh. Ana mngưi pla pioh dlăng leh anăn lŏ mâo mnơ̆ng tŭ jăk.

Mnuih Êđê khăng mă knăt mda, truh kơ mnga, boh mngưi tŭk djam jăk yâo. Hlue si klei tŭk knă mơ̆ng dŭm krĭng mâo hdră mkra mjing dŭm mta djam tam mơ̆ng ana mngưi mdê mdê, Êđê Bih ti kdriêk Krông Ana mâo hdră tŭk msĕ si mnuih ƀuôn sang Yŭ kwar Dhŭng jing tŭk hŏng kan hdang. Amai H’Nuah Êban, Ƀuôn Trăp, wăl krah Ƀuôn Trăp, kdriêk Krông Ana, čar Dak Lak lač, anei jing mta djam mưng ƀơ̆ng mnuih ƀuôn sang, adiê êăt mâo thiăm mnâo djam phĭ, hăng, mmih leh anăn ƀâo mngưi mơ̆ng mnga djam mngưi jăk snăk.

 “Hmei khăng tŭk djam mnga mngưi hŏng trŏng phĭ leh anăn kan êa krông. Mbĭt hŏng lu amrêč hăng, êsŭn, hla êč. Mnga snăn pleh kuôp, mnga hlăm lam. Tŭk hŏng trŏng phĭ snăn dưm ƀiă ƀiă trŏng, ƀiădah amâo dưi kƀah ôh amrêč hăng, hla êč leh anăn êsŭn Êđê. Êngao anăn snăn dưi tŭk hŏng kan yao hlăm êa krông.”

 Bi amai H’Rut Niê, Ƀuôn Ky, ƀuôn hgŭm Thành Nhất, ƀuôn prŏng Ƀuôn Ama Thuôt, čar Dak Lak lač djam mơ̆ng mnga mngưi mâo nanao hlăm hlao êsei nao pĕ kphê, kyua ênưih ƀuh, ênưih tŭk leh anăn jăk snăk. Mta ana anei čăt lu, srai asăr hlăm war sang ăt čăt mơh. Ana knư̆ prŏng snăn mnga knư̆ lu. Mâo lu hdră tŭk djam mơ̆ng mnga mngưi, dưi k’ŭl leh anăn tak hŏng êa msĭn, đeh hŏng čĭm ŭn, čĭm êmô amâodah čĭm mnŭ ƀiădah mâo lu mnuih khăp hĭn ăt jing đeh hŏng kan krô amâodah kan hŭl. Amai H’Rut Niê brei thâo:

 “Hlăm dŭm mlan adiê êăt amâo dưi kƀah ôh djam mơ̆ng mnga mngưi. Kâo khăng pĕ, rao bi doh, ktĭ kuôp, leh anăn đeh hŏng kan krô amâodah kan hŭl leh anăn dưm mnơ̆ng bi mƀăt msĕ si amrêč, hra, êsŭn. Djam Êđê pô jăk snăk”.

Amai H’Rut Niê brei thâo, klei čiăng tŭk djam mnga mngưi jăk anăn jing hđeh kan êlâo, leh anăn đeh mnga mngưi, leh mnga djam ksă snăn plĕ kan, hŏng mnơ̆ng bi mƀăt snăn kơh kan đrêñ leh anăn adôk mnâo phĭ, mmih mơ̆ng mnga djam mngưi. Leh anăn sa mta amâo dưi kƀah ôh anăn jing êsŭn Êđê brei đeh êlâo kơ mplĕ mnga djam mngưi hlăm gŏ khang.

 Hŏng klei tŭk ênưih ƀiădah mnâo jăk, mnga djam mngưi jing djam mưng ƀơ̆ng hlăm grăp hruê anak Êđê. Djam anei bi hdơr kơ yan adiê êăt dôk giăm kpur pui mđao ƀâo mngưi, phĭ ƀơ ƀiă, mmih ƀơ ƀiă mơ̆ng mnga djam mngưi. Mưng ƀơ̆ng ƀiădah srăng ngă kơ phung đuĕ hiu kbưi hdơr nanao./.