Hlăm dŭm hruê anei, ƀuôn Akŏ Dhông, ƀuôn prŏng Ƀuôn Ama Thuôt mâo lu tue hiu čhưn hlăm čar, êngao čar leh anăn wăt mnuih Việt Nam ti ala tač êngao wĭt drông Tết ti ƀuôn sang. Leh 30 thŭn kbưi hŏng ƀuôn prŏng khăp hơiêng, amai Nguyễn Kim Nguyên mnuih Việt Nam ti Mi bi kngăr snăk kyua mâo lu klei bi mlih ti ƀuôn sang, leh anăn ñu bi kngăr hĭn jing klei bi mlih ti ƀuôn sang, dôk đĭ kyar mrâo mrang mbĭt anăn dưi răng kriê knhuah dhar kreh djuê ana. Mnăm kphê ti adring sang dlông Arul House, amai Nguyễn Kim Nguyên brei thâo:

 “Kâo hriê tinei snăn khăp snăk. Tinei msĕ si čư̆ dliê êa, msĕ si jăk snăk, si pô ƀuh si lač yơh… mơak snăk”.

Hlăk êjai lu mnuih khăp kơ klei jăk mơak leh anăn siam ti Arul House snăn pô thâo mbruă êdah êdi Vũ Lân, sa čô mâo êbeh 40 thŭn siă suôr hŏng bruă ksiêm hriăm, răng mgang dhar kreh Lăn Dap Kngư, ƀuôn Akŏ Dhông leh anăn wăl dhar kreh Arul House lŏ jing klei êdah êdi mơ̆ng klei dhar kreh. Ñu lač mnơ̆ng kriê pioh dhar kreh čing char Lăn Dap Kngư đăm ôh jing kjăp sa anôk, ƀiădah brei bi mlih dôk nanao hlue thŭn mlan. Boh sĭt ti Arul House leh anăn ƀuôn Akŏ Dhông brei ƀuh anei jing sa hlăm dŭm hdră ngă čiăng kơ dhar kreh Lăn Dap Kngư dưi lŏ čuê hlăm klei hdĭp mrâo mrang:

 “Amâo djŏ knŏng djă pioh ôh diñu lŏ thâo mbruă mjing sa wăl mrâo msĕ si wăl Arul anei knŏng yua mnơ̆ng bi msiam jing mran čông hŏng kyâo amâodah rup krah hŏng kyâo anei lač kơ klei hdĭp mda aguah tlam ăt msĕ mơh klei mĭn mnuih ƀuôn sang leh anăn ară anei dinu dưm ti anei, anăn jing klei bi mlih ƀiădah jing bi mlih djŏ guôp. Ñu dưi djŏ hŏng wăl hdĭp mda brei đĭ kyar kơ hiu čhưn ênguê mjing phŭn hdĭp kơ mnuih ƀuôn sang hlăm ƀuôn”

ARul House jing sa anôk dôk lu gưl ênuk, mơ̆ng gŏ sang H’Len Niê, ƀuôn Akŏ Dhông, ƀuôn hgŭm Tân Lợi, ƀuôn prŏng Ƀuôn Ama Thuôt. H’Len, sa čô mniê ngă lŏ hma, kngan djă wăng, mra gui bŭng, kyua ktưn hưn kơ mnơ̆ng kriê pioh aduôn aê pô, grăp knhuang mkŏ mjing wăl dôk jưh gŏ sang pô jing sa êpul rang mdah dhar kreh Êđê leh anăn kdrăp mnơ̆ng, mnơ̆ng ƀơ̆ng huă anak Êđê.

 “Kâo khăp kâo bi mĭn leh anăn ngă amâo djŏ pô mnia blei ôh, Klei mâo anăn jing ênoh yuôm dhar kreh aduôn aê pioh kơ pô. Kyua Arul jing klei yăl dliê kơ klei hdĭp kâo, Arul jing anăn ama kâo, Kâo bi mĭn pô jing anak amĭ ama, jing sa čô mnuih Việt Nam snăn pô amâo dưi bi jhat hĕ ôh aduôn aê pô, lăn čar pô leh anăn pô ăt bi êdah hŏng klei hdĭp pô hlăm klei mă bruă knuă leh anăn klei blŭ tlao nao htiê leh anăn pô ktưn hưn.”

Klei khăp kơ dhar kreh Êđê, khăp kơ knhuah dhar kreh gŏ sang, djuê ana leh anăn ƀuôn sang, jing boh kdrŭt kơ H’Len Niê mkŏ mjing wăl dhar kreh Arul House. Hŏng klei gĭr leh anăn hŏng klei đru jih ai tiê, mniê Êđê ngă lŏ hma ti Ƀuôn Akŏ Dhông mkŏ mjing leh tŭ jing Arul House jiă kma knhuah dhar kreh Êđê. Ƀiădah leh anôk bruă anei dưi mkŏ mjing, H’Len Niê tlă anăp hŏng klei mâo êngao kơ klei dưi pô, anăn jing duah djăp prăk čiăng kơ Arul House dưi dôk nanao. Leh anăn ñu bi tuôm hŏng Trần Thị Châu Phương, pô mâo klei thâo hlăm bruă hiu čhưn ênguê ti Hội An leh anăn ƀuôn prŏng Hồ Chí Minh. Leh anăn ară anei, Trần Thị Châu Phương jing Khua kiă kriê Arul House:

“Hlăk anăn kâo weh čhưn hŏng neh H’Len hŏng klei jing sa čô tuê hiu čhưn. Kâo ăt bi mĭn mơh ya ngă sa čô mniê Êđê mâo klei dưi ngă snăn, hŏng kâo jing sa čô tue hiu čhưn ƀuh klei anăn yuôm bhăn snăk anăn kâo hrăm mbĭt hŏng ñu. Boh sĭt kâo ka dưi ngă yam ta klei kơ Arul ôh, kâo ƀuh ƀuôn sang hdĭp jăk snăk, mrâo mrang ƀiădah ka mâo mnuih lŏ mkŏ dăp đuč. Ti sang grăp čô mnuih ya mta ƀơ̆ng aguah tlam, knăm mơak snăn digơ̆ tŭk knă, kâo knŏng jing pô lŏ dăp bi msiam hĭn đuč, bi knhuah dhar kreh mâo êlâo leh. Mơ̆ng anak mnuih grăp čô digơ̆ snăn mơ̆ng anăn Arul dưi mkŏ mjing grăp hruê.”

Ară anei Arul House jing leh sa anôk mưng truh hŏng phung tue hlăm ala čar leh anăn ala tač êngao tơdah hriê ti kdrăn kphê Ƀuôn Ama Thuôt. Tơdah sa hruê kdrăm kơah ti ƀuôn prŏng Ƀuôn Ama Thuôt ruĕ leh, dram pui trơ̆ng ti wăl tač Arul house. Ênai čing kwang kdrăm kơah, ênai eirei êdu êun leh anăn kngan hlăm kngan kdŏ čhuang bŏ hŏng klei khăp, mkŏ mnuih ƀuôn sang ƀuôn Akŏ Dhông hŏng tue hiu čhưn djăp anôk jing sa êpul êya./.