Hrŏ 10% ênoh gŏ êsei ƀun ară anei mkă hŏng dŭm thŭn êlâo, anei jing ênoh   mâo klei čang hmăng, boh nik amâo mĭn ôh dưi ngă hlăm bruă hlue ngă hdră bi hrŏ ƀun kjăp ti dŭm alŭ wăl Yŭ kwar Dưr grăp thŭn, kyua boh sĭt, ênoh mrô dưi mâo knŏng kah knar mơ̆ng 3 – 4%. Ƀiădah ti kdriêk knông lăn Sông Mã, čar Sơn La, hlăm 3 thŭn hŏng anei, ênoh bi hrŏ ƀun dưi mâo grăp thŭn ti ênoh êbeh 10%. Dŭm să msĕ si Chiềng Khoong, Mường Hung… ênoh dưi mâo adôk lu hĭn. Đặng Văn Cương, K’iăng Khua Knơ̆ng bruă sang čư̆ êa să Chiềng Khoong, kdriêk Sông Mã, čar Sơn La brei thâo:

Hlăm dŭm thŭn mrâo êgao să Chiềng Khoong hrŏ leh mơ̆ng 10 truh 14% gŏ êsei ƀun, msĕ si thŭn 2023 jing 14%; hdră kčah ngă thŭn 2024 jing 12%.

Hlue si Cương, mâo boh tŭ msĕ snăn jing kyua dŭm gưl bruă Đảng, bruă sang čư̆ êa dŭm gưl mơ̆ng čar truh kdriêk, să jih ai tiê hlăm bruă bi mlih ana pla mjing, mnơ̆ng rông hlue si hdră mđĭ kyar dŭm mta ana pla mjing, mnơ̆ng rông mâo ênoh yuôm, djŏ guôp hŏng klei găl ti alŭ wăl. Msĕ si să Chiềng Khoong, ba yua klei găl lăn sang prŏng siam, hlue ngă hdră êlan mơ̆ng čar, kdriêk kơ klei mlih mrâo ênhă ana ktơr, hbei ƀlang amâo tŭ dưn ba pla ana boh kroh, truh ară anei, ênhă ana boh kroh mơ̆ng să mâo giăm 1.400ha; hlăm anăn hjăn boh êrang êbeh 1.100 ha.

 Ti čar Yên Bái, bi mklă hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng wưng 2021-2030 jing hdră êlan mdê hĭn hlăm bruă hlue ngă hdră kñăm mđĭ kyar kjăp krĭng mnuih djuê ƀiă leh anăn krĭng čư̆ čhiăng, kyua anăn alŭ wăl mđĭ lu hdră msir čiăng hlue ngă hdră anei. Hlăm anăn, êngao kơ dŭm klei bi kƀĭn hriăm mjuăt, Yên Bái ăt mđing kơ bruă mkŏ mjing dŭm êpul nao hriăm ti dŭm čar mkăn mâo gru hmô bruă duh mkra tŭ dưn, kñăm bi mlih klei mĭn, mđĭ klei thâo săng kơ mnuih djuê ƀiă hlăm bruă mđĭ kyar bruă duh mkra leh anăn mđĭ hdră bi hrŏ ƀun kjăp. Ayŏng Giàng A Tuấn, ti să La Pán Tẩn, kdriêk Mù Cang Chải, Yên Bái brei thâo:

        Leh pô hriăm snăn pô mâo bruă hlăm kngan, mâo bruă knuă mă; mă bruă sa hruê dưi mâo 400-500 êbâo prăk.

Êngao kơ ênoh prăk Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng wưng 2021-2030, mơ̆ng akŏ wưng truh ară anei, čar Yên Bái ăt iêô mkrum mơ̆ng lu phŭn prăk čiăng mâo êbeh 12 êbâo êklai prăk čiăng mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng, kƀĭn hlăm bruă đru mkra mjing, bi liê mkŏ mjing anôk bruă nah gŭ, êlan klông, sang hră, mdrao mgŭn, bi hrŏ ƀun, mkŏ mkra krĭng ƀuôn sang mrâo… Kyua anăn, ênoh gŏ êsei ƀun kluôm čar thŭn 2023 hrŏ leh 3,76%, êbeh hdră kčah jing 3,5%.

70 thŭn leh mtlaih êngiê, Điện Biên hruê anei jing leh sa hlăm dŭm čar mâo hnơ̆ng đĭ kyar pral hlăm 14 čar ti krĭng čư̆ čhiăng nah Dưr. Thŭn 2023, hnơ̆ng đĭ kyar GDP čar đăo tĭng mâo 7,1%, lu hĭn mkă hŏng hdră kñăm Klei bi kƀĭn bruă Đảng čar, đĭ kyar mkă hŏng hnơ̆ng kah knar kluôm ala, hlăm êpul 14 čar krĭng čư̆ čhiăng anah Dưr. Prăk hrui wĭt mơ̆ng bruă hiu čhưn ênguê đăo tĭng mâo 1.750 êklai prăk leh anăn ăt jing thŭn tal êlâo hiu čhưn ênguê čar mâo 1 êklăk gưl tue. Ênoh gŏ êsei ƀun ară anei knŏng adôk hlăm brô 26%.

Lê Thành Đô, Khua Knơ̆ng bruă sang čư̆ êa čar Điện Biên brei thâo: Mâo boh tŭ anei jing kyua alŭ wăl mđĭ lar leh klei ktang klei găl mâo leh, boh nik ênoh anôk kriê pioh ala kdrăn mblah Điện Biên Phủ; mđĭ boh tŭ iêô jak leh anăn yua prăk bi liê. Mbĭt anăn jing ngă mđrăm mbĭt, tŭ dưn bruă klam, hdră mđĭ kyar mnuih mă bruă, boh nik klei găl mă bruă kơ dŭm dhar bruă phŭn, mâo klei găl msĕ si tuh tia mkra mjing, lŏ hma yua kdrăp mrâo, hiu čhưn ênguê…

Lê Thành Đô, Khua Knơ̆ng bruă sang čư̆ êa čar Điện Biên mñă klă:

Hlăm wưng kơ anăp, khua gĭt gai čar ƀuăn rơ̆ng srăng gĭr ktưn, pral kdal mlih mrâo mbruă, gĭr hĭn hlăm bruă gĭt gai hlue si ai tiê pral, mbruă, păn kjăp klei găl, gĭr ktưn găn klei dleh dlan, lông dlăng, gĭr mkŏ mjing mđi kyar čar Điện Biên jing čar đĭ kyar pral hlăm krĭng wăl.

 Bruă hlue ngă hdră bi hrŏ ƀun pral, kjăp ti dŭm alŭ wăl Yŭ Dưr mâo boh tŭ jăk mơ̆ng bruă Đảng, bruă sang čư̆ êa dŭm alŭ wăl mkŏ mjing hdră ngă bruă djŏ hŏng boh sĭt; iêo jak jih bruă kđi čar ngă bruă leh anăn tui duah, mđĭ lar klei găl grăp alŭ wăl… Boh nik, Hdră mtrŭn mrô 11 hruê 11 hruê 10/2/2022 mơ̆ng Phŭn bruă kđi čar kơ hdră tă mđĭ kyar bruă duh mkra- ala ƀuôn, rơ̆ng êđăp ênang krĭng čư̆ čhiăng nah Dưr truh thŭn 2030, hnơ̆ng trah dlăng truh thŭn 2045 ngă leh, leh anăn dôk pŏk ngă srăng jing msĕ si boh kdrŭt đru krĭng anei đĭ kyar êdah kdlưn./.