Hlăm kdrăp čŭt hơô djuê ana jăk siam, mniê êra K’ho Ka Bình, mnuih hgŭm hlăm Êpul bruă Oh Mi Koho Coffee ti să Đinh Trang Hòa, kdriêk Di Linh, čar Lâm Đồng brei thâo leh klei ktưn hưn kơ kdrăp čŭt hơô mơ̆ng djue ana pô. Lehanăn, čiăng siam hĭn, ñu lŏ mkra hluê knhuah ênuk mrâo, djŏ guôp hŏng gưl thŭn ênuk ară anei.

“Kâo mơak lehanăn ktưn hưn êdi dưi čŭt hơô kdrăp djuê ana K’ho pô. Kyua hruê anei, mâo lu wưng čiăng dưi hơô msĕ si knăm mơak, bi kuôl ung mô… Mnơ̆ng pơ̆k mñam ară anei dưi kčoh, mñam hluê knhuah ênuk mrâo msĕ si ao dai mơ̆ng mnuih djuê ana Yuăn, mơiêng dlông, mơiêng kđơt mơ̆ng mnuih Êgar Yŭ. Kâo khăp êdi leh ƀuh kdrăp čŭt hơô djuê ana dưi mkra msĕ snăn, jăk găl êdi hlăm klei hdĭp aguah tlam. Dưi čŭt hơô kdrăp djuê ana K’ho pô, kâo mơak êdi yơh…

Bi Ka Duch – sa čô mniê K’ho ti alŭ 5B, să Đinh Trang Hòa, kdriêk Di Linh, čar Lâm Đồng, mñă mnơ̆ng pơ̆k mñam jing sa kdrêč yuôm bhăn êdi hlăm klei hdĭp mnuih djuê ana K’ho.

“Kâo mơak lehanăn ktưn hưn êdi hlăk dưi hơô kdrăp djuê ana pô. Mnơ̆ng pơ̆k mñam yuôm bhăn êdi, knŏng čŭt hơô hlăm dŭm hruê Têt – hat, knăm mơak, nao bi kƀĭn amâo dah dŭm knăm mơak dhar kreh amâo dah nao kdŏ mmuñ ti alŭ, ti să. Dŭm hdră dhar kreh dưi mkŏ mjing, kâo lŏ mâo klei găl dưi čŭt hơô kdrăp djuê ana pô”.

Kdlưn hĭn kơ boh tŭ yuôm mơ̆ng klei jăk siam, mnơ̆ng pơ̆k mñam lŏ mâo boh tŭ yuôm hlăm klei hdĭp dhar kreh, ai tiê klei mĭn mguôp hŏng klei hdĭp mơ̆ng mnuih K’ho. Ka Thu, mnuih djuê ana K’ho, giăm 60 thŭn ti să Đinh Trang Hòa, kdriêk Di Linh brei thâo:

“Kâo bi mklă mnơ̆ng pơ̆k mñam mơ̆ng djuê ana pô dơ̆ng mơ̆ng đưm êlâo gơ̆ yuôm bhăn êdi hlăm klei hdĭp êpul êya pô. Kâo dưi hdĭp hlăm sa gŏ sang mâo lu ênuk gưl, kâo ƀuh klă klei yuôm bhăn mơ̆ng mnơ̆ng pơ̆k mñam hlăm klei hdĭp grăp hruê. Mơ̆ng bruă kkiêng anak, mâo abăn pơ̆k mñam kăp ƀă anak. Tơdah mkŏ mjing klei bi êmuh ung mô̆, bi kuôl… ăt čŭt hơô kdrăp djuê ana pô dlăng jăk siam êdi djŏ guôp hŏng klei bhiăn djuê ana pô. Kyua anăn, kâo mprăp mâo nanao mơiêng ao. Mnơ̆ng pơ̆k mñam jing sa mta mnơ̆ng amâo dưi kƀah ôh hlăm knăm bi kuôl ung mô̆ mơ̆ng djuê ana pô. Boh nik, jing hruê knhal tuič hlăm klei hdĭp pô, wĭt hŏng aê aduôn atâo atiê, mâo mơh mnơ̆ng pơ̆k mñam djuê ana mbĭt. Tơdah amâo mâo srăng hêñ snăk hŏng mnuih ƀuôn sang hlăm ƀuôn.

Kbiă hriê mơ̆ng klei mâo hlăm klei hdĭp, mnơ̆ng pơ̆k mñam mơ̆ng dŭm djuê ana ƀiă ti Lăn dap kngư, hlăm anăn mâo mnuih K’ho ti čar Lâm Đồng dôk mâo phung mda asei kriê pioh lehanăn mđĭ kyar. Hlăm anăn, Ka Thuân, mnuih djuê ana K’ho, Khua bruă Đoàn êdam êra alŭ 5B, să Đinh Trang Hòa, Di Linh, Lâm Đồng jing sa gru mngač êdah êdi hlăm hdră mphŭn čô̆ kơ bruă mơ̆ng mnơ̆ng pơ̆k mñam djuê ana. Jing mnuih hgŭm hlăm Êpul bruă phung thâo hră mda asei mơ̆ng să Đinh Trang Hòa, Ka Thuân mkŏ mjing leh adŭ mtô bi hriăm pơ̆k mñam, mtô kčoh kơ ênuk gưl mda asei, bi hgŭm hŏng phung mniê hlăm alŭ wăl pŏk anôk tă kčoh, đru kơ amai adei mkra mđĭ klei hdĭp. Amai Ka Duch jing sa hlăm dŭm čô êdam êra alŭ wăl hrăm mbĭt hŏng Ka Thuân čiăng mđĭ kyar bruă anei brei thâo:

“Kâo čiăng hrăm mbĭt hŏng phung amai adei alŭ 5B anei hrăm mbĭt kriê pioh knhuah gru mơ̆ng djuê ana pô. Hmei čang hmăng lŏ mâo thiăm prăk duh čiăng kơ hmei lŏ dơ̆ng mđĭ kyar anôk bruă, iêu mthưr phung amai adei hlăm alŭ amâo mâo bruă mă gĭr bi hgŭm hŏng hmei. Čiăng kơ amai adei mâo hnư hrui wĭt, đru kriê pioh knhuah gru aê aduôn pô. Kâo lač jăk kơ amai Ka Thuân mjing leh klei găl đru kơ hmei mâo klei găl duei hgŭm hlăm hdră bruă anei.

Hŏng klei khăp kơ knhuah dhar kreh djuê ana lehanăn ai tiê mĭn mrâo amâo mdei, Ka Thuân ba leh ai êwa hdĭp mrâo kơ bruă pơ̆k mñam djuê ana, hŏng hdră čŏng pô mkra, pơ̆k mñam dŭm mta mnơ̆ng jiă knhuah ênuk mrâo ƀiădah ăt krơ̆ng kjăp knhuah mdê hjăn mơ̆ng djuê ana K’ho./.