Sa hlăm dŭm boh tŭ êdah êdi jing hlăm thŭn êgao, Sang mđung asăp blŭ Việt Nam mâo mă 170 klei pah mni bruă klei mrâo dŭm mta.

Thŭn êgao, Sang mđung asăp blŭ Việt Nam hâo hưn pral, kluôm ênŭm dŭm boh klei mrâo, bruă kđi čar, bruă duh mkra, ala ƀuôn, dhar kreh, hiu čhưn ênguê, mjuăt ktang asei mlei hlăm lăn čar, mbĭt anăn hmao gĭt gai, tă hdră hlăm bruă hâo hưn dŭm boh klei tar rŏng lăn, hmao bi klă klei mĭn mơ̆ng Đảng, knŭk kna ti anăp dŭm boh klei prŏng, hlăm anăn mâo klei bi blah Russia – Ukraine, Israel – Hamas. Ba mdah 15 bruă klam hlăm thŭn 2024, Sang mđung asăp blŭ Việt Nam lŏ dơ̆ng nao klă hŏng klei gĭt gai mơ̆ng knŭk kna, Khua knŭk kna čiăng hluê ngă bruă klam dưi jao, hâo hưn pral, djŏ mmông, kluôm ênŭm dŭm boh klei hlăm leh anăn êngao lăn čar, dŭm hdră êlan gĭt gai mơ̆ng knŭk kna kñăm hluê ngă tŭ jing mta kñăm mđĭ kyar bruă duh mkra ala ƀuôn, mkŏ mjing tŭ jing Klei mđung asăp kluôm ala gưl tal 16, hur har nao hgŭm hlăm dŭm klei bi lông bruă klei mrâo hlăm leh anăn êngao lăn čar…Ăt ti tlam mbruê, Bruă Đảng Sang mđung asăp blŭ Việt Nam ngă bruă ksiêm wĭt bruă mkŏ mjing Đảng thŭn 2023, ba mdah bruă klam thŭn 2024.