Hlăm sa hrue knhal jih thŭn, kphê leh pĕ ênŭm kơ sang, amĭ ama mniê dôk ung H’Rin Bkrông ti ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt nao iêo yơh amiêt khua awa mduôn nao kơ sang amĭ ama ung, nao iêo wĭt anak mniê lehanăn ung gơ̆ wĭt kơ sang. Mâo hŏng anei 3 thŭn, H’Rin Bkrông tŭ ư dôk ung, leh mâo amiêt khua awa mduôn nao êmuh, leh klei bi čuôp dua nah găp djuê bi tŭ ư kơ H Rin đĭ dôk ti sang ung hlăm 3 thŭn. H’Yam Bkrông (aduôn Lian), ti ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt brei thâo, “đĭ dôk” jing klei lông dlăng kơ klei sĭt suôr, bi êdah knuih kniêng, klei thâo gĭr mơ̆ng mniê dôk ung êlâo truh kơ hrue bi kuôl.

Tơdah sa čô mniê đĭ dôk kơ sang ung snăn bi êdah knuih kniêng, thâo kreh kruiñ, sitôhmô aguah kgŭ ưm nao gui êa, knă êsei djam kơ jih gŏ sang êlâo kơ nao hma pưk... Mơ̆ng anăn gŏ sang ung srăng ƀuh anăn jing sa čô mtâo mniê kreh kruiñ, diñu srăng đao knang, hơĭt ai tiê hĭn kơ anak êkei pô nao dôk kơ sang mô̆ mgi dih.

Tui si klei bhiăn mnuih Êđê, mniê srăng đĭ dôk ti sang ung mơ̆ng 2 – 3 năm, tui hlue si klei bi tŭ ư mơ̆ng dua nah găp djuê, jing tui hlue si klei găl mơ̆ng sang mniê, kyuadah hlăm klei đĭ dôk mâo tĭng kơ sang êkei čoh ngăn pnŭ, brei sang tĭng kơ mniê mprăp bi ênŭm kñăm bi êdah klei thâo hdơr knga kơ ai tiê rông ba leh anak êkei jing ung kơ anak mniê pô.  H’Bluen Niê (aduôn Man Yô), ti ƀuôn Tơ̆ng Jŭ brei thâo, hlăm dŭm mnơ̆ng yap jing ngăn pnŭ hlăm klei kuôl kă, amâo mâo dưi kƀah ôh kông, abăn êđê, ŭn amâodah êmô. Tơdah êkei dôk mô̆ knư̆ thâo hră mơar, mâo bruă knuă snăn ênoh čoh ngăn pnŭ prŏng hĭn mơh. Siămdah sang êkei mâo klei dưi čoh ngăn pnŭ, snăn tĭng kơ sang mniê ăt mâo mơh klei dưi mjuă akâo lŏ mtrŭn tui si klei thâo mâo mơ̆ng sang mniê:

Sang êkei čoh msĕ snăn amâo mâo djŏ kyua anôk êkei pô mâo bruă knuă, čiăng bi êdah k’hưm tơdah nao dôk kơ sang mô̆. Mgi dih leh dua ung ng kơ sang mniê mô̆ nao hdĭp hjăn, snăn ăt đru dlăng ba mơh kơ jih dua nah găp djuê tĭng kơ sang mniê thâodah tĭng kơ sang ung, bi đru sơăi bruă knuă kơ jih dua nah.

Tơdah leh jih thŭn čoh đĭ dôk, tơdah tĭng kơ êkei mâo hĕ klei mĭn bi mlih amâo lŏ čiăng dôk ôh mnuih leh bi čuôp hŏng pô, snăn sang êkei nao bi êdah kơ sang mniê klei amâo lŏ čiăng anăn. Ƀiădah boh sĭt amâo jăk tuôm mâo ôh klei msĕ djuê anăn, tơdah leh mâo klei bi čuôp. Bi tơdah mâo mơh klei amâo lŏ čiăng dôk ôh, snăn sang tĭng kơ êkei srăng tăm ênua ba kđi êbeh kơ dua blư̆, hŏng jih jang ênoh tĭn kơ sang mniê leh mprăp brei ngăn pnŭ, lehanăn čuh sa drei êmô, amâodah sa drei ŭn prŏng ngă klei akâo pap mñai kơ sang mniê. Bi tơdah tŭ ư leh snăn tĭng kơ sang êkei iêo yơh sang mniê, ngă yơh klei iêo êkei nao dôk kơ sang mniê. Hlăm hrue nao wĭt kơ sang mniê, sang tĭng kơ êkei mprăp yơh sa čeh kpiê lehanăn sa drei ŭn čiăng atăt anak êkei pô, bi tĭng kơ sang mniê bi mprăp djăp ênŭm yơh ngăn pnŭ tui si sang êkei čoh čuăn, hlăk hrue bi mčuôp êlâo kơ đĭ dôk. Găp djuê tĭng kơ mniê srăng truh kơ sang êkei čiăng iêo wĭt dua ung mô̆ mrâo wĭt kơ sang amĭ ama mniê.

