Knăm hdơr hruê djiê Mtao Hùng - Knăm mơak sang yang Hùng leh anăn hruê kăm dhar kreh hiu čhưn ênguê ƀuôn sang phŭn agha thŭn Giáp Thìn 2024 kyua čar Phú Thọ mkŏ mjing kñăm mpŭ kơ knhuah gru khăp kơ lăn čar, kơrŭ wĭt klei bhiăn “Mnăm êa hdơr kơ hnoh” leh anăn ai ktang bi hgŭm jih jang djuê ana mđing kơ phŭn agha, hdơr knga kơ phŭn agha; răng mgang leh anăn mđĭ lar ênoh yuôm dhar kreh mguôp hŏng mđĭ kyar hiu čhưn ênguê hlăm ƀuôn sang phŭn agha. Knăm mơak thun anei mâo lu bruă hâo hưn, mtô mblang, hưn mdah mnơ̆ng kriê pioh dhar kreh Việt Nam mâo 2 kdrêč jing knăm mơak leh anăn klei bhiăn ngă yang.

Hlăm gưl anei, ti Wăl mnơ̆ng kriê pioh hƀuê ênuk sang Yang Hùng mkŏ mjing lu klei bhiăn djuê ana msĕ si: Knăm myơr brui mngưi bi hdơr kơ phung mtao Hùng leh anăn Knăm myơr mnga ti rup “Awa Hồ blŭ hrăm hŏng phung knuă druh, lĭng kahan ba anăp”; Knăm hdơr kơ Đức Quốc Tổ Lạc Long Quân; knăm myơr brui mngưi kơ Tổ Mẫu Âu Cơ leh anăn knăm myơr brui mngưi mơ̆ng dŭm kdriêk, ƀuôn prŏng ti sang Yang Hùng; êngao anăn, mâo dŭm bruă dhar kreh djuê ana, kdŏ mmuiñ…