Dôk êbat jơ̆ng ti ktuê êlan điêt hlăm Đang dliê knŭk kna mkuôm Yok Đôn, krĭng să Krông Ana, kdriêk Ƀuôn Đon, čar Dak Lak, êman ana H’Blú ƀuh mnơ̆ng ƀơ̆ng mâo klei hưn mtam hŏng găp pô. Ti tluôn êman H’Blú, êman ana Khăm Phanh ăt pral êbat nao ti anăp ƀơ̆ng dŭm ƀĕ ana mtei mâo koh leh. Leh ƀơ̆ng diñu êbat nao phă hang êa mnăm lehanăn mnei tinăn êjai mâo lu phung tuê hiu čhưn dôk dlăng kơ diñu.

        Grăp klei ngă mơ̆ng 2 drei êman anei jăk êdi, arăng amâo duah kpĭ brei ngă snei ngă sdih. Phung tuê dôk ti anôk êđăp ênang mơh kăp dlăng lehanăn hmư̆ phung atăt tuê hiu čhưn mblang lehanăn hưn mthâo kơ êman. Amai Phan Ngọc Quế Lâm, phung tuê hiu čhưn alŭ 11, ƀuôn prŏng Hồ Chí Minh nao hlăm hdră anei brei thâo:

        “Pô ƀuh êman msĕ si dôk hlăm dliê, năng ai êman pô ƀuh jăk mơh hlăk dưi dôk hdĭp hlăm wăl anôk snăn. Êman jing sa mta hlô mnơ̆ng dôk hlăm dliê kmrơ̆ng gơ̆ dôk hlăm anei srăng jăk hĭn mơh. Mâo pô kăp ktrâo atăt hiu čhưn thâo lu klei hâo hưn kơ êman jăk êdi, čang hmăng kâo pô srăng mâo lu klei thâo săng hĭn mơh.

        Hdră tui ksiêm anei jing tuôr hiu čhưn lăn mnga êa m’ak jăk hŏng Wăl hdĭp mda mâo Đang dliê knŭk kna mkuôm Yok Đôn lehanăn Êpul bruă hlô mnơ̆ng Asi bi hgŭm hluê ngă mơ̆ng thŭn 2018. Hŏng mta kñăm krơ̆ng kjăp êpul êman ti Dak Lak ti anăp êpul êman ƀrư̆ hruê ƀrư̆ awăt, kyua khua thŭn leh, amâo lŏ mâo ai. Ară anei, mâo 10 drei êman nao hlăm hdră anei, hlăm anăn mâo 6 drei êman ana kreh bi tuôm hŏng phung tuê hiu čhưn ênguê. Hluê si Ayŏng Phạm Xuân Quỳnh, knuă druh Êpul bruă hlô mnơ̆ng Asi, dŭm drei êman nao hlăm hdră anei dưi phưi êngiê hlăm wăl dliê kmrơ̆ng, amâo tling hŏng klei săngđai lehanăn amâo kpĭ brei ngă bruă hluê si mnuih ciăng. Bi hrô hŏng bruă dôk đĭ ti rŏng êman, phung tuê dlăng mơ̆ng kbưi, dlăng êman ƀơ̆ng mnơ̆ng, mnăm êa, mnei, hlăp hlăm dliê… amâo sô̆ ti êman, amâo hmăi truh kơ klei hdĭp êman.

 “Pô êman amâo djă knuh msei, amâo mâo knuh kyâo, knŏng mâo dŭm hnư mnơ̆ng pah mni kơ êman čiăng kơ êman ƀơ̆ng lehanăn ngă hluê ñu. Pô knŏng ba yua dŭm hdră ngă snăn čiăng đru kơ êman lŏ wĭt hdĭp msĕ si dôk hlăm dliê kmrơ̆ng, ñu srăng thâo ti anôk ñu duah mnơ̆ng ƀơ̆ng, si mdrao pô tơdah ruă, si srăng dlăng kriê asei pô. Ƀrŭ ƀrư̆ êman srăng ƀuh jăk ai tiê hĭn, suaih hĭn. Mnơ̆ng ƀơ̆ng, êa mnăm djŏ hŏng klei ñu čiăng. Êmam srăng hdĭp jăk hĭn.

        Hlăm 6 thŭn êgao, Đang dliê knŭk kna mkuôm Yok Đôn drông lu phung tuê hriê čhưn tui ksiêm kơ lăn dliê, êman tinei. Thŭn 2023, tuôr hiu čhưn anei mâo  Anôk bruă Êdah kdlưn hĭn Việt Nam hưn mthâo jing sa hlăm 20 hdră hiu čhưn jăk êdi ti Việt Nam. Ayŏng Y Siêm Hđơ̆k, pô ktrâo atăt tuê hiu čhưn ti Đang dliê knŭk kna mkuôm Yok Đôn brei thâo: Bruă tŭ yap anei brei ƀuh gru hmô amâo djŏ knŏng hmăi jăk kơ êman lehanăn wăl hdĭp mda ƀiădah lŏ mâo phung tuê hiu čhưn ênguê khăp, sa ai.

 “Tour tui ksiêm kơ êman jing tuôr jak iêu lu phung tuê hiu čhưn hlăm lehanăn êngao ala čar hĭn, kñăm ba wĭt boh tŭ jăk kơ êman. Hlăm hdră tui ksiêm anei, pô srăng m’ĭt asăp hưn mthâo truh kơ phung tuê hiu čhưn khăp hĭn kơ êman”.

          Mbĭt hŏng gru hmô hiu čhưn jăk kơ êman, phung tuê tơdah truh ti Đang dliê knŭk kna mkuôm Yok Đôn ăt dưi tui ksiêm kơ dŭm bruă mkăn msĕ si: waih mran ti êa krông Sêrêpôk, wah kan, tui ksiêm kơ dliê yan bhang, dlăng, mă rup hŏng čĭm, êbat hlăm dliê… Vũ Đức Giỏi, K’iăng khua Anôk bruă răng mgang wăl hdĭp mda, Đang dliê knŭk kna mkuôm Yok Đôn brei thâo, êpul mâo lu jơr hdră hiu čhưn čiăng jak iêu tuê hiu čhưn ênguê.

 “Đang dliê ăt hưn mthâo hdră hiu čhưn mkrah hruê amâo dah jih sa hruê čiăng nao dlăng êman amâo dah mkŏ mjing dŭm tuôr hiu čhưn bhiâo hĭn djŏ guôp hŏng klei găl mâo, klei čiăng mơ̆ng phung tuê hiu čhưn. Anăp anei, leh ară anei ngă leh, Đang dliê knŭk kna mkuôm Yok Đôn srăng iêu mthưr phung duh bi liê bi mguôp, hgŭm mbĭt, amâo dah mưn wăl anôk dliê čiăng arăng duh mđĭ kyar hlăm wăl anôk anei.

Lu jơr mnơ̆ng dhơ̆ng, lu hlô mnơ̆ng, ana kyâo mtâo yuôm hin, Đang dliê knŭk kna mkuôm Yok Đôn jing anôk mâo lu mta mnơ̆ng ƀơ̆ng, êa mnăm lehanăn klei găl mâo djŏ tuôm hŏng êpul êman Dak Lak hdĭp, msĕ si dưi dôk hlăm dliê kmrơ̆ng mtam. Mơ̆ng anăn, mjing klei găl dưi răng mgang êpul êman sui thŭn mlan, suaih pral lehanăn dưi êrô êbat êngiê hlăm dliê mbĭt anăn mjing sa hdră hiu čhưn ênguê jăk ti Dak Lak./.