VOV4.Êđê - Hluê si knơ̆ng bruă pui kmlă Krĭng Kwar krah (EVNCPC), thŭn 2024 mĭn tĭng hnơ̆ng prŏng hĭn srăng mâo 4.194 mW, đĭ êbeh 10% mkă hŏng thŭn dih. Hlăm wưng adiê mđiă ktang ară anei, hnơ̆ng ba yua pui kmlă truh kơ 87,6 êklăk kWh hlăm sa hruê. Ti anăp boh klei anăn, EVNCPC gĭt gai leh dŭm anôk bruă kñăm jih ai dưi, hluê ngă ktang phĭt dŭm hdră êlan bi hơĭt bruă mkăp brei pui kmlă kơ phung ba yua.

Hluê anăn, ba yua jih hnơ̆ng 1.095 Mw mơ̆ng dŭm sang măi bi êran pui kmlă hŏng ai êa, mă mơ̆ng anôk bi êran pui kmlă hŏng pil yang hruê hlăm brô 1.970 MW, leh anăn pui kmlă mơ̆ng klei pui ala čar. Dhar bruă pui kmlă dŭm čar, ƀuôn prŏng krĭng kwar krah – krĭng Lăn Dăp Kngư mtrŭt mđĭ bruă hluê ngă dŭm hdră duh bi liê mkŏ mkra hluê si hdră kčah, bi hrŏ klei ktrŏ kơ êlan klei pui, masin mlih hnơ̆ng pui kmlă. Hlăm wưng mđiă ktang msĕ ară anei, dŭm anôk bruă amâo mâo ngă bruă mdei, bi hrŏ klei mkăp brei pui mklă, knŏng mdei mă tơdah mgaih msir anôk jhat. Mbĭt anăn mđĭ hĭn êpul êya ngă bruă čiăng mgaih msir anôk mâo klei jhat hlăm wang 2 mmông, hmar mkăp pui kmlă kơ mnuih ƀuôn sang.