Êjai ktuê êlan wĭt kơ sang mniê, snăn dơ̆ng mơ̆ng sang êkei truh kơ sang mniê êpul nao dôk dua ung mô̆ wĭt kơ sang amĭ ama mô̆ srăng tuôm hŏng dŭm êpul phung êdam êra êkei mniê, ƀĭng găp gang ktuê êlan. Čiăng dưi găn klei anăn êpul nao iêo dua ung mô̆ srăng mâo klei bi mgăl thâo, lehanăn mđup brei mnơ̆ng msĕ si kông bi êdah klei jih ai tiê iêo ba êkei dôk mô̆ wĭt truh kơ sang mô̆. Mnuih Êđê bi lač, ktuê êlan knư̆ tuôm hŏng lu klei lông dlăng, klei gun kpăk snăn klei hdĭp dua ung mô̆ mrâo srăng dưi mơh găn jih klei lông dlăng hlăm klei hdĭp.

Leh truh kơ sang mniê, dua nah găp djuê srăng dôk lŏ bi blŭ yăl, lŏ mnă ai tiê klei mĭn dua čô ung mô̆ mrâo, lehanăn găp djuê dua nah. Leh kơ anăn kơh truh kơ klei kuôl kă sĭt êmĭt, kông bi lih êkei kơ mniê, mniê kơ êkei bi êdah klei ƀuăn rơ̆ng hdĭp sĭt suôr dua ung mô̆. Tơdah hlei pô duah êlan čiăng bi wĭt kông, snăn tŭ klei tăm ênua ba kđi êbeh kơ dua blư̆ lu hĭn ênoh leh kuôl kă, ênoh ngăn pnŭ leh čoh. Bi ruĕ klei bi kuôl, tơdah găp djuê dua nah bi tŭ ư kơ klei duah ung mô̆ mrâo wĭt kơ sang mniê, lehanăn mă klei hơêč hmưi mơ̆ng dua nah găp djuê, leh kơ anăn dua ung mô̆ srăng huă ƀơ̆ng mbĭt tal êlâo ti sang mô̆. Y- Quôk Niê, ti ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt, “êkei dôk mô̆” hlăm hrue mơak wĭt kơ sang mô̆ lač:

Kâo găn leh hlăm klei bhiăn đuĕ nao dôk kơ sang mô̆ mơ̆ng mnuih Êđê, mâo dŭm klei mtă mtăn mơ̆ng amiêt awa, jing yuôm bhăn snăk. Mơ̆ng anăưn lŏ thâo săng hĭn kơ klei bhiăn djuê ana pô. Anăn jing sa knhuah jăk siam, năng bi kriê pioh, đăm bi luič ôh, klei bhiăn pô.

Ară anei ênuk klei hdĭp đĭ kyar hĭn leh, mâo lu knhuah dhar kreh mrâo bi ñŭ kma mbĭt, ară anei anak Êđê ti Dak Lak mkŏ mjing klei bi kuôl ung mô̆ hlue knhuah ênuk mrâo mơh. Ƀiădah ti dŭm boh ƀuôn, ăt adôk djă pioh kjăp snăk knhuah gru dhar kreh djuê ana pô hlăm klei bi kuôl ung mô̆, mâo mkŏ mjing mđrĭn mbĭt. Y - Bhiu Byă (aê H’Jâo), ti ƀuôn Tơ̆ng Jŭ, să Ea Kao brei thâo, ti dŭm boh ƀuôn ară anei, klei bhiăn bi kuôl ung mô̆ hlue knhuah pô dơ̆ng mâo leh mơh klei bi mlih đa đa, kñăm čiăng bi djŏ hŏng ênuk ară anei:

 Klei bhiăn anei mâo leh mơ̆ng đưm, tơdah bi trôn gklei bi kuôl ung mô̆ snăn dua nah găp djuê mâo leh klei bi tŭ ư, brei anak mniê đĭ dôk kơ sang ung, djŏ tui si klei bhiăn jing 3 thŭn. Hlăm 3 thŭn anăn, mniê đĭ dôk. Leh kơ anăn găp djuê tĭng kơ mniê mkŏ mjing srăng mkŏ mjing klei nao iêo wĭt dua ung mô̆ wĭt kơ sang mniê. Ƀiădah ară anei, amâo jăk lŏ mâo lu ôh, jih jang klei čoh čuăn đĭ dôk anăn ngă hŏng klei bi ala sơăi, hlăm 3 thŭn đĭ dôk snăn bi ala hŏng mah, kreh ƀuh jing 3 aruăt mah, amâodah 2 aruăt mah bi ala kơ 3 thŭn đĭ dôk.

 Khădah mâo klei bi mlih tui sui knhuah jăk siam hlăm klei bhiăn bi kuôl ung mô̆, klei iêo wĭt kơ sang mô̆ ăt adôk djă pioh nanao hlăm dŭm boh ƀuôn. Klei anei đru bi kriê pioh leh knhuah gru jăk siam djuê ana pô./.