Adiê ang dar dŭm hruê akŏ thŭn mrâo, khua mduôn Đinh Chuyên ƀuôn Mơhra -  Đáp, să Kông Lơng Khơng, kdriêk Kbang, čar  Gia Lai dôk mgăl čing kơ rĭng čing đưm. Ñu brei thâo, dŭm boh čing anei mâo leh hŏng ƀuôn êbeh êtuh thŭn leh, jing mnơ̆ng yuôm bhăn aduôn aê lui brei kơ ƀuôn sang. Ñu pioh leh lu mmông mtô bi hriăm dua êpul tông čing hlăm ƀuôn, boh nik jing êpul phung mda asei čiăng duh kơ tue jĕ giăm taih kbưi hlăm yan mnga truh.

 "Jih jang mnuih Bahnar tinei jih ai tiê bi mni kơ Đảng leh anăn Knŭk kna mjing leh klei găl kơ mnuih ƀuôn sang dưi mđĭ kyar hiu čhưn ênguê êpul êya bruă êlâo dih hmei ka thâo ôh. Ară anei, tơdah hiu čhưn ênguê mâo leh snăn hmei gĭr mtô kơ anak čô tông čing bi raih čiăng duh kơ tue hiu čhưn leh anăn răng kriê dhar kreh djuê ana pô. Mơ̆ng anei snăn kâo ăt akâo kơ Knŭk kna đru kơ alŭ wăl mkra sang roong čiăng duh kơ hiu čhưn ênguê leh anăn răng kriê dhar kreh sang roong mnuih Bahnar".

Ƀuôn Mơ Hra –Đáp mâo 226 gŏ êsei, 874 čô mnuih, hlăm anăn 96% ênoh mnuih ƀuôn sang jing mnuih Bahnar. Tơdah msĕ si êlâo dih, mnuih ƀuôn sang mơ̆ng ƀuôn knŏng mưng hŏng bruă pưk hma, nao pưk nao hma snăn dŭm thŭn hŏng anei, diñu ngă leh bruă mrâo mrang: Ngă hiu čhưn ênguê hlăm ƀuôn pô mtam. Mơ̆ng bruă mđĭ kyar hiu čhưn ênguê, phung mniê êkei hlăm ƀuôn lŏ thâo hrĭ mñam,  pơ̆k mñam leh anăn lu mnuih lŏ thâo mkra kdrăp tông ayŭ djuê ana msĕ si goong, t’rưng, k’ni, klông put. Boh nik, čiăng mđĭ kyar hiu čhưn ênguê, mnuih ƀuôn sang tinei dưi hgŭm mtô bruă knuă, hriăm mbŏ klei thâo kơ hiu čhưn ênguê êpul êya kyua kdriêk mkŏ mjing.  Ayŏng Đinh Phớt, mnuih ƀuôn sang ti ƀuôn brei thâo:

"Leh mâo hdră kčah ngă hiu čhưn ênguê êpul êya snăn mơ̆ng khua mduôn truh kơ mnuih ƀuôn sang hlăm ƀuôn mơak, mơ̆ng anăn ƀuôn mâo mkŏ mjing leh sa êpul tông čing, sa êpul pơ̆k mñam, sa êpul krah rup leh anăn sa êpul thơ̆ng atăt tue hiu čhưn dlăng. Jih jang bruă hiu čhưn ênguê hmei hriăm mơ̆ng anôk mkăn. Mnơ̆ng dhơ̆ng hiu čhưn ênguê mđĭ leh prăk hrui wĭt kơ mnuih ƀuôn sang”.

 Gru hmô hiu čhưn ênguê êpul êya ti Mơhra-Đáp ba klei lông dlăng jăk siam kơ tue hiu čhưn mơ̆ng bruă ngă msĕ si: lông dlăng klei tông čing, ksiêm hriăm kơ klei khan, lông pơ̆k mñam leh anăn ƀơ̆ng mnơ̆ng jăk djuê ana. Ayŏng Đặng Ngọc Huy, tue mơ̆ng ƀuôn prŏng Hồ Chí Minh bi mni kơ klei dôk hrông hlăm dhar kreh ti ƀuôn.

“Hlăk êjai anôk mkăn gĭr lŏ mkŏ mjing snăn tinei adôk hrông ênoh yuôm, mnuih ƀuôn sang tinei bi mlih čiăng dưi răng mgang ênoh yuôm dhar kreh djuê ana pô, dưi mâo ênoh yuôm, hnơ̆ng čuăn djŏ guôp čiăng duh kơ tue hih čhưn hlăm êdei anăp.”

Ƀuh klei găl đĭ kyar, Knơ̆ng bruă sang čư̆ êa kdriêk Kbang, čar Gia Lai ba leh Mơhra-Đáp hlăm hdră kčah bi liê phŭn hŏng bruă mkŏ mjing gru hmô răng mgang wăl hdĭp mda êpul êya mnuih Bahnar. Hdră bruă anei dôk hlăm jar  Hdră bruă răng mgang, mđĭ lar ênoh yuôm dhar kreh djuê ana mguôp hŏng mđĭ kyar hiu čhưn ênguê wưng 2021-2025 ti čar Gia Lai.Nguyễn Tấn Thành, Khua Êpul hgŭm hiu čhưn ênguê čar Gia Lai, lač:

“Hlue si kâo čiăng kơ hiu čhưn ênguê êpul, gru hmô hiu čhưn ênguê êpul êya đĭ kyar ti čar čiăng ênưih ngă snăn Knơ̆ng bruă sang čư̆ êa čar kdriêk anăn lŏ lač kơ gru hmô ƀuôn hiu čhưn ênguê êpul êya Mơhra – Đáp čiăng hlăm hdră ngă bruă ƀuh ya klei jăk hĭn, ka dưi ngă čiăng mơ̆ng anăn mblang, lŏ ksiêm dlăng bi leh hdră gru hmô anei.”

Hŏng klei gĭr răng kriê leh anăn mđĭ lar dhar kreh djuê ana, ƀuôn Mơhra-Đáp, să Kông Lơng Khơng, kdriêk Kbang hlăk ƀrư̆ jing anôk mngač hlăm hlak kak hiu čhưn ênguê êpul êya Lăn Dap Kngư. Anei amâo djŏ jing anôk tue hiu čhưn duah čiăng ksiêm dlăng dhar kreh Bahnar ôh ƀiădah lŏ bi mklă kơ klei bi mguôp jăk plah wah răng mgang dhar kreh leh anăn mđĭ kyar hiu čhưn ênguê hơĭt kjăp. Kdriêk Kbang, čar Gia Lai čang hmăng mơ̆ng Hdră răng mgang, mđĭ lar ênoh yuôm dhar kreh djuê ana mguôp hŏng mđĭ kyar hiu čhưn ênguê wưng 2021-2025 srăng ba yua ênoh yuôm mnơ̆ng kriê pioh hƀuê ênuk dhar kreh klei hdĭp mnuih djuê ƀiă čiăng mđĭ kyar hiu čhưn ênguê ti alŭ wăl.