Kñăm răng kriê dhar kreh čing čhar hlăm klei hdĭp êpul êya mnuih djuê ƀiă, thŭn êgao, bruă djŏ tuôm ti čar Kon Tum mkŏ mjing leh lu adŭ mto bi hriăm kơ klei thâo, hdră mnêč tông čing, kdŏ čhuang leh anăn klei tông čing djuê ana kơ phung êdam êra. Pô mbruă mda asei A Huyền jing êdam êra mnuih Sêdang mtô kơ 30 čô êdam êra wăl krah Đăk Tô kơ klei thâo, hdră mnêč tông čing, kdŏ čhuang leh anăn klei tông čing djuê ana Sêdang.

“Kyua kâo ƀuh ară anei phung khua mduôn thâo hlăp kdrăp djuê ana pô amâo lu ôh, anăn kâo bi mĭn brei lŏ čuê leh anăn mtô kơ phung mda asei, mtô kơ ênuk mda asei thâo anei jing kdrăp djuê ana pô, snăn pô mđĭ kyar ñu, čiăng kơ ƀĭng găp hlăm ala čar leh anăn ala tač êngao thâo lu hĭn kơ knhuah gru pô, kdrăp djuê ana pô.”

Leh hriăm jing klei hriăm leh anăn hdră nao hriăm bruă tă kčoh ti Malysia, ayŏng K’Jô Na (mnuih djuê ana K’Ho) lŏ wĭt hŏng alŭ wăl kčưm ngă bruă tă kčoh, mkŏ mjing lu mta mnơ̆ng dhơ̆ng hŏng mnal pơ̆k mñam ti ƀuôn prŏng Đà Lạt, čar Lâm Đồng, Ayŏng K’Jô Na brei thâo:

“Pô jing anak čô hlăm ƀuôn sang K’Ho kyuanăn khăp leh anăn ktưn hưn hŏng dhar kreh djuê ana pô. Hlăm anăn, pơ̆k mñam jing mnơ̆ng thơ̆ng nao mbĭt hŏng pô mơ̆ng điêt êjai aduôn, amĭ dôk pơ̆k mñam. Truh kơ prŏng kâo čiăng ba mnơ̆ng pơ̆k mñam truh hŏng lu mnuih hĭn, lu anôk hĭn. Kâo ăt hmăng hmưi hŏng klei pô mkra mjing mơ̆ng mnơ̆ng pơ̆k mñam djuê ana Lăn Dap Kngư dưi truh hŏng jih jang, jing mrâo mrang hĭn, đru kơ grăp čô khăp thiăm kơ dhar kreh djuê ana hĭn”